استاناداعى كلاسسيكالىق شاحماتتان الەم چەمپيوناتىنىڭ اياسىندا حالىقارالىق شاحمات فەدەراتسياسىنىڭ پرەزيدەنتى اركادي دۆوركوۆيچ باس قالادا ورنالاسقان شاحماتشىلار ساياباعىنا اعاش وتىرعىزىپ, جاھاندىق دودانىڭ قورىتىندىسى تۋرالى ءوز ويىن ورتاعا سالدى.
«بيىلعى الەم چەمپيوناتى وتە ەرەكشە جاعدايدا ءوتتى. سەبەبى ءبىز استاناداعى دودادا اراعا 10 جىل سالىپ سۋ جاڭا چەمپيوننىڭ ەسىمىن انىقتادىق. بۇل – كلاسسيكالىق شاحماتتىڭ عاسىردان اساتىن تاريحىنداعى اتاۋلى وقيعا. مۇنىڭ الدىنداعى 16-شى الەم چەمپيونى نورۆەگيالىق گروسسمەيستەر ماگنۋس كارلسەن ءوز اتاعىن قورعاۋدان باس تارتقان بولاتىن. مۇمكىن, ول كەلەشەكتە الەم چەمپيونى اتاعى ءۇشىن كۇرەسەتىن شىعار», دەدى فيدە پرەزيدەنتى.
سونىمەن قاتار حالىقارالىق شاحمات فەدەراتسياسىنىڭ پرەزيدەنتى دين ليجەن مەن يان نەپومنياششي ءۇش اپتا بويى شاحمات جانكۇيەرلەرىنە تارتىستى باسەكە ۇسىنعانىن اتاپ ءوتتى.
«دين ليجەن مەن يان نەپومنياششي اراسىنداعى ماتچ شاحمات جانكۇيەرلەرىنىڭ ەشقايسىسىن بەيجاي قالدىرمادى دەپ ويلايمىن. ءبىز ءۇش اپتا بويى ەكى شاحماتشىنىڭ ارباسقان كوزدەر, مىڭ قۇبىلعان قاس-قاباق پەن جان بەرىسىپ, جان الىسقان تارتىستى ويىنىنا كۋا بولدىق. ويتكەنى ەكى سپورتشى دا 17-ءشى الەم چەمپيونى اتانۋ ءۇشىن ايانىپ قالعان جوق. ولار ءاربىر پارتيادا توسىن جۇرىستەر جاساپ, ميلليونداعان جانكۇيەردى تاڭعالدىرىپ, ولاردىڭ شاحماتقا دەگەن قىزىعۋشىلىعىن وياتتى دەۋگە بولادى», دەدى اركادي دۆوركوۆيچ.
سونداي-اق ول شاحماتتان الەم چەمپيونى اتاعىن ۇمىتكەر ويىنشىلار ساراپقا سالعان سوڭ, مۇنداي ءىرى باسەكەلەردە تەڭ ناتيجەنىڭ ءجيى تىركەلۋى زاڭدىلىق دەپ ەسەپتەيدى.
«شاحماتشىلار اراسىنداعى كۇرەس ءاۋ باستا كۇتىلگەندەي تەڭ جاعدايدا ءوتتى. ويتكەنى ءار ويىنشىنىڭ وزىنە بەلگىلى مىقتى تۇستارى بار. سونىمەن قاتار ولار – الەمدىك رەيتينگتە 2 جانە 3-ورىنداردا تۇرعان ءبىر دەڭگەيلى سپورتشىلار. سوندىقتان بيىلعى چەمپيوناتتا ناتيجەلى پارتيالار سانى دا كوپشىلىك كۇتكەندەي كوپ بولدى. ارينە, بۇل – سپورت. ءاربىر قاتەلىگىنەن كەيىن گروسسمەيستەرلەر ولقىلىقتىڭ ورنىن تولتىرۋ ءۇشىن كەلەسى تۋردا جاقسى دايىندىقپەن كەلىپ, تارازى باسىن تەڭەستىرىپ, ءبىر-ءبىرىنىڭ ەسەپتە ۇزاپ كەتۋىنە مۇمكىندىك بەرمەدى. بۇل ءوز كەزەگىندە شاحمات جانكۇيەرلەرىنە ۇنادى», دەدى ول.
اركادي دۆوركوۆيچ الەم چەمپيوناتىن جوعارى دەڭگەيدە ۇيىمداستىرعانى ءۇشىن مەملەكەت باسشىسى مەن قازاقستان شاحمات فەدەراتسياسىنىڭ پرەزيدەنتىنە شىنايى العىسىن ءبىلدىردى.
«وسىنداي ايتۋلى دودانى جوعارى دەڭگەيدە ۇيىمداستىرىپ, سپورتشىلار مەن جانكۇيەرلەرگە بارلىق جاعدايدى جاساپ بەرگەنى ءۇشىن قازاقستانداعى سەرىكتەستەرىمىزگە, ەل پرەزيدەنتىنە, قازاقستان شاحمات فەدەراتسياسىنىڭ باسشىلىعىنا ەرەكشە العىسىمدى بىلدىرەمىن. وسى جارىسقا ارنايى اتباسىن تىرەگەن قىتايدىڭ جانە رەسەيدىڭ دەلەگاتسيالارى كەيىنگى 20 جىلداعى ەڭ ۇزدىك جاعداي جاسالعان الەم چەمپيوناتىنىڭ ءبىرى بولعانىن ايتىپ جاتىر», دەدى ول.
ءسوز سوڭىندا اركادي دۆوركوۆيچ حالىقارالىق شاحمات فەدەراتسياسى (فيدە) الداعى ۋاقىتتا قازاقستانعا تاعى ءبىر ۇلكەن جوبامەن ورالاتىنىن مالىمدەدى.
ء«بىز قازىر تاعى ءبىر ايتۋلى دودانى ۇيىمداستىرۋدىڭ ءمان-جايىن تالقىلاپ جاتىرمىز. بۇل جولى بالالار اراسىنداعى باسەكەنى وتكىزەتىن شىعارمىز», دەدى فيدە پرەزيدەنتى.