يندۋستريا جانە جاڭا تەحنولوگيالار مينيسترلىگىنىڭ قولداۋىمەن جىل سايىن وتكىزىلەتىن «NIFS50K» رەسپۋبليكالىق بيزنەس-جوسپارلار بايقاۋى قاتىسۋشىلاردىڭ ۇلكەن قىزىعۋشىلىعىن تۋدىرىپ ءجۇر. ونى وعان جولداناتىن وتىنىمدەر سانىنان اڭعارۋعا بولادى. تەك بىلتىردىڭ وزىندە 376 ادام قاتىسۋعا تىلەك بىلدىرگەن. جاس عالىمدار مەن تالانتتى ونەرتاپقىشتار, بيزنەس سالاسىنا ەندى ارالاسقان كاسىپكەرلەر ۇسىنعان جوبالاردىڭ جۇزەگە اسۋىنا, الەۋمەتتىك ماڭىزى بار باستامالاردى قولداۋعا, ولاردى ءازىرلەۋشىلەردى بيزنەس-جوسپارلاۋعا وقىتۋعا مۇمكىندىك بەرەتىن كونكۋرس اياسىنداعى «يننوۆاتسيالىق اۆتوبۋستىڭ» العاشقى ساپارى قىزىلجار وڭىرىنەن باستالدى.
قۇرامىندا تەحنولوگيالىق دامۋ جونىندەگى ۇلتتىق اگەنتتىكتىڭ وكىلدەرى مەن ساراپشىلارى بار شىعارماشىلىق توپ س.مۇقانوۆ اتىنداعى امبەبەپ كىتاپحانادا جەرگىلىكتى شاعىن جانە ورتا بيزنەس, ۇكىمەتتىك ەمەس ۇيىم جەتەكشىلەرىمەن, يننوۆاتسيالىق جوبالار اۆتورلارىمەن كەزدەسىپ, ساپاردىڭ ءمان-ماقساتىن ءتۇسىندىردى. وبلىس اكىمىنىڭ ورىنباسارى ەرلان اۋكەنوۆ ءوز سوزىندە جاستاردىڭ ىزدەنىسى مەن بەلسەندىلىگىن ارتتىرۋ ماقساتىمەن ۇيىمداستىرىلىپ وتىرعان بايقاۋدىڭ جاڭاشىلدىعىن اتاپ ءوتىپ, بيىل دا كوپتەگەن جوبا ۇسىنىلىپ وتىرعانىن جەتكىزدى. «تەحنولوگيالىق دامۋ جونىندەگى ۇلتتىق اگەنتتىك» اق ديرەكتورى ارتەم ۆوزجاەۆ وڭىرلەردە ىرىكتەلگەن كونكۋرسانتتار استانادا وتەتىن بايقاۋدىڭ جارتىلاي اينالىمىنا جولداما الاتىنىن, جۇلدەلى ورىندار ءۇشىن سايىسقا ءتۇسۋ مۇمكىندىگىنە يە بولاتىنىن اتاپ كورسەتتى. بايقاۋ جەڭىمپازى 7,5 ميلليون تەڭگە جۇلدەنى قانجىعاعا بايلاسا, جۇلدەگەرلەر دە گرانت يەلەنەدى. وتكەن جىلى باس ءجۇلدەنى تالدىقورعان قالاسىنىڭ تۇرعىنى, «ايماقتارداعى سۋ كوتەرگىش قۇرال» جوباسىنىڭ اۆتورى مىرزاحمەت تولەەۆ جەڭىپ العان. ونىڭ ونەرتاپقىشتىعى ەلەكتر ەنەرگياسىن تۇتىنباي-اق وزەن جاعالاۋىنداعى ايماقتاردى سۋارۋعا ارنالعان. 2,5 ميلليون تەڭگە قارجىلاي سىيلىقتى العان اقتوبەلىك نۇرلان جانبۋرين ءۇيدى شاڭ مەن توزاڭنان, تۇتىننەن, ماسا-شىركەيدەن قورعايتىن قاراپايىم اۋا تازالاۋ جۇيەسىن ويلاپ تاپقان. الماتىلىق ماكسيم پودلەسنىحتىڭ «الدىڭعى جەڭىل مودۋل نەگىزىندە جاياۋ جۇرگىنشىنى قورعاۋ قۇرىلعىسى» جوباسى دا ساراپشىلار تاراپىنان جوعارى باعالانعان.
سولتۇستىكقازاقستاندىق ونەرتاپقىشتار ساراپشىلار نازارىنا 30-عا جۋىق جوبا ۇسىنىپ, ولاردىڭ اراسىندا م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ وكىلدەرى وتە-موتە بەلسەندىلىك كورسەتتى. كوللەدج ۇستازى الەكسەي ميحايلوۆ ازىرلەگەن «اقىلدى ۇيلەر» جوباسى جينالعاندار كوڭىلىنەن شىقتى. سول سياقتى پەتروپاۆل گۋمانيتارلىق كوللەدجىنىڭ ستۋدەنتى نۇرلان تۇرسىنوۆ دايىنداپ اكەلگەن «بولاشاقتىڭ كومپيۋتەرى» جوباسى كوپقىرلى قىزمەت كورسەتۋ ەرەكشەلىگىمەن تاڭعالدىردى.
بايقاۋ شەڭبەرىندە يننوۆاتسيالىق جانە كاسىپكەرلىك شەبەرلىكتىڭ قىر-سىرىنا ۇيرەتەتىن ترەنينگتەر وتكىزىلىپ, ءتۇرلى كەڭەستەر بەرىلدى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.