يسپانياداعى «WTA 1000» جانە «ATP 1000» ساناتىنداعى «ماستەرس» جارىسىنا قاتىسقان قازاقستان تەننيسشىلەرى ساتسىزدىككە ۇشىراپ, ءتۋرنيردىڭ ەكىنشى اينالىمىنان ارىگە اسا المادى.
ەرلەر اراسىنداعى باسەكەدە جارىس جولىنا شىققان قازاقستاننىڭ ءبىرىنشى راكەتكاسى الەكساندر بۋبليك ەكىنشى اينالىمدا الەمنىڭ جەتىنشى راكەتكاسى دانيالىق حولگەرۋ رۋنەمەن شەبەرلىك بايقاسىپ, ءۇش سەتكە جالعاسقان تارتىستى ماتچتا – 1:6, 6:4, 6:7(9:11) ەسەبىمەن جەڭىلىپ قالدى. باسەكە ەكى ساعات بەس مينۋتقا سوزىلدى.
ال قىزدار اراسىنداعى ەل ۇزدىگى – ەلەنا رىباكينا دۇنيەجۇزىلىك رەيتينگتە 62-ورىندا تۇرعان 24 جاستاعى رەسەيلىك اننا كالينسكايانىڭ وسال تۇسىن تابا المادى. بۇل كەزدەسۋ دە ءۇش سەتكە جالعاسىپ, رەسەيلىك تەننيسشى 5:7, 6:4, 2:6 ەسەبىمەن باسىم ءتۇستى. سونىمەن قاتار يۋليا پۋتينتسەۆا فرانتسيالىق كارولين گارسيادان (5-ورىن) ەكى سەتتە جەڭىلسە (3:6, 4:6), جۇپتىق سىنداعى وتانداسىمىز اننا دانيلينا ماجارستاندىق تيمەەي بابوشپەن بىرگە مارتە كوستيۋك (ۋكراينا) پەن ەلەنە رۋزە (رۋمىنيا) جۇبىنا جول بەردى – 4:6, 6:4, 10:12.