ەلىمىزدەگى بىرەگەي اسكەري ۇلتتىق ۋنيۆەرسيتەت تۋرالى وي-تولعام
ەل ءۇشىن, ەلىمىزدىڭ ەرتەڭى ءۇشىن اتا-بابالارىمىز ارمان ەتكەن بەيبىت كۇن قازىر كۇندە نۇرلى شۋاعىن توگىپ, الدىمىزدان اق تاڭ بولىپ اتادى. بۇل كەزىندە ۇلان-عايىر جەرىمىزدى نايزانىڭ ۇشىمەن, بىلەكتىڭ كۇشىمەن قورعاپ قالعان اتا-بابالار اماناتىن ارداقتاي بىلگەن, قيىن-قىستاۋ كەزەڭنەن امان الىپ ءوتىپ, تاۋەلسىزدىگىمىزدى تۋ ەتكەن قازىرگى مەملەكەتىمىزدىڭ سىندارلى ساياساتىنىڭ ارقاسىندا پايدا بولعان ماڭگىلىك ەلدىڭ شاپاعاتى دەيمىز. ەندەشە, ماڭگىلىك ەلدىڭ ىرگەتاسى بەرىك قالانىپ, الەم ىرىلەرىنىڭ قاتارىنا قوسىلۋى ارقاسىندا حالقىمىزدىڭ ماڭگىلىككە كۇن نۇرىنداي شومىلا بەرەر تولاعاي تابىستارى مەن ىزگىلىك ءنارىنىڭ جەمىسى كۇننەن-كۇنگە ارتا بەرەرى دە انىق.
ال وسىنىڭ ءبارىن ساقتاۋ ەلدىڭ قورعانىس قابىلەتىنىڭ مىقتىلىعىنا تىكەلەي بايلانىستى. كوز الارتقان كوپ دۇشپاننىڭ مىسىن باسىپ, جار استىندا جاتقان جاۋدىڭ جىگەرىن قۇم ەتۋ تەك بىلەكتىكتىڭ عانا ەمەس, بىلىكتىلىكتىڭ ارقاسىندا كەلەتىن جەڭىس. سوعان وراي ءبىزدىڭ اسكەرىمىزدىڭ اسقاق تۋىنىڭ جەلبىرەي ءتۇسۋى قورعانىستىڭ قۋاتتى قاينار كوزىندە, اسكەريلەرىمىزدىڭ جۇرەگىندە, تەرەڭ ءبىلىم, تەڭدەسسىز دايارلىعىندا جاتىر. ويتكەنى, «قاستەرلى وتانىمىزعا قالتقىسىز قىزمەت ەتۋ جانە ونى قورعاۋ – ءاربىر ازاماتتىڭ قاسيەتتى بورىشى», دەپ مەملەكەت باسشىسى نۇرسۇلتان نازارباەۆ ايتقانداي, اتا-بابالارىمىزدان قالعان ۇلان-عايىر جەرىمىزدى قورعاۋ قازىرگى كەزدەگى جاستارىمىزدىڭ ەنشىسىندەگى ەڭ ءبىر قاسيەتتى بورىشى. ال قازاقتىڭ قاھارمان ۇلى باۋىرجان مومىش ۇلى «ءوز ەلىن ماقتانىش ەتپەۋ – ساتقىندىقپەن تەڭ» دەگەندەي, ونىڭ الىپتىعىن دا, جاسامپازدىعىن دا, كورشىلەس ەلدەردىڭ اراسىندا سارا ساياساتىنىڭ ارقاسىندا ىرگەلى ءارى بىرەگەيى ەكەندىگىن دە قۋانىشپەن ايتۋ قاي-قايسىمىزعا دا ۇلكەن مارتەبە. ەندەشە, سول مارتەبەگە لايىقتى ەلدىڭ ەڭسەسىن كوتەرەتىن, بولاشاققا ءۇمىت وتىن جاعاتىن, بەرىك ىرگەتاسىمىز بەن قاۋىپسىزدىگىمىزدى بەكەمدەي تۇسەتىن ناقتى ىستەر كوز الدىمىزدا قاناتىن جايىپ, جەمىسىن بەرۋدە. قازىرگى كۇندە ماقتانىشپەن ايتار سونىڭ ءبىرى كەشە عانا مەملەكەت باسشىسى اشقان ەلىمىزدىڭ ۇلتتىق قورعانىس ۋنيۆەرسيتەتى بولىپ وتىر.
ەلىمىزدىڭ پرەزيدەنتى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى ن.نازارباەۆتىڭ توراعالىعىمەن 2014 جىلعى 6 ناۋرىزدا جەدەل-ستراتەگيالىق كەڭەس وتكىزىلگەن ەدى. وسى كەڭەستە مەملەكەت باسشىسى: «بىزدە وفيتسەرلەردى, اسىرەسە, جوعارى قۇرامدى جۇيەلى دايارلاۋ جۇيەسى بولعان جوق. ءبىز ولاردى ۇنەمى شەتەلدە وقىتا المايمىز. مۇنى قازاقستاندا جۇزەگە اسىرۋعا ءتيىسپىز. اسكەري جوعارى وقۋ ورىندارىن زاماناۋي جابدىقتارمەن جابدىقتاۋ, وزگە ەلدەردىكىنەن كەم ەمەس ءوزىمىزدىڭ عىلىمي پەداگوگيكالىق كادرلارىمىزدى دايارلاۋ جۇمىستارىن جالعاستىرۋ قاجەت. بيىل ۇلتتىق قورعانىس ۋنيۆەرسيتەتى ءوز جۇمىسىن باستايدى دەپ ۇمىتتەنەمىن. ونىڭ تۇلەكتەرى قازاقستان ارمياسىنىڭ ماقتانىشىنا اينالۋى ءتيىس», – دەدى.
ۇلتتىق قورعانىس ۋنيۆەرسيتەتى – قازاقستان رەسپۋبليكاسى قورعانىس مينيسترلىگى جانە باسقا دا اسكەرلەر مەن اسكەري قۇرالىمدار جانە ۇقشۇ ەلدەرى ءۇشىن ماگيستراتۋرا جانە دوكتورانت باعدارلاماسى بويىنشا باسقارۋ بۋىندارىنىڭ جەدەل-ستراتەگيالىق جانە جەدەل-تاكتيكالىق, ستراتەگيالىق اسكەري كادرلارىن دايارلايتىن ايرىقشا اسكەري وقۋ ورنى. اتى مەن زاتىنىڭ مازمۇنى مەن ءمانى ەرەكشە ءبىلدىرىپ تۇرعانداي, مۇندا وقىپ, ءبىلىم العان جاندار ناعىز ۇلتتىق قورعانىس ماماندارى بولىپ شىعادى.
اتالعان ۋنيۆەرسيتەت 2002 جىلدىڭ 27 اقپان ايىندا مەملەكەت باسشىسى ن. نازارباەۆتىڭ «قر قارۋلى كۇشتەرىنىڭ اسكەري اكادەمياسى مەملەكەتتىك مەكەمەسىن قايتا قۇرۋ تۋرالى» جارلىعىمەن جانە 2002 جىلعى 2 مامىرداعى «قر قارۋلى كۇشتەرىنىڭ اسكەري-وقۋ ورىندارىندا ۇيىمدىق شارالاردى وتكىزۋ جونىندەگى» قورعانىس ءمينيسترىنىڭ ديرەكتيۆاسىنا ساي كوكشەتاۋ وبلىسىنىڭ ششۋچە قالاسىنان ورىن تەپكەن بولاتىن. سونان پرەزيدەنت ن. نازارباەۆتىڭ 2003 جىلعى 21 تامىزداعى «اسكەري ءبىلىم جۇيەسىن جەتىلدىرۋ جونىندەگى شارالار تۋرالى» جارلىعىنا ساي قر قارۋلى كۇشتەرىنىڭ اسكەري اكادەمياسى «ۇلتتىق قورعانىس ۋنيۆەرسيتەتى» مەملەكەتتىك مەكەمەسىنە اينالدى.
مىنە, وسىلايشا دۇنيەگە كەلگەن ۇلتتىق قورعانىس ۋنيۆەرسيتەتى جوعارى كاسىپتىك ءبىلىم بەرۋ باعدارلاماسى بويىنشا قارۋلى كۇشتەرگە, ەلىمىزدىڭ باسقا دا اسكەرلەر مەن اسكەري قۇرىلىمدارىنا اسكەري جانە مەملەكەتتىك باسقارۋ, اسكەري جانە اكىمشىلىك باسقارۋ, تەحنيكالىق قامتاماسىز ەتۋ, تىلدىق قامتاماسىز ەتۋ, تاربيە جانە الەۋمەتتىك-قۇقىقتىق جۇمىس جانە اسكەري ءبىلىم باسقارماسى ماماندىقتارى بويىنشا وفيتسەرلىك كادرلاردى دايىندايدى.
ۇقشۇ قورعانىس مينيسترلەرى كەڭەسىنىڭ 2005 جىلعى 30 قاراشاداعى شەشىمىنە سايكەس اتالعان ۇلتتىق قورعانىس ۋنيۆەرسيتەتى ۇجىمدىق قورعانىس قاۋىپسىزدىك تۋرالى شارت ۇيىمىنا مۇشە ەلدەردىڭ قارۋلى كۇشتەرى ءۇشىن اسكەري كادرلاردى بىرلەسە دايىندايتىن وقۋ ورىندارىنىڭ تىزىمىنە ەندى.
بۇل تىزىمگە ەنۋدىڭ دە وزىندىك ءمانى بار ەكەنى بەلگىلى. ويتكەنى, ۇلتتىق قورعانىس ۋنيۆەرسيتەتىنىڭ نەگىزگى مىندەتتەرى دە ايرىقشا باسىم ەكەنىن اتاپ وتكەن ءجون. مۇندا نەگىزىنەن ماگيستراتۋرا باعدارلاماسى بويىنشا ستراتەگيالىق, جەدەل-ستراتەگيالىق جانە جەدەل-تاكتيكالىق باسقارۋ بۋىندارى ءۇشىن اسكەري كادرلاردى, دوكتورانتۋرا, ياعني جوعارى وقۋ ورنىنان كەيىنگى باعدارلاما بويىنشا جوعارى دارەجەدەگى عىلىمي جانە وقىتۋشى كادرلارىن, ءاسكەري كادرلاردى قايتا دايىنداۋ مەن بىلىكتىلىكتەرىن كوتەرۋ, ىرگەلى جانە قولدانبالى اسكەري-عىلىمي زەرتتەۋلەردى جۇرگىزۋ باعىتتارى باستى نازارعا الىنعان.
قازاقستان رەسپۋبليكاسى ۇلتتىق قورعانىس ۋنيۆەرسيتەتىندە ءتۇرلى وقىتۋ باعدارلامالارى جۇزەگە اسىرىلادى. سونىڭ ءبىرى رەتىندە باعدار بەرۋ ماگيستراتۋراسىن ايتۋعا بولادى. ونىڭ ءوزىن جەدەل-تاكتيكالىق باسقارۋ بۋىنى جانە ستراتەگيالىق جانە جەدەل-ستراتەگيالىق باسقارۋ بۋىنى دەپ ەكىگە بولەدى. جەدەل-تاكتيكالىق باسقارۋ بۋىنىنا: اسكەري جانە اكىمشىلىك باسقارۋ: تەحنيكالىق قامتاماسىز ەتۋ باسقارماسى; تىلدىق قامتاماسىز ەتۋ باسقارماسى; تاربيە جانە الەۋمەتتىك-قۇقىقتىق ۇدەرىستەر باسقارماسى; ءىىم ۇلتتىق گۆاردياسىنىڭ اسكەري جانە اكىمشىلىك باسقارماسى جاتادى. بۇلاردىڭ ءبارىن اسكەريلەردىڭ ءبىلىم الۋداعى باعدار بەرۋ ماگيستراتۋراسى دەپ اتايدى.
اسكەري مامانداردى دايىنداۋدا, وقىتۋدا, اسكەري كادرلاردى قايتا دايارلاۋدا (اديۋنكتۋرا) جوعارى وقۋ ورىندارىنان كەيىنگى كاسىپتىك ءبىلىم بويىنشا دا دايارلىق جۇرگىزىلەدى. اتالعان اديۋنكتۋرانىڭ مىندەتى – قازاقستان رەسپۋبليكاسىنىڭ قارۋلى كۇشتەرى, باسقا دا اسكەرلەر مەن اسكەري قۇرىلىمدار ءۇشىن عىلىمي-پەداگوگيكالىق جانە عىلىمي جوعارى بىلىكتى كادرلاردى دايىنداۋ بولىپ تابىلادى.
2005 جىلدان باستاپ قازاقستاننىڭ ازاماتتارىمەن قاتار اسكەري وقۋ ورنىندا قىرعىزستان مەن تاجىكستاننىڭ وفيتسەرلەرى دە ءبىلىم الادى. ەكى جىلعا وقۋعا كەلگەن بۇل جاقىن شەتەل ازاماتتارىنا جانە ولاردىڭ وتباسى مۇشەلەرىنە دە بارلىق قاجەتتى جاعداي جاسالعان. 2006 جىلدان باستاپ حالىقارالىق ءبىلىم بەرۋ ستاندارتتارىنا سايكەس ۋنيۆەرسيتەت قازاقستاننىڭ اسكەري ءبىلىم بەرۋ جۇيەسىندە العاشقىلاردىڭ ءبىرى بولىپ كرەديتتىك ءبىلىم بەرۋ جۇيەسىنە كوشىپ, ءبىلىم بەرۋ باعدارلاماسىن جانە زەرتتەۋ جۇمىسىن تابىستى يگەرگەن تۇلەكتەرىنە «ماگيستر» اكادەميالىق دارەجەسىن بەرە باستادى. بۇل ۋنيۆەرسيتەتىمىزدىڭ ۇلكەن جەتىستىگى دەپ بىلەمىز. سونىمەن قاتار, جوعارى اسكەري ءبىلىمنىڭ ءاربىر دەڭگەيىندە اسكەري كادرلاردىڭ بىلىكتىلىگىن ارتتىرۋدى دا وسى ءبىلىم ورداسى جۇزەگە اسىرادى.
2008-ءشى جىل ۇلتتىق قورعانىس ۋنيۆەرسيتەتى ءۇشىن ماڭىزدى بولىپ ەسەپتەلەدى, سەبەبى, وسى جىلى قازاقستان رەسپۋبليكاسى ءبىلىم جانە عىلىم مينيسترلىگىنىڭ شەشىمىمەن ۋنيۆەرسيتەت جانىنان العاش رەت حالىقارالىق دارەجەسى بار دوكتورلىق ديسسەرتاتسيالىق كەڭەس قۇرىلدى. 2011 جىلى ەلىمىزدىڭ ۇلتتىق قورعانىس ۋنيۆەرسيتەتىندە رەسەي فەدەراتسياسى قارۋلى كۇشتەرى باس شتابى اكادەمياسىنا ۇقساس – جەدەل-ستراتەگيالىق باسقارۋشى بۋىن ماماندارىن دايارلاۋ ءۇشىن اسكەري جانە مەملەكەتتىك باسقارۋ فاكۋلتەتى اشىلدى.
وسى جىلى عىلىمي كادرلاردى دايىنداۋ ماقساتىندا «اسكەري ءىس جانە قاۋىپسىزدىك» ماماندىعى بويىنشا عىلىمي جانە پەداگوگيكالىق كادرلاردى دايارلايتىن جوعارى وقۋ ورىندارىنان كەيىنگى كاسىپتىك تانىمدىق باعدارلاما بولىپ تابىلاتىن دوكتورانتۋرا اشىلدى. ەندى اللا قوسسا ءۇش تانىمدى باعدارلاما بويىنشا: اسكەري ونەر, قارۋلانۋ جانە اسكەري تەحنيكا, اسكەري تاريح وقۋىن ءتامامداعان مامانداردىڭ العاشقى لەگىنىڭ ومىرگە جولداما الۋى جوسپارلانىپ وتىر.
مۇندا اسكەريلەر ءۇشىن جانە جالپى اسكەري ءومىردى ۇناتاتىن جاستار ءۇشىن ءبىلىمنىڭ ءنارلى تەرەڭىنەن سۋسىنداپ, عىلىمنىڭ نەبىر تۇرىمەن اينالىسۋىنا كوپ مۇمكىندىك بار. وسى عىلىمي جۇمىستاردىڭ نەگىزگى باعىتتارى مەن مىندەتتەرى تۋرالى ايتقاندا اسكەري ونەر ماسەلەلەرىن زەرتتەۋ, اسكەري تاربيە مەن وقىتۋ ماسەلەلەرى, سوعىس جانە اسكەري ونەر تاريحى, باسقا دا سالالار بويىنشا اسكەري-ارنايى زەرتتەۋلەر جونىندە قۇلاعدار ەتكەن ءجون دەيمىز.
ۇلتتىق قورعانىس ۋنيۆەرسيتەتىنىڭ پروفەسسورلىق-وقىتۋشىلار قۇرامى الىس جانە جاقىن شەتەلدەردەن كەلگەن وقىتۋشىلار جانە ءوز ەلىمىزدىڭ دوكتورلارى مەن عىلىم كانديداتتارى. ۋنيۆەرسيتەتتە 10 عىلىم دوكتورى, 30 عىلىم كانديداتى, 30 اكادەميالىق دارەجەدەگى «ماگيستر» بار. ۇلتتىق قورعانىس ۋنيۆەرسيتەتىنىڭ عالىمدارى رەسەي فەدەراتسياسى, بەلارۋس رەسپۋبليكاسى, قىرعىز رەسپۋبليكاسى, تاجىكستان رەسپۋبليكاسى, امەريكا قۇراما شتاتتارى عالىمدارىمەن بىرلەسىپ مەملەكەتتىڭ اسكەري قاۋىپسىزدىگىن قامتاماسىز ەتۋ ماسەلەلەرى بويىنشا حالىقارالىق عىلىمي كونفەرەنتسيالار مەن سەمينارلارعا قاتىسسا, قازىرگى ۋاقىتتا عىلىمي-تەحنيكالىق ىنتىماقتاستىق اياسىندا بىرلەسكەن پەرسپەكتيۆالىق عىلىمي جوبالاردى جۇزەگە اسىرۋدا.
وقۋ ورنىنىڭ قۇرىلعان كۇنىنەن باستاپ تمد ەلدەرىندە دە, الىس شەتەلدەردە دە ابىرويى مەن بەدەلى ارتا تۇسۋدە. ۋنيۆەرسيتەتتە ساپارمەن بولعان تمد ەلدەرىنىڭ جوعارى اسكەري باسشىلارى, قىتاي, اقش, گەرمانيا, تۇركيا, ءۇندىستان, پاكىستان, يوردانيا جانە رۋمىنيادان كەلگەن اسكەري دەلەگاتسيالار پروفەسسورلىق-وقىتۋشىلار قۇرامى مەن تىڭداۋشىلار قۇرامىنىڭ كاسىبي دايىندىعى دەڭگەيىن جوعارى باعالادى. شەت مەملەكەتتەر قارۋلى كۇشتەرى وكىلدەرىنىڭ ۋنيۆەرسيتەت جەكە قۇرامىمەن كەزدەسۋلەرى ىنتىماقتاستىقتىڭ دامۋىنا زور ىقپالىن تيگىزەدى, اسكەري كادرلاردى دايىنداۋ ءۇردىسى ساپاسىن ءوزارا ارتتىرۋعا, سەنىمدى نىعايتۋعا ۇلكەن مۇمكىندىكتەر بەرەدى.
ۇلتتىق قورعانىس ۋنيۆەرسيتەتىنىڭ حالىقارالىق ىنتىماقتاستىعى قازاقستاننىڭ ناتو-مەن سەرىكتەستىك ماقساتتارى شەڭبەرىندە, ۇجىمدىق قاۋىپسىزدىك شارتى ۇيىمىنا مۇشە-مەملەكەتتەرمەن ءوزارا ارەكەتتەسۋدىڭ كوپباعىتتى نەگىزىندە, تاۋەلسىز مەملەكەتتەر دوستاستىعى ەلدەرىمەن ءوزارا ارەكەتتەسۋ نەگىزىندە, «بەيبىتشىلىك جولىنداعى سەرىكتەستىك» باعدارلاماسى بويىنشا جانە ت.ب. باعدارلامالاردىڭ نەگىزىندە جۇزەگە اسىرىلادى. ال اسكەري وقۋ ورىندارىنداعى ءبىلىم بەرۋدى زامان تالابىنا ساي جۇرگىزۋ ىسىندە ەل پرەزيدەنتى بەكىتكەن 2011-2020 جىلدارعا ارنالعان مەملەكەتتىك ءبىلىم باعدارلاماسىنىڭ ورنى ەرەكشە.
ۋنيۆەرسيتەتتىڭ پروفەسسورلىق-وقىتۋشىلىق قۇرامى جۇيەلى نەگىزدە, سونىڭ ىشىندە شەتەلدىك جوعارى وقۋ ورىندارىندا دا بىلىكتىلىكتى ارتتىرۋدان وتەدى. جاڭا جاسالىمدارعا ساي 10 يننوۆاتسيالىق پاتەنت الىندى. سوڭعى جىلدارى (2010-2013 جىلدارى) وقىتۋ ۇدەرىستەرىن عىلىمي-تەحنيكالىق ادىستەمەلەرمەن قامتاماسىز ەتۋ ماقساتىندا 4 مونوگرافيا, 51 وقىتۋ جانە وقۋ قۇرالدارى شىعارىلدى.
قۇرىلىپ, جۇمىس ىستەپ كەلە جاتقالى بەرى ۇلتتىق قورعانىس ۋنيۆەرسيتەتىن 1000 اسا تىڭداۋشىلار ءبىتىردى, ولاردىڭ ىشىندە ۇقشۇ-عا قاتىسۋشى-ەلدەردىڭ اسكەري قىزمەتشىلەرى دە بار. ال ەندى ۇستىمىزدەگى جىلى 91 تىڭداۋشى اسكەري جانە اكىمشىلىك باسقارۋ, اسكەري جانە مەملەكەتتىك باسقارۋ, ۇقشۇ اسكەري جانە اكىمشىلىك باسقارۋ, قازاقستان رەسپۋبليكاسى ىشكى ىستەر مينيسترلىگىنىڭ ۇلتتىق گۆاردياسىنىڭ اسكەري جانە اكىمشىلىك باسقارۋ, ارنايى فاكۋلتەتتىڭ اسكەري جانە اكىمشىلىك باسقارۋ, تەحنيكالىق قامتاماسىز ەتۋدى باسقارۋ, تاربيە جانە الەۋمەتتىك-قۇقىقتىق ۇدەرىستەر باسقارماسىنىڭ تىلدىق قامتاماسىز ەتۋ جانە اسكەري ءبىلىم بەرۋ ءىسى بويىنشا ءبىتىرىپ شىقپاقشى. ۇلتتىق قورعانىس ۋنيۆەرسيتەتىندە, سونداي-اق, بەيىمدىك جانە عىلىمي-پەداگوگيكالىق ماگيسترانت جانە عىلىمي-پەداگوگيكالىق دوكتورانت ماماندارىن دايىنداۋ دا جۇزەگە اسىرىلادى.
قازاقستان رەسپۋبليكاسىنىڭ پرەزيدەنتى – قارۋلى كۇشتەردىڭ جوعارعى باس قولباسشىسى نۇرسۇلتان نازارباەۆتىڭ جارلىعىمەن 2008 جىلدان بەرى استانا قالاسىندا ۇلتتىق قورعانىس ۋنيۆەرسيتەتىن سالۋ جونىندەگى ينۆەستيتسيالىق جوبانى جۇزەگە اسىرۋ جۇرگىزىلىپ كەلەدى. اتالعان نىساننىڭ كەشەنى 20 گەكتار جەردى الىپ جاتىر, وندا 107 185 شارشى مەترگە 16 عيمارات تۇرعىزىلىپ, تۇرعىن ۇيلەر دە قامتىلعان. قازىرگى كۇنى جالپى 63 000 شارشى مەتر نىسانداردىڭ قۇرىلىسى اياقتالدى. ونىڭ ىشىنە 5 وقۋ كورپۋسى, اكىمشىلىك كورپۋسى جانە 306 پاتەرلىك جاتاقحانا كىرەدى.
ۋنيۆەرسيتەتتىڭ جاڭا عيماراتى ەلوردادا «نازارباەۆ ۋنيۆەرسيتەتپەن» قاتارلاسا ورنالاسقان. ەندى بۇدان بىلاي عىلىم سالاسى مەن كادرلاردى دايىنداۋ بارىسىندا قوس كوشباستاۋشى جوعارى وقۋ ورىندارىن ءوزارا ىقپالداستىرا جۇرگىزۋ جوسپارلانىپ وتىر. ۋنيۆەرسيتەتتىڭ جاڭا كەشەنى وقىتۋدىڭ زاماناۋي قۇرالدارىمەن قامتىلعان التى كورپۋستان تۇرادى. بۇلاردىڭ قاتارىنا توپتىق جانە دارىستىك اۋديتوريالار, كومپيۋتەرلىك سىنىپتار, لينگافون كابينەتتەرى, كونفەرەنتسيا وتكىزەتىن زالدار, 200 ورىندىق كينوزال قوسىلادى. ۇقساستىرۋ ۇلگىسىنىڭ ورتالىعى بولجامدى جاۋمەن ۇرىس جۇرگىزۋگە, ءتۇرلى جاتتىعۋلاردى وتكىزۋگە مۇمكىندىك بەرەدى. ال ۋنيۆەرسيتەتتىڭ كىتاپحانا قورى عىلىمي, وقۋ, كوركەم جانە قۇپيا قۇرالداردى العا تارتادى. مۇندا 75 مىڭ ءتۇرلى كىتاپ قورى بار.
دەمەك, ۇلتتىق قورعانىس ۋنيۆەرسيتەتى تۋرالى جوعارىداعى مالىمەتتەردى اشىق ايتا وتىرىپ, ونىڭ ورتالىق ازيا بويىنشا ماگيسترانت جانە دوكتورانت باعدارلاماسى بويىنشا اسكەري كادرلاردى دايىنداۋداعى جالعىز ءارى بىرەگەي وقۋ ورنى بولىپ تابىلاتىندىعىنا كوزىمىز جەتەدى. ال ۋنيۆەرسيتەتتىڭ استانا قالاسىنا تابان تىرەۋى پروفەسسورلىق-وقىتۋشىلىق قۇرامنىڭ جوعارى بىلىكتى كادرلارمەن تولىعا تۇسۋىنە جانە اسكەري ءىستى زەرتتەۋ مەن يگەرۋدە جوعارى ناتيجەلەرگە قول جەتكىزۋگە كومەگىن تيگىزەتىنى ءسوزسىز. سول سياقتى ۋنيۆەرسيتەتتىڭ قازىرگى زاماننىڭ تالابىنا ساي جابدىقتالعان جاڭا اسكەري-عىلىمي زەرتحاناسى اسكەري سالادا تابىستى عىلىمي-زەرتتەۋلەر ءجۇرگىزۋگە جول اشادى دەگەن سەنىم بار. ال ۋنيۆەرسيتەت قۇرىلىسى كەشەنى 2016 جىلى تولىقتاي اياقتالادى دەپ كۇتىلۋدە. ەندەشە, استانادا بوي كوتەرگەن ۇلتتىق قورعانىس ۋنيۆەرسيتەتى قازىردىڭ وزىندە-اق ۇلتىمىزدىڭ بولاشاعى مەن ماقتانىشىنا اينالىپ ۇلگەردى.
الەكساندر تاسبولاتوۆ,
«ەگەمەن قازاقستان».