سەنات توراعاسى ماۋلەن اشىمباەۆ الماتى وبلىسى ءماسليحاتىنىڭ دەپۋتاتتارىمەن كەزدەسىپ, مەملەكەت باسشىسىنىڭ تاپسىرمالارىنان تۋىنداعان مىندەتتەردى تالقىلادى.
كەزدەسۋدە سەناتتىڭ ماسليحاتتارمەن ءوزارا ءىس-قيمىلىنىڭ جاڭا فورماتى جونىندە دە ءسوز قوزعالدى. ءوز سوزىندە پالاتا سپيكەرى قازاقستاننىڭ الەۋمەتتىك-ەكونوميكالىق دامۋ ماسەلەلەرى جونىندەگى كەڭەستە ەل پرەزيدەنتى جۇكتەگەن مىندەتتەردى ساپالى ءارى جەدەل ىسكە اسىرۋ قاجەت ەكەنىن ايتتى. سونداي-اق ماۋلەن اشىمباەۆ سەنات وڭىرلەردىڭ مۇددەسىن قورعايتىن پالاتا ەكەنىن اتاپ ءوتىپ, الداعى ۋاقىتتا دا ماسليحاتتارمەن بايلانىس كۇشەيە تۇسەتىنىن جەتكىزدى.
ء«ار وڭىردە وزىنە ءتان وزەكتى ماسەلەلەر بار. ولاردىڭ باسىم كوپشىلىگى, پرەزيدەنتىمىز اتاپ كورسەتكەندەي, ينفراقۇرىلىمعا, الەۋمەتتىك نىساندارعا, مەملەكەتتىك باعدارلامالاردىڭ ىسكە اسىرىلۋىنا قاتىستى. سەنات دەپۋتاتتارى وسى ماسەلەلەردى ورتالىق دەڭگەيدە جۇيەلى تۇردە كوتەرىپ, ولاردىڭ وڭ شەشىلۋىنە ىقپال ەتەدى. بىلتىر پارلامەنت 86 زاڭ قابىلدادى. ولاردىڭ 13-ىنە دەپۋتاتتاردىڭ وزدەرى باستاماشى بولدى. قابىلدانعان زاڭداردىڭ ءبارى ەلدىڭ دامۋىنا جانە حالىقتىڭ ءومىر ءسۇرۋ ساپاسىن ارتتىرۋعا باعىتتالعان. بۇگىندە پرەزيدەنتىمىز بەكىتكەن ون ۇلتتىق جوبا ىسكە اسىرىلۋدا. ونىڭ ءبارى – وڭىرلەرگە تىكەلەي قاتىسى بار قۇجاتتار», دەگەن ماۋلەن اشىمباەۆ جيىنعا قاتىسۋشىلاردى مەملەكەت باسشىسى جۇكتەگەن مىندەتتەردى ىسكە اسىرۋ جولىندا جۇدىرىقتاي جۇمىلۋعا شاقىردى.
سەنات سپيكەرى بۇگىندە ەلىمىزدە جەرگىلىكتى مەملەكەتتىك باسقارۋ جانە ءوزىن ءوزى باسقارۋ جۇيەسىن دامىتۋ باعىتىندا اۋقىمدى جۇمىس اتقارىلىپ جاتقانىن, سونىڭ بارىسىندا ءماسليحاتتاردىڭ ءرولىن ارتتىرۋ دا ماڭىزدى قادام ەكەنىن ايتتى. ماۋلەن اشىمباەۆ قازىردىڭ وزىندە قولدانىستاعى زاڭنامالارعا بىرقاتار مەملەكەتتىك فۋنكتسيانى ورتالىقتان وڭىرلەرگە بەرەتىن ءتيىستى تۇزەتۋلەر ەنگىزىلگەنىنە نازار اۋداردى. الداعى ايلاردا وسى باعىتتا تاعى ءبىراز جاڭا نورمالار قابىلدانادى.
«بۇگىندە پرەزيدەنتىمىز باسقارۋ جۇيەسىن ورتالىقسىزداندىرۋ ماسەلەسىنە ۇلكەن ءمان بەرىپ وتىر. وسى ماقساتتى جۇزەگە اسىرۋ ءۇشىن جۋىردا اكىمشىلىك رەفورمالار بويىنشا بىرقاتار زاڭعا وزگەرىستەر مەن تولىقتىرۋلار ەنگىزىلدى. ناتيجەسىندە, ۇكىمەتتىڭ ءبىراز فۋنكتسياسى ورتالىق مەملەكەتتىك ورگاندارعا بەرىلدى. اكىمشىلىك رەفورمانىڭ كەلەسى كەزەڭىندە بىرقاتار قۇزىرەت جەرگىلىكتى بيلىك ورگاندارىنا بەرىلۋگە ءتيىس. وسىعان قاتىستى ءتيىستى زاڭداردى الداعى ايلاردا قابىلداۋدى جوسپارلاپ وتىرمىز. جالپى, اكىمشىلىك وزگەرىستەردىڭ جاڭا كەزەڭى جەرگىلىكتى وكىلدى ورگانداردىڭ قۇزىرەتىن كەڭەيتۋگە جول اشادى دەپ سەنەمىز», دەدى ماۋلەن اشىمباەۆ.
سەنات توراعاسى م.اشىمباەۆتىڭ ءماسليحات دەپۋتاتتارىمەن كەزدەسۋىندە الماتى وبلىسىنىڭ اكىمى مارات سۇلتانعازيەۆ ءوڭىردىڭ الەۋمەتتىك-ەكونوميكالىق باعىت-باعدارى جونىندە باياندادى.
«اكىمشىلىك ورتالىقتىڭ اۋداندارعا جاقىنداي ءتۇسۋى – وبلىستىڭ اۋماقتارىن تەڭگەرىمدى دامىتۋعا مول مۇمكىندىك بەرىپ وتىر. ماياتنيكتىك كوشى-قوندى تومەندەتىپ, ۇلكەن ەكونوميكالىق ءوسىم بەرەتىن ءىرى جوبالار باستاۋ الدى. ەڭ الدىمەن, الماتى جانە قوناەۆ قالالارىنىڭ اراسىندا «G4 City» ارنايى ەكونوميكالىق ايماعى قۇرىلدى. بىرەگەي جوبا كەلەشەكتە 3,7 ترلن تەڭگە ينۆەستيتسيا تارتۋدى كوزدەيدى. ەكىنشىدەن, الماتى قالاسىنىڭ ماڭىندا جالپى الاڭى 1,5 مىڭ گەكتار بولاتىن 4 يندۋستريالىق ايماق قۇرۋدامىز. ول جەردە ءتۇرلى سالالارداعى پەرسپەكتيۆالىق جوبالاردى ورنالاستىرۋ قاراستىرىلعان. ۇشىنشىدەن, مەگاپوليستىڭ اينالا ورنالاسقان 183 مىڭ ادام تۇراتىن 674 ساياجايلار ماسەلەسىن كەزەڭ-كەزەڭمەن شەشۋ باستالدى. اتاپ ايتقاندا, ەلدى مەكەندەردىڭ باس جوسپارلارىنا تۇزەتۋ ەنگىزىلىپ, ولاردىڭ قۇرامىنا 270 ساياجاي ءماسسيۆى قوسىلادى. تورتىنشىدەن, وبلىس ورتالىعى – قوناەۆ قالاسىن دامۋدىڭ جاڭا نۇكتەسىنە اينالدىرۋ ماقساتىندا ءتيىستى جۇمىستار اتقارىلىپ كەلەدى», دەگەن وبلىس اكىمى قوناەۆ قالاسىنان عىلىم مەن ءبىلىم مينيسترلىگىمەن بىرلەسىپ, اكادەميالىق قالاشىق قۇرۋدىڭ جول كارتاسى قابىلدانعاندىعىن, الداعى مامىر ايىندا قالانىڭ باس جوسپارى بەكىتىلەتىنىن مالىمدەدى.
سونىمەن قاتار ساپار بارىسىندا سەنات توراعاسى الماتى وبلىسىنىڭ بەلسەندى جاستارىمەن كەزدەستى. ول جاس ساياساتكەرلەردىڭ جاڭا بۋىنى پرەزيدەنتىمىز بەلگىلەپ بەرگەن ادىلەتتى قازاقستان قۇرۋ باعدارىن ءارى قاراي جالعاستىراتىنىنا سەنىم ءبىلدىردى.
«وزدەرىڭىزگە بەلگىلى, 2019 جانە 2020 جىلدارى جاستار جانە ۆولونتەرلەر جىلى بولىپ جاريالاندى. بىلىكتى جاستاردى ەلدىك ىستەرگە تارتۋ ءۇشىن پرەزيدەنتتىك جاستار كادرلىق رەزەرۆى قۇرىلدى. مەملەكەت قاشاندا سىزدەردىڭ وي-پىكىرلەرىڭىز بەن ۇسىنىستارىڭىزدى تىڭداۋعا دايىن. سەنات جانىنداعى جاس ساراپشىلار كلۋبى مەن تالداۋ مەكتەبىنىڭ دە نەگىزگى ماقساتتارىنىڭ ءبىرى وسى. سىزدەردى اتالعان جوبالارعا بەلسەندى قاتىسۋعا شاقىرامىز», دەگەن پالاتا سپيكەرى ءار ادام ءوز بويىندا دۇرىس قۇندىلىقتاردى قالىپتاستىرۋ ءۇشىن تەرەڭ ءبىلىم مەن كاسىبي قابىلەت قاجەت ەكەنىن ايتتى.
سەنات توراعاسى ساپار قورىتىندىسىندا «شاراپات» ارناۋلى الەۋمەتتىك قىزمەت كورسەتۋ ورتالىعىنىڭ ۇجىمىمەن كەزدەستى.
الماتى وبلىسى