ەلورداداعى جاقسىلىق ۇشكەمپىروۆ اتىنداعى جەكپە-جەك سارايىندا وتكەن پارادزيۋدودان ازيا چەمپيوناتى ءوز مارەسىنە جەتتى. سارى قۇرلىقتىڭ 11 ەلىنەن كەلگەن 100-دەن استام سپورتشى J1 (كوزى مۇلدەم كورمەيتىن) جانە J2 (كوزى ناشار كورەتىن سپورتشىلار) ساناتى بويىنشا ءتۇرلى ءتۇستى جۇلدەلەردى ساراپقا سالدى. جەكەلەي سايىس ناتيجەسىندە, قازاقستان قۇراماسى 4 التىن, 4 كۇمىس جانە 6 قولا جۇلدە ولجالاپ, جالپىكوماندالىق ەسەپتە ەكىنشى ورىنعا جايعاستى.
ازيا چەمپيوناتىنىڭ اشىلۋ سالتاناتىنا مادەنيەت جانە سپورت ءمينيسترى اسحات ورالوۆ, «IBSA» (دۇنيەجۇزىلىك پارادزيۋدو ۇيىمى) توراعاسى يانوش تاردوس جانە استانا قالاسى اكىمىنىڭ ورىنباسارى ەسەت بايكەن قاتىسىپ, سپورتشىلارعا ساتتىلىك تىلەدى. سونىمەن قاتار رەسمي ءىس-شارا بارىسىندا بىلتىرعى الەم چەمپيوناتىنىڭ جەڭىمپازدارى – اقمارال ناۋاتبەك پەن ەرعالي شامەي «قازاقستان رەسپۋبليكاسىنىڭ ەڭبەك سىڭىرگەن سپورت شەبەرى» سپورتتىق اتاعىمەن ماراپاتتالدى. سونداي-اق سپورتشىلاردى دايارلاعان باپكەر داۋرەن ورازوۆ «قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى» سپورتتىق اتاعىنا يە بولدى.
ءسويتىپ, ءۇش كۇنگە جالعاسقان بايراقتى باسەكەنىڭ العاشقى جارىس كۇنىندە جەرلەستەرىمىز ەكى التىن, ەكى كۇمىس جانە ءبىر قولا مەدالدى قورجىنعا سالدى. اتاپ ايتقاندا, دايانا فەدوسوۆا (57 كگ, J2) مەن ەرعالي شامەي (73 كگ, J1) چەمپيون اتانسا, اقمارال ناۋاتبەك (52 كگ, J2) كۇمىس, ولجاس ورازالى (73 كگ, J2) قولا مەدال ەنشىلەدى.
ەرعالي شامەي باس جۇلدە ءۇشىن وتكەن بەلدەسۋدە وزبەكستاندىق شوحرۋح مامەدوۆتەن باسىم تۇسسە, دايانا فەدوسوۆا دا وڭتۇستىكتەگى كورشىمىزدىڭ بۇرىمدى بالۋانى كۋمۋسحون حودجاەۆادان ايلاسىن اسىردى. ال بىلتىرعى الەم چەمپيونى اقمارال ناۋاتبەك فينالدا وزبەكستان سپورتشىسىنا جول بەرىپ قويدى.
ازيا چەمپيوناتىنىڭ ەكىنشى كۇنىنە جوسپارلانعان باسەكەلەردە الفيا تىلەكقابىل (57 كگ) J1 ساناتىندا, جانبوتا امانجول (90 كگ) J2 ساناتىندا جەڭىس تۇعىرىنا كوتەرىلدى. بۇل – 16 جاستاعى الفيانىڭ العاشقى ازيا چەمپيوناتى. ول پارادزيۋدودان قازاقستان ۇلتتىق قۇراماسىنا بيىل قوسىلعان بولاتىن.
ا.تىلەكقابىل فينالدا وزبەكستاندىق سپورتشى حوسياتكحون پوزيلجانوۆانى يپپون ادىسىمەن جەڭسە, جانبوتا ەلىمىزدىڭ تاعى پارادزيۋدوشىسى عالىمجان سماعۇل ۇلىمەن بەلدەسىپ, اسا تارتىستى وتكەن باسەكەدە ءوز مىقتىلىعىن دالەلدەدى. عالىمجان كۇمىس جۇلدەگە يە بولدى.
سونىمەن قاتار جارىستىڭ ەكىنشى كۇنىندە ەرلان كونكيەۆ (+90 كگ, J2) پەن باۋىرجان ارىستانبەكوۆ (90 كگ, J1) فينالدا ءسۇرىنىپ, كۇمىس جۇلدەگە يە بولسا, ديلورام ديحانوۆا (57كگ, J1), دينارا كۋدجۋلوۆا (70 كگ, J1), زاۋرە ايتەك (70 كگ, J1), تالعات اجىعاليەۆ (+90 كگ, J2) جانە ەرلان وتەپوۆ (90 كگ, J1) ازيا چەمپيوناتىنىڭ قولا جۇلدەگەرلەرى قاتارىنان كورىندى.
«قازاقستان قۇراماسى ازيا چەمپيوناتىن جوسپارلاعانىمىزداي ءساتتى اياقتادى. دەسە دە ءبىز ءۇشىن ازيا چەمپيوناتى اياقتالدى دەپ ايتۋعا ءالى ەرتە. ەرتەڭ كوماندالىق جارىستا باق سىنايمىز. جەكەلەي سايىس بويىنشا قۇراما جوسپاردى تولىق ورىندادى. ازيا چەمپيوناتىندا جەڭىمپاز جانە جۇلدەگەر اتانعان سپورتشىلاردىڭ باسىم بولىگى قۇراماعا بيىل قوسىلعان جاس بالۋاندار. وسىنداي الەمدىك دارەجەدەگى العاشقى جارىستارىنا قاتىستى. ولاردىڭ كەيبىرەۋلەرى, مىسالى الفيا ساۋساعىنىڭ سىنعانىنا قاراماستان كۇرەسىپ, جانكەشتىلىك تانىتتى. 16 جاسىندا ازيا چەمپيونى اتاندى. پارادزيۋدودا وسال سپورتشى دەگەن بولمايدى. مۇندا تاتاميگە شىققان ءاربىر بالۋان ەرەكشە قۇرمەتكە يە جانە ولاردىڭ ەرىك-جىگەرى بارىمىزگە ۇلگى دەپ ويلايمىن», دەيدى قازاقستان قۇراماسىنىڭ باس باپكەرى جاندوس قيانوۆ.
استانا تاتاميىندەگى ازيا چەمپيوناتىندا قازاقستان قۇراماسىنان بولەك, وزبەكستان, قىرعىزستان, جاپونيا, موڭعوليا, ءۇندىستان, قىتايلىق تايپەي, يندونەزيا, يران, وڭتۇستىك كورەيا جانە تايلاند قۇراماسىنىڭ وكىلدەرى بەلدەستى. جالپىكوماندالىق ەسەپتە وزبەكستان قۇراماسى 4 التىن, 6 كۇمىس, 3 قولا مەدالمەن كوش باستاسا, يران بالۋاندارى 3 التىن جانە 2 قولا جۇلدەمەن ۇزدىك ۇشتىكتى تۇيىندەدى.