كەشە ۇكىمەت ۇيىندە پرەمەر-مينيستردىڭ ورىنباسارى – قارجى مينيسترى باقىت سۇلتانوۆ پەن شۆەيتساريانىڭ فەدەرالدىق كەڭەسشىسى, فەدەرالدىق قارجى مينيسترلىگىنىڭ باسشىسى ەۆەلين ۆيدمەر-ءشليۋمپفتىڭ قول قويۋىمەن ءوزارا تۇسىنىستىك مەموراندۋمى بەكىتىلدى.
شۆەيتساريا مينيسترلىگىنىڭ باسشىسى ەلىمىزگە ەكى كۇندىك ساپارمەن كەلىپ وتىر. ول ۇكىمەت باسشىسىنىڭ ورىنباسارىمەن كەزدەسۋ بارىسىندا الەمدىك ەكونوميكالىق داعدارىس كەزەڭىندەگى قازاقستاننىڭ داعدارىستى ەڭسەرۋ شارالارىمەن تانىستى. ەلىمىزدىڭ قارجى سالاسىنىڭ جەتەكشىسى ءوز كەزەگىندە شۆەيتساريالىق دەلەگاتسياعا ەلىمىزدىڭ داعدارىسقا قارسى جاساپ جاتقان امالدارى جونىندە اڭگىمەلەدى. «الەمدىك ەكونوميكالىق داعدارىس ەتەك الا باستاعان زاماتتا قازاقستان 2009 جىلى ەلىمىزدى يندۋستريالاندىرۋ شاراسىن قولعا الدى. اتاپ ايتقاندا, ۇدەمەلى يندۋستريالىق-يننوۆاتسيالىق مەملەكەتتىك دامۋ باعدارلاماسىن ءتۇزىپ, ونى بەلسەندى تۇردە جۇزەگە اسىرۋعا كىرىسىپ كەتتى. ناتيجەسىندە, داعدارىسقا دەيىنگى ينۆەستيتسيا كولەمى ساقتالىپ, ەل تۇرعىندارىنىڭ جۇمىسسىزدىق دەڭگەيى ايتارلىقتاي شەگەرىلىپ, ءوز جەمىسىن بەردى», دەدى ب.سۇلتانوۆ.
مۇنىمەن قاتار, ەل دامۋىنىڭ نەگىزگى فاكتورلارى جونىندە بايانداعان ۆيتسە-پرەمەر, تاياۋدا قابىلدانعان زاڭدار جونىندە دە تۇسىنىكتەمە بەرىپ ءوتتى. ءوز كەزەگىندە ەۆەلين ۆيدمەر-شليۋمپفت قازاقستاندى ورتالىق ازياداعى ماڭىزدى مەملەكەتتىڭ ءبىرى رەتىندە اتاپ, ەلىمىزدىڭ ينۆەستيتسيالىق كليماتى شۆەيتساريالىق ءىرى كومپانيالار مەن جەكەلەگەن بيزنەسمەندەر ءۇشىن وتە قولايلى ەكەنىن ايتتى. «سونىڭ ارقاسىندا شۆەيتسارلىق كاسىپكەرلەر قازاقستانعا ينۆەستيتسيا سالۋعا ىنتالى بولىپ ءجۇر», دەدى ول ءسوز اراسىندا.
كەزدەسۋ اياقتالىپ, ءوزارا تۇسىنىستىك مەموراندۋمىنا قول قويىلعان سوڭ, ب.سۇلتانوۆ ءباسپاسوز وكىلدەرىنە شارانىڭ ءمان-ماڭىزى جونىندە ايتىپ بەردى. «بۇگىن «تابىس پەن كاپيتالعا قوسارلانعان سالىق سالۋدى بولدىرماۋ تۋرالى كونۆەنتسياعا حاتتامانىڭ ەرەجەسىن كەڭەيتىلگەن تالقىلاۋ جونىندەگى» حاتقا قول قويدىق. بۇل – ءبىزدىڭ ەلدەگى كەيبىر مەملەكەتتىك ۆەدومستۆولاردىڭ حالىقارالىق دەڭگەيدە قالىپتى جۇمىس ىستەۋىنە مۇمكىندىك بەرەتىن العىشارتتاردىڭ ءبىرى. اتاپ ايتقاندا, كەدەن كوميتەتى مەن قازىناشىلىق كوميتەتتەرىنىڭ شۆەيتساريانىڭ وسى سالادا قىزمەت كورسەتەتىن ارىپتەستەرىمەن ءوزارا تاجىريبە الماسۋىن قامتاماسىز ەتەدى. ءتىپتى, ەكى ەل اراسىنداعى بيزنەس-ارىپتەستىكتىڭ دە جاقسارۋىنا وڭ ىقپالىن تيگىزەتىندىگىنە سەنىمدىمىن», دەدى ۇكىمەت باسشىسىنىڭ ورىنباسارى.
ەسكەرتەرىمىز, بۇل شارادان تىس شۆەيتساريالىق دەلەگاتسيا وكىلدەرى ەلىمىزگە جاساعان ەكى كۇندىك ساپارى اياسىندا پرەمەر-مينيستر كارىم ماسىموۆپەن, سىرتقى ىستەر مينيسترلىگىنىڭ جانە «استانا ەكسپو-2017» ۇك» اق-تىڭ باسشىلىعىمەن كەزدەسۋلەر وتكىزدى.
نۇرباي ەلمۇراتوۆ,
«ەگەمەن قازاقستان».