پيرەنەي تۇبەگىندە تەننيستەن «ماستەرس» ساناتىنداعى «WTA 1000» ءتۋرنيرى باستالدى. مادريدتەگى دوداعا الەمنىڭ ەڭ ۇزدىك تەننيسشىلەرىمەن قاتار ەلىمىزدىڭ دە مىقتىلارى قاتىسىپ جاتىر.
جەرلەستەرىمىزدەن ءبىرىنشى بولىپ ءتۋرنيردىڭ شىمىلدىعىن الەمنىڭ 51-راكەتكاسى يۋليا پۋتينتسەۆا اشىپ بەردى. وتانداسىمىز مادريدتەگى جارىستىڭ باستاپقى كەزدەسۋىن دۇنيەجۇزىلىك رەيتينگتە وزىنەن ءتورت ساتى تومەن تۇرعان امەريكالىق كلەر ليۋمەن وتكىزىپ, ەكى سەتكە جالعاسقان ماتچتا 6:4, 6:4 ەسەبىمەن جەڭىسكە جەتتى. ەكى تەننيسشى بۇعان دەيىن قاڭتار ايىندا اۋستراليانىڭ حوبارت قالاسىندا ۇيىمداستىرىلعان ءتۋرنيردىڭ 1/16 فينالىندا كەزدەسىپ, ول كەزدە دە باسەكە پۋتينتسەۆانىڭ ايقىن جەڭىسىمەن اياقتالعان – 6:2, 6:4.
ەندى يۋليا جۇلدە قورى 7,7 ملن ەۋرودان اساتىن ءتۋرنيردىڭ ءۇشىنشى اينالىمىنا شىعۋ ءۇشىن الەمنىڭ 5-راكەتكاسى فرانتسيالىق كارولين گارسيامەن كەزدەسەدى. تەننيسشىلەر كورتتا ءبىر-بىرىمەن ەكى رەت كەزدەسىپ, ەكەۋىندە دە جەرلەسىمىزدىڭ مەرەيى ۇستەم بولعان. ءبىر قىزىعى, پۋتينتسەۆا مەن گارسيا سوڭعى رەت 2014 جىلى شەبەرلىك بايقاسقان ەكەن.
وكىنىشكە قاراي, ەرلەر اراسىنداعى باسەكەنىڭ ىرىكتەۋىنە قاتىسقان تيموفەي سكاتوۆ نەگىزگى كەزەڭگە شىعا المادى. ول يتاليالىق ماركو چەككيناتودان جەڭىلىپ قالدى – 6:3, 2:6, 3:6. ال كەشە الەكساندر بۋبليك كولۋمبيالىق دانيەل ەلاحي گالانمەن شەبەرلىك بايقاستى.