ەلوردادا ءوتىپ جاتقان كلاسسيكالىق شاحماتتان الەم چەمپيوناتى ءوز مارەسىنە تاياپ قالدى. «التىن ءتاج» ءۇشىن تالاسىپ جاتقان رەسەيلىك يان نەپومنياششي مەن قىتايلىق دين ليجەن اراسىندا جوسپارلانعان بارلىق 14 پارتيا اياقتالىپ, نەگىزگى كەزەڭدە جەڭىمپاز انىقتالمادى – 7:7. جارىس ەرەجەسى بويىنشا, وسى 14 تۋردىڭ ىشىندە ەكى شاحماتشىنىڭ ءبىرى 7,5 ۇپاي جيناپ, الەمنىڭ 17-ءشى شاحماتشىسى اتانۋعا ءتيىس ەدى. الايدا نەگىزگى كەزەڭدە شاحماتشىلاردىڭ كۇشتەرى تەڭ بولدى. ەندى جەڭىمپاز تاي-برەيكتە انىقتالادى.
سوڭعى تۋر الدىندا ەكى گروسسمەيستەردە دە جەڭىسكە جەتۋگە تاماشا مۇمكىندىك بولدى. بىراق ولار بۇل مۇمكىندىكتى پايدالانا المادى. شەشۋشى باسەكەدە اق تاستارمەن ويناپ, بەلگىلى ءبىر دارەجەدە باسىمدىققا يە بولعان قىتايلىق دين ليجەن ەرتە كەزەڭدە شابۋىل ۇيىمداستىرامىن دەپ وپىق جەپ قالا جازدادى. نەپومنياششيدى دە ءساتتى وينادى دەپ ايتا المايمىز. رەسەيلىك شاحماتشىدا دا قاتەلىكتەر بولدى. ءسويتىپ, جەتى جارىم ساعاتقا جالعاسقان 14-پارتيا 90 جۇرىستەن كەيىن تەڭ ەسەپپەن اياقتالدى. مۇنىڭ الدىندا شاحماتشىلار التى ساعاتتان اسا ۋاقىت ويناپ, چەمپيوناتتىڭ رەكوردىن تىركەگەن بولسا, بۇل جولى ءوز رەكوردتارىن جاڭارتتى.
ماتچتان كەيىنگى ءباسپاسوز ءماسليحاتىندا ويىنشىلارعا چەمپيونات بارىسىندا قاي پارتيا ەڭ قيىن بولدى دەگەن سۇراق قويىلدى. نەپومنياششي بۇل سۇراقتان بارىنشا جالتارىپ, جالپىلاما بارلىق پارتيا قيىن بولدى دەپ قىسقا جاۋاپ قايتاردى. ال دين جەتىنشى پارتيادا قاتتى قينالعانىن ايتىپ, وسى ويىننان كەيىن وزىنە كەلۋى قيىن بولعانىن جاسىرماي, اعىنان جارىلدى.
كەشە شاحماتشىلار راپيد جانە بليتستەن تاي-برەيك وينادى. ياعني بۇل – 25 مينۋت بولاتىن, ءار جۇرىسكە 10 سەكۋندتان بەرىلەتىن 4 پارتيا. ەسەپ ول كەزدە دە تەڭ بولسا, 5 مينۋتتان ءار جۇرىسكە 3 سەكۋند بەرىلەتىن 2 پارتيادا جەڭىمپاز انىقتالادى. ءارى قارايعى فورمات العاشقى جەڭىسكە دەيىن (3+2) جالعاسادى.