حالىقارالىق فۋتبول فەدەراتسيالارى قاۋىمداستىعىنىڭ باسشىسى (فيفا) دجانني ينفانتينو استاناعا ارنايى كەلەدى. بۇل تۋرالى قازاقستان فۋتبول فەدەراتسياسىنىڭ ءباسپاسوز قىزمەتى حابارلادى.
رەسمي ساپار 3 مامىرعا جوسپارلانعان. بىلتىر كۇزدە قفف پرەزيدەنتى ادىلەت بارمەنقۇلوۆ پەن فيفا باسشىسى دجانني ينفانتينو فرانتسيا استاناسى پاريجدە كەزدەسۋ وتكىزىپ, فۋتبولدى دامىتۋدى كەڭىنەن ناسيحاتتاپ, دايىندىق جۇيەسى مەن جارىستاردى ۇيىمداستىرۋ, سونىمەن قاتار قازاقستاندا فۋتبول ينفراقۇرىلىمىن جاقسارتۋ ماسەلەلەرىن تالقىلاعان ەدى.
حالىقارالىق فۋتبول فەدەراتسيالارى قاۋىمداستىعى باسشىسىنىڭ قازاقستانعا ساپارى اياسىندا ەل اۋماعىندا فيفا قىزمەتىن دامىتۋ بويىنشا حالىقارالىق ءىس-شارالاردى ۇيىمداستىرۋ ماسەلەلەرى تالقىلانىپ, سونىمەن قاتار ورتالىق ازيا فۋتبول قاۋىمداستىقتارى اراسىندا ىنتىماقتاستىقتى ارتتىرۋ ماسەلەلەرى قاراستىرىلماق. بۇل دجانني ينفانتينونىڭ حالىقارالىق فۋتبول فەدەراتسياسىنىڭ باسشىسى رەتىندەگى قازاقستانعا العاشقى ساپارى بولماق.