وتكەن دەمالىس كۇندەرى فۋتبولدان ەل كۋبوگىنىڭ 1/8 فينال ماتچتارى ءوتىپ, جارىستىڭ شيرەك فينالىنا جولداما العان 8 كوماندا بەلگىلى بولدى.
كۋبوك ويىندارىنىڭ پلەي-وفف كەزەڭىندە بىرقاتار توسىن ناتيجە تىركەلدى. اتاپ ايتقاندا, بىلتىرعى ەل چەمپيوناتىنىڭ كۇمىس جۇلدەگەرى «اقتوبە» سىرت الاڭدا «اتىراۋ» كومانداسىنان ويىن سوڭىنداعى پەنالتي سەرياسىندا جەڭىلىپ, تۋرنيردەن شىعىپ قالدى. ال اقتاۋدىڭ «كاسپيى» ءبىرىنشى ليگادا دوپ تەبەتىن «تۇراننان» ايلاسىن اسىرا المادى. شيرەك فينالعا «اتىراۋ» مەن «تۇراننان» بولەك, «استانا», «توبىل», «ورداباسى», «قايرات», «قىزىلجار» جانە «شاحتەر» كوماندالارى جولداما الدى.
17 مامىرعا جوسپارلانعان شيرەك فينالدىڭ ءبىرىنشى ماتچىندا «استانا» – «تۇران», «اتىراۋ» – «قايرات», «ورداباسى» – «قىزىلجار», «شاحتەر» – «توبىل» كلۋبتارى كەزدەسەدى. قارىمتا ماتچ 7 ماۋسىمدا وتەدى.