حالىقارالىق شاحمات فەدەراتسياسىنىڭ باسشىسى اركادي دۆوركوۆيچ قۇرمەت كورسەتكەنى ءۇشىن پرەزيدەنتكە العىس ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ء«بىزدىڭ سوڭعى كەزدەسۋىمىزدەن بەرى 7 ايعا جۋىق ۋاقىت ءوتتى. وسى ۋاقىت ارالىعىندا ءسىزدىڭ جان-جاقتى قولداۋىڭىزبەن قازاقستاندا بەس الەم چەمپيوناتىن وتكىزدىك. شاحمات سپورتى قازاقستاندا قانشالىقتى تانىمال ەكەنىنە كۋامىز. تسيفرلار تاڭعالدىرادى. ءارى ول كەلەشەكتە ارتا تۇسەدى. مەن بۇعان سەنىمدىمىن. ويتكەنى مەملەكەتتىك پەن دەمەۋشىلەر تاراپىنان كورسەتىلەتىن قولداۋ ارقاشان جاقسى ناتيجە بەرەدى», دەدى فيدە پرەزيدەنتى.
اركادي دۆوركوۆيچتىڭ ايتۋىنشا, الەم چەمپيوناتىنىڭ اياسىندا كوپتەگەن قوسىمشا جارىستار ءوتتى. اتاپ ايتقاندا, قازاقستاننىڭ ايەلدەر قۇراماسىنىڭ الەم قۇراماسىنا قارسى ويىنى, بالالار تۋرنيرلەرى, الەمنىڭ جەتەكشى شاحماتشىلارىنىڭ قاتىسۋىمەن شەبەرلىك ساعاتتارى مەن بىررەتتىك ويىن سەانستارى ۇيىمداستىرىلدى. سونداي-اق ول بيىل جازدا قازاقستاندا العاش رەت مەكتەپتەر اراسىندا الەم چەمپيوناتىن وتكىزۋ جوسپارلانىپ وتىرعانىن جەتكىزدى. جارىسقا كەمىندە 80 ەلدىڭ وكىلى قاتىسادى.
قىتاي گروسسمەيسترى دين ليجەن وسى ماتچقا شاقىرتۋ العانى ءۇشىن مەملەكەت باسشىسىنا العىس ايتتى.
«سىزبەن كەزدەسۋ – ءبىز ءۇشىن زور مارتەبە. وسى تۋرنيرگە قاتىسىپ, جەڭىسكە جەتكەنىم ءۇشىن قۋانىشتىمىن. ويىننان كەرەمەت ءلاززات الدىم», دەدى ول.
ءوز كەزەگىندە گروسسمەيستەر يان نەپومنياششي قازاقستاندا شاحماتقا قىزىعۋشىلىق جوعارى ەكەنىنە نازار اۋداردى.
«ماتچ ۇيىمداستىرۋشىلارىنا, ەلىڭىزگە العىس ايتامىن. ءسىزدىڭ ەلىڭىزدە شاحماتقا دەگەن قىزىعۋشىلىق ۇدايى ارتىپ كەلە جاتقانىن كورىپ وتىرمىن. فەدەراتسيانىڭ جاڭا باسشىلىعىمەن دۇرىس باعىتتا دامىپ جاتىرسىزدار», دەدى ول.