قىزىلوردا وبلىسىندا مەديتسينالىق كادرلار جاڭا ءبىلىم بەرۋ تەحنولوگيالارىن قولدانۋ ارقىلى دايىندالادى
الەمدىك دەنساۋلىق ساقتاۋ سالاسىنىڭ قازىرگى نەگىزگى پروبلەمالارىنىڭ ءبىرى – ءبىرىنشى كەزەكتە مەديتسينالىق كومەك كورسەتەتىن قىزمەتكەرلەردىڭ تاپشىلىعىمەن, دارىگەرلەر مەن مەدبيكەلەردىڭ جانە اكۋشەرلەردىڭ اراسالماعىنداعى ۇلكەن الشاقتىقتارمەن, سونداي-اق, مەديتسينالىق قىزمەتكەرلەردىڭ ۇلكەن قالالاردا شوعىرلانىپ الۋىمەن بايلانىستى بولىپ وتىر. ەلىمىزدەگى وسى پروبلەمانىڭ ءبىر كورىنىسى – بىلىكتى مەديتسينا قىزمەتكەرلەر سانىنىڭ اۋىلدىق اۋدانداردا سيرەي ءتۇسۋى.
دارىگەرلەردىڭ ءبىلىمىن جەتىلدىرۋدىڭ الماتى مەملەكەتتىك ينستيتۋتى ەل وڭىرلەرىندەگى وسى پروبلەمانى شەشۋ ءۇشىن كادرلاردى ۇزدىكسىز دايارلاۋدىڭ قاناتقاقتى جوباسىن ۇسىندى. «قىزىلوردا وبلىسىنداعى دەنساۋلىق ساقتاۋ جۇيەسىن ۇيىمداستىرۋدى جەتىلدىرۋ جونىندەگى عىلىمي نەگىزدەمەنى جانە كادرلاردى ۇزدىكسىز كاسىپتىك دايارلاۋدىڭ كەشەندى مودەلىن ازىرلەۋ» دەپ اتالاتىن بۇل جوبانى جۇزەگە اسىرۋ ماقساتىندا ينستيتۋت باسشىلىعى مەن قىزىلوردا وبلىسى اكىمدىگى اراسىندا ىنتىماقتاستىق تۋرالى مەموراندۋم جاسالىنىپ, وبلىستىق دەنساۋلىق ساقتاۋ باسقارماسىمەن بىرلەسكەن باعدارلاما قابىلداندى.
قىزىلوردا وبلىسىنداعى دەنساۋلىق ساقتاۋ سالاسىنىڭ جاعدايىنا جۇرگىزىلگەن تالداۋلار ناتيجەسى بۇل وبلىستا ماماندار بىلىكتىلىگىن كوتەرۋگە دەگەن قاجەتتىلىكتىڭ كۇشتى ەكەندىگىن كورسەتتى. سوندىقتان, وبلىستىق دەنساۋلىق ساقتاۋ باسقارماسىمەن كەلىسىلە وتىرىپ, بىلىكتىلىكتى ارتتىرۋ كۋرستارىن, سەمينارلار مەن شەبەرلىك سىنىپتارىن جۇرگىزۋدىڭ مەرزىمدەرى انىقتالدى.
قىزىلوردا وبلىسىنداعى مەديتسينالىق كادرلاردىڭ كاسىپتىك دايارلىعىن ۇزدىكسىز ارتتىرۋعا باعىتتالعان بۇل باعدارلامانىڭ ءبىر ەرەكشەلىگى – ونىڭ ناق وسى ءوڭىردىڭ جاعدايى مەن قاجەتتىلىگىنە لايىقتالىپ جاسالعاندىعى بولىپ تابىلادى. سوندىقتان, مۇنداعى وقۋ باعدارلامالارىنىڭ بارلىعى وسىنداعى دەنساۋلىق ساقتاۋ جۇيەسىنىڭ وزىندىك ەرەكشەلىكتەرىن بارىنشا ەسكەرەتىن بولادى. ماسەلەن, مەديتسينا قىزمەتكەرلەرىن ءبىر ورتالىققا جيناۋدىڭ كۇردەلىلىگى ەسكەرىلە وتىرىپ, جاڭا وقىتۋ تەحنولوگياسىنىڭ مۇمكىندىكتەرى نەگىزىندە تەلەمەديتسينانىڭ جەتىستىكتەرى پايدالانىلادى. سونداي-اق, اۋىلداعى دارىگەرلەرگە ولاردىڭ ءوز جۇمىس ورىندارىندا وقىتۋ ءىسى قولدانىلادى.
شەبەرلىك سىنىپتارىن جۇرگىزۋ ءۇشىن م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ, ارحانگەلسك قالاسىنداعى قوعامدىق دەنساۋلىق ساقتاۋدىڭ حالىقارالىق مەكتەبىنىڭ وقىتۋشىلارى, شەتەلدىك ماماندار شاقىرتىلدى.
جاسالىنعان كەلىسىم بويىنشا, 2014-2015 جىلدار ارالىعىندا 1078 مەديتسينا قىزمەتكەرلەرىن وقىتۋ جوسپارلانعان. بيىلعى جىلدىڭ باسىنان بەرى 514 قىزىلوردالىق دارىگەر وقۋدان ءوتتى. سونىڭ ىشىندە, رەسپۋبليكالىق بيۋدجەت ەسەبىنەن 2014 جىلدىڭ باسىنان بەرى 191 مامان ءوز بىلىكتىلىگىن كوتەرسە, 26 مامان قايتا دايارلىقتان ءوتتى. ال جەرگىلىكتى بيۋدجەت ەسەبىنەن 587 مامان ءوز بىلىكتىلىگىن كوتەرىپ, 86 مامان قايتا دايارلاۋدان ءوتتى.
سۇڭعات ءالىپباي,
«ەگەمەن قازاقستان».