درون يەلەرىنە ارنالعان ارنا

ەندى «Dronekazakhstan» ارناسى ۇشقىشسىز ۇشۋ اپپارات يەلەرىنە ەلىمىزدەگى اۋە كەڭىستىگىن پايدالانۋ بويىنشا كەڭەس بەرىپ, ءتيىستى زاڭ ماسەلەلەرىنە باي­لانىستى جاردەم كورسەتەدى. سونداي-اق سالالىق نورماتيۆتىك اكتىلەردەگى وزگەرىستەر مەن ۇشۋ جونىندەگى شەكتەۋلەر تۋرالى حا­باردار ەتىپ وتىرادى. Telegram-داعى ارنانى يندۋستريا جانە ينفراقۇرىلىمدىق دامۋ مينيسترلىگىنىڭ ازاماتتىق اۆياتسيا كوميتەتى ەلىمىزدەگى اۆياتسيا اكىمشىلىگىمەن بىرلەسىپ اشقان.

«Dronekazakhstan» ۇشقىشسىز ۇشۋ اپپاراتىن قولدانىپ جۇرگەن بارلىق ازاماتقا پايدالى بولماق. ويتكەنى مۇندا قاجەتتى مالىمەتتەر مەن تۇسىنىكتەمەلەر, سونداي-اق وسى اپپاراتتاردىڭ قولدانىلۋىن رەتتەيتىن نورماتيۆتىك-قۇقىقتىق اكتىلەردەگى وزگەرىستەر تۋرالى اقپارات جاريالانادى. بۇدان بولەك, ەلىمىزدىڭ اۆياتسيالىق بيلىك ورىندارى بۇل ارقىلى درون يەلەرىن ۇشۋعا تىيىم سالىنعان ايماقتار بويىنشا ۇيلەستىرىپ, وڭىرلەردە وتەتىن اۋقىمدى ءىس-شارالاردىڭ جوسپارىنا بايلانىستى ۋاقىتشا شەكتەۋلەردى قۇلاعدار ەتەدى. ۇشقىشسىز ۇشۋ اپپاراتىن قولداناتىن ازاماتتار ارناعا وزدەرىن تولعاندىرعان سۇراقتاردى جولداپ, قۇزىرلى ورگاندار تاراپىنان جاۋاپ الادى.

ء«بىز اتالعان ارنانى ۇشقىشسىز ۇشۋ اپپاراتىمەن جۇمىس ىستەيتىن جەكە جانە زاڭدى تۇلعالارمەن ءوزارا ءىس-قيمىل جاساۋ ءۇشىن قۇرىپ وتىر­مىز. وزەكتى ماسەلەلەردى اشىق تالقىلاۋعا دايىنبىز. مۇندا بارلىق سۇراقتى قويۋعا بولادى. وعان ازاماتتىق اۆياتسيا كومي­تەتى مەن ەلىمىزدەگى اۆياتسيا اكىم­شىلىگىنىڭ قىزمەتكەرلەرى جاۋاپ بەرۋگە دايىن», دەيدى ارنا اۆتورلارى.

سونداي-اق جوبا جەتەكشىلەرى جاڭا ارنانىڭ جۇمىسىندا قانداي دا ءبىر كەمشىلىكتەر تۋىنداعان جاعدايدا وعان تۇسىنىستىكپەن قا­راۋعا شاقىردى. قازىردىڭ وزىندە اتالعان ارنادا ۇشۋعا تىيىم سالىنعان ايماقتاردىڭ ءتىزىمى, ۇشقىشسىز ۇشۋ اپپاراتىن ەلىمىزدىڭ اۋە كەڭىستىگىندە پايدالانۋدى رەتتەپ, ەسەپكە قويۋ مەن نورماتيۆتىك قۇقىقتىق اكتىلەرگە قاتىستى ەرەجەلەر ور­نا­لاس­تىرىلعان. سونىمەن قا­تار ماق­ساتتى اۋديتورياعا «قازاەروناۆيگاتسيا» سايتىن پايدالانا وتىرىپ, ينتەرنەت پەن v3.0 تەلە­فون بايلانىسى ارقىلى ۇشۋ جوسپارلارىن ۇسىنۋدىڭ ءتارتىبى ءتۇسىندىرىلدى.