ەستى ءاننىڭ ەشقاشان ەسكىرمەيتىنى الىمساقتان ايان. كوڭىلدەن كەتپەيتىن سىرشىل مۋزىكانىڭ عۇمىرى قاشاندا ۇزاق. «مۋزىكانىڭ عۇمىرى نوتادا ەمەس, نوتالار اراسىنداعى تىنىشتىقتا» دەگەن موتسارتتىڭ ءسوزى كەيدە ەرىكسىز ەسكە تۇسەدى. راسىندا دا, جازدىڭ جىلى جاڭبىرىنداي ادەمى ءان ادام جانىنىڭ ەمشىسىندەي كورىنەتىنى بار.
جەرلەستەرىنىڭ ورتاسىنان الىستاماعان كومپوزيتور سارسەنبەك باكىردىڭ قاي ءانى بولسىن, تىڭدارماننىڭ جان الەمىمەن استاسىپ جاتاتىنداي كورىنەدى. ونىڭ جانارىنداعى بەيمالىم تىنىشتىقتى ساقتاعان رياسىز رومانتيكا اسەرى جىلدار بويى تارقامايتىن انگە اينالىپ جاتادى.
انگە ءماتىن سۇراماي, ولەڭگە ءان جازاتىن كومپوزيتورلار قازىرگى كەزدە «قىزىل كىتاپقا» ەنىپ كەتكەن سەكىلدى كورىنەتىنى بار. سارسەنبەكتىڭ اندەرىن تىڭداعاندا ونىڭ, شىن مانىندە, پوەزيادان الىستاماعانىن تۇسىنەسىڭ. ويتكەنى اندەرىندە ءمان مەن مازمۇن قاتار جۇرەدى.
ايتۋلى اقىن سەرىك تومانوۆتىڭ «سوعادى سەن دەپ جۇرەگىم» ولەڭى كومپوزيتوردى بەيجاي قالدىرماعانى انىق. ويتكەنى جۇرەك قىلىن شەرتەتىن شىعارمانى كومپوزيتور عاجاپ اۋەندى انگە اينالدىردى. اۋەلدە «اۋزىنان ايدىڭ تۇسكەن قىز» انىمەن تىڭدارماننىڭ جۇرەگىنەن ويىپ تۇرىپ ورىن العان كومپوزيتور شىعارمالارى ۋاقىتىندا ناعىز حيتكە اينالعانى ايداي اقيقات. سول ءبىر ءمولدىر شاقتى ەشكىم ۇمىتقان جوق.
اقيقاتىندا سارسەنبەكتىڭ قاي ءانىن تىڭداساڭىز دا تىنىپ اعىپ جاتقان وزەن كوز الدىڭىزعا كەلەدى. اندەرى ءبىر تىنىشتىقتى قالاپ تۇرعانداي كورىنەدى. القىن-جۇلقىن, داڭعازاعا تولى ارزانقول دۇنيەنىڭ ميكروسكوپپەن ىزدەپ تابۋ قيىن شىعار. ال «سوعادى سەن دەپ جۇرەگىم» شىعارماسىن تىڭداعان كەزدە دامىلسىز سوعىپ تۇرعان ساعىنىش ساعاتىنىڭ سىرتىلىن ەستىگەندەي كۇي كەشەسىڭ. ءان ءبىر ساتتە سىرلاسىڭا اينالىپ كەتەتىندەي-اق. بولمىسىنان ءانىنىڭ الىستاماعانىن تۇسىنەسىڭ. ايتپەسە, ۋاقىتتىڭ بۇگىنگى اعىمىنان الشاقتاماي, تويعا ارنالعان تالعامسىز اندەردىڭ سوڭىنا ءتۇسىپ كەتەر مە ەدى. الايدا ول ونداي قادامعا بارعان جوق. تالعامپاز كومپوزيتوردىڭ تاڭداۋى باسقا. قۋانىشتىسى سول – ءوز الەمىنەن الىستاماعانى.
«سوعادى سەن دەپ جۇرەگىم» ءانى, ناعىز رەتروعا اينالاتىن تۋىندى ەكەنى ءسوزسىز. ويتكەنى كومپوزيتور ءبىر ماۋسىمدىق ءان جازعان ەمەس, جازبايتىن دا شىعار. جىلدار جىلىستاسا دا, سارسەنبەك باكىردىڭ وسى ءبىر ءانى جۇرتتىڭ جۇرەگىنەن وشكەن جوق. قايتا ۋاقىت وتكەن سايىن ساعىنىش سازىنا اينالعان دۇنيە ءوز قۇنىن ارتتىرا تۇسكەن سەكىلدى.
«الاۋلاپ مەنىڭ نۇر ءوڭىم,
ءوزىڭدى ويلاپ جۇرەمىن.
كوڭىلدىڭ تاپپاي ءبىر ەمىن,
سوعادى سەن دەپ جۇرەگىم.
قىپشا بەل, ق ۇلىن ءمۇسىندىم,
كوڭىلدىڭ قۇسىن ۇشىردىم.
ءومىردىڭ مىنا ءوزىڭسىز,
ءمانسىزىن ەندى ءتۇسىندىم», دەپ كەلەتىن ءان قايىرماسى كىسى بالاسىنىڭ جۇرەگىنە جىلى تيەتىنى ءسوزسىز.
سەرىك تومانوۆتىڭ ولەڭىنە جازىلعان تاماشا ءاندى تىڭداعاندا بويىڭدى ادەمى ءبىر سەزىم بيلەپ الاتىنى راس. ولەڭدە ساعىمعا اينالعان جىلدارداعى ساعىنىش تابى سايراپ جاتىر. ال كومپوزيتور انگە اينالدىرعاننان كەيىن شىعارمانى ونەرسۇيەر قاۋىم لەزدە جاتتاپ العانى دا اقيقات. ويتكەنى ساز بەن ءسوز تىلگە جەڭىل, جۇرەككە جىلى تيەدى. كوڭىل تۇكپىرىندەگى سەزىم پەرنەلەرىن ءدوپ باسقان تۋىندىنىڭ اۋەنى مەن ءماتىنى ەگىزدىڭ سىڭارىنداي جاراسا كەتكەنى ءسوزسىز.
«كورگەنشە سەنى اسىقتىم,
كۇيىن ءبىر كەشىپ عاشىقتىڭ.
وزىڭنەن ۇزاپ قالسام-اق,
سەزىمنىڭ سەلىن تاسىتتىڭ», دەپ باستالاتىن قايىرما الدىنداعى شۋماقتا جىگىتتىك شاقتىڭ اڭسار-ارمانى اينا-قاتەسىز بەرىلىپ تۇر. ءاننىڭ سوزىنە زەر سالىپ قاراعان ادام اقىننىڭ بويىنداعى الاپات سەزىمنىڭ ولەڭ تىلىندە وزگەشە ورنەك العانىن بىردەن بايقايتىنى راس.
ليريكالىق ءان تىڭداۋشىنى تەبىرەنتپەي قويمايتىنى داۋسىز. قالاي الىپ قاراساق تا اۋەلدە «نۇر-مۇقاسان» دۋەتىنىڭ, كەيىننەن «مۋزارت» توبىنىڭ ورىنداۋىندا جۇرتتىڭ جۇرەگىنەن ورىن العان «سوعادى سەن دەپ جۇرەگىم» ءانىنىڭ ولمەيتىنى راس. بۇگىنگىنىڭ تالانتتى انشىلەرى جاڭاشا كوزقاراسپەن كوڭىلدەن شىعاتىنداي كاۆەر نۇسقاسىن جاساسا دا ارتىقتىق ەتپەيدى.