الماتى وبلىسىندا حالىق سانى 1,5 ملن بولسا, سونىڭ ىشىندە جۇمىسسىز جۇرگەندەر 4,8 پايىزدى قۇرايدى. وڭىردە, اسىرەسە, جاستار اراسىندا جۇمىسسىزدىق بەلەڭ الۋدا. ولاردىڭ پايىزدىق كورسەتكىشتەرى – 3,9. ال جوعارى ءبىلىم الماعان, سونداي-اق ەش جەردە جۇمىس ىستەمەيتىن NEET ساناتىنداعى جاستاردىڭ ۇلەسى 7,3 پايىزعا جەتىپ وتىر. بۇل, وكىنىشكە قاراي, رەسپۋبليكاداعى ەڭ جوعارعى كورسەتكىش.
ايماقتاعى جۇمىسسىزدىقپەن كۇرەس قارقىندى. پرەزيدەنتتىڭ تاپسىرماسىنا سايكەس, قازىرگى كەزدە 2,5 پايىزدىق مولشەرلەمەمەن شاعىن نەسيە بەرۋ ءىسى جولعا قويىلدى. اتالعان قولداۋعا وبلىستاعى 21-35 جاس ارالىعىنداعى تۇرعىندار يە بولا الادى. وسىعان وراي, وڭىردە 375 جاس شاعىن نەسيە الماق نيەتتە.
ءتۇرلى باعىتتاعى بيزنەس باستاۋ ءۇشىن 5 ملن تەڭگە كولەمىندە نەسيە بەرىلەدى. باستى شارت, كەپىلگە قوياتىن م ۇلىك بولۋعا ءتيىس. الماتى وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ايگۇل احمەتوۆانىڭ ايتۋىنشا, نەسيەگە 41 ادام ءوتىنىم بەرگەن, ولاردىڭ 35-ءنىڭ قۇجاتتارى ماقۇلدانعان. قالعان جاستاردىڭ كەپىلدىك قۇجاتتارى تالاپقا ساي بولماي شىققان. سونىمەن قاتار باسقارما باسشىسى شاعىن نەسيە راسىمدەۋدە جاستاردىڭ بەلسەندىلىگى تومەن ەكەنىن العا تارتتى.
«وكىنىشكە قاراي, بىزدە جاستاردىڭ بەلسەندىلىگى تومەن. بۇل ناسيحات جۇمىستارىنىڭ باياۋ جۇرۋىمەن دە بايلانىستى شىعار. قازىرگى تاڭدا ءبىز بولىنگەن 2 ملرد تەڭگە قاراجاتتى 375 ادامعا نەسيە رەتىندە بەرۋدى جوسپارلاپ وتىرمىز. ەگەر دە, ءوتىنىم بەرۋشى جاستار سانى ارتىپ جاتسا, ۇكىمەتتەن قوسىمشا قارجى سۇرايمىز», دەيدى وبلىستىق جۇمىسپەن قامتۋ باسقارماسىنىڭ باسشىسى ايگۇل احمەتوۆا.
الماتى وبلىسى