1-13 مامىر ارالىعىندا شىمكەنتتە تەننيستەن «Asia/Oceania final Qualifying Juniors Davis Cup» جانە «Juniors Billie Jean King Cup» ىرىكتەۋ تۋرنيرلەرى وتەدى. جارىسقا 16 جاسقا دەيىنگى ازيا/تىنىق مۇحيت ايماعىنىڭ ەڭ مىقتى جاسوسپىرىمدەر قۇرامالارى قاتىسادى دەپ جوسپارلانعان.
شىمكەنت كورتتارىندا جارىس قوجايىنى قازاقستاننان بولەك, اۋستراليا, قىتاي تايبەي, گونكونگ, ءۇندىستان, يندونەزيا, مالايزيا, يران, جاپونيا, وڭتۇستىك كورەيا, قىرعىزستان, موڭعوليا, جاڭا زەلانديا, تايلاند, وزبەكستان جانە ۆەتنامنىڭ قىزدار قۇراماسى سىنعا تۇسەدى. ال ەرلەر باسەكەسىندە قىرعىزستان مەن موڭعوليادان باسقا ەلدەردىڭ وكىلدەرى تۇگەلدەي ونەر كورسەتەدى.
ەلىمىزدە العاش رەت ۇيىمداستىرىلىپ جاتقان بۇل دودادا ەل نامىسىن بىلتىر چەحيانىڭ پروستەۆ قالاسىندا جالاۋى جەلبىرەگەن 14 جاسقا دەيىنگىلەر اراسىنداعى الەم چەمپيوناتىنا قاتىسىپ, ءتورتىنشى ورىنعا تابان تىرەگەن ۇلتتىق قۇرامانىڭ وكىلدەرى ءامىر ومارحانوۆ (قاراعاندى) پەن زاڭعار نۇرلان ۇلى (تۇركىستان) قورعاسا, ءۇشىنشى بوس ورىن ءۇشىن دامير جالعاسباي (الماتى), باقتيار ەراسىل (استانا) جانە ارتەم سيدوروۆ (الماتى) تالاسادى. بۇل جىگىتتەرگە سەرگەي كۆاك جەتەكشىلىك ەتەدى.
ال ياروسلاۆ شۆەدوۆا جاتتىقتىراتىن قىزدار قۇراماسىنان ىڭكار دۇيسەباي (الماتى), پولينا سلەپتسوۆا (الماتى), اريانا گوگۋلينا (استانا) جانە اناستاسيا كرىمكوۆا (تاراز) ىرىكتەۋگە قاتىسادى.
شىمكەنتتەگى ىرىكتەۋ سايىسىندا 16 كوماندا ءتورت توپقا ءبولىنىپ, ءوزارا شەبەرلىك بايقاسادى. ءسويتىپ, ءار توپتا ەڭ ۇزدىك ناتيجە كورسەتكەن ەكى قۇراما ءتۋرنيردىڭ پلەي-وفف كەزەڭىنە شىعىپ, الەم چەمپيوناتىنىڭ جولداماسىن ساراپقا سالادى. ازيا/تىنىق مۇحيت ايماعىنان بوزبالالار اراسىندا الەم چەمپيوناتىنا ءتورت جولداما بەرىلەدى, ياعني جارتىلاي فينالعا شىققان كوماندالار الەم بىرىنشىلىگىنىڭ جولداماسىن يەلەنەدى. ال قىزدار اراسىنداعى سايىستا العاشقى ءۇش جولداما ۇزدىك ۇشتىككە ەنگەن قۇرامالارعا بەرىلسە, ءتورتىنشى جولداماعا جارتىلاي فينالدا جەڭىلگەن ەكى قۇراما تالاسادى.
«Billie Jean King Cup Juniors» جانە «Davis Cup Juniors» ءتۋرنيرى – 16 جاسقا دەيىنگى ءجاسوسپىرىم تەننيسشىلەر اراسىنداعى ەڭ ماڭىزدى جارىس سانالادى. بۇل تۋرنير جىل سايىن الەم چەمپيوناتى رەتىندە حالىقارالىق تەننيس فەدەراتسياسىنىڭ (ITF) ۇيىمداستىرۋىمەن وتكىزىلەدى. كەزىندە اتالعان جارىستارعا الەمنىڭ بۇرىنعى جانە قازىرگى ەڭ ۇزدىك تەننيس جۇلدىزدارى قاتىسىپ, شەبەرلىگىن شىڭداعان.
اتاپ ايتار بولساق, بۇگىندە «ۇلكەن دۋلىعا» ساناتىنداعى جارىستاردا سان مارتە دارالانىپ, تورتجىلدىقتىڭ ەڭ ماڭىزدى دوداسى – وليمپيا ويىندارىندا تۇعىردىڭ بيىك ساتىسىنان كورىنگەن حورۆاتيالىق گوران يۆانيشەۆيچ, امەريكالىقتار – دجيم كۋرە, مايكل چانگ جانە ەندي رودديك, نيدەرلاندتىق ريچارد كرايچەك, رەسەيلىكتەر – ەۆگەني كافەلنيكوۆ, مارات سافين, دانيل مەدۆەدەۆ, اندرەي رۋبلەۆ, برازيليالىق گۋستاۆو كۋەرتەن, اۋستراليالىقتار – للەيتون حيۋيتت, نيك كيريۋس, شۆەيتساريالىقتار – رودجەر فەدەرەر, ستەن ۆاۆرينكا, يسپانيالىقتار – رافاەل نادال, كارلوس الكاراس, كانادالىقتار – دەنيس شاپوۆالوۆ, وجە الياسسيم, گەرمانيالىق انكە حۋبەر, فرانتسيالىق امەلي مورەسمو, رەسەيلىك قىزدار – ەلەنا دەمەنتەۆا جانە اناستاسيا مىسكينا, اۋستراليالىقتار – ەلەنا دوكيچ, ەشلي بارتي جانە تاعى باسقا داڭقتى تەننيسشىلەر دە ءجاسوسپىرىم شاعىندا وسىنداي دودالاردا ويناعان.
الەم چەمپيوناتىنىڭ ىرىكتەۋ جارىستارى شىمكەنت قالاسىنان بولەك, الەمنىڭ باسقا بولىكتەرىندە دە ۇيىمداستىرىلادى. ماسەلەن, ەۋروپا, افريكا, وڭتۇستىك, سولتۇستىك جانە ورتالىق امەريكادا ىرىكتەۋ جارىستارى ءوتىپ, بيىلعى جاھاندىق دوداعا قاتىساتىن 16 كوماندا انىقتالادى.