شايبالى حوككەيدەن قازاقستان ۇلتتىق قۇراماسى بۇل كۇندەرى ەلوردادا لاتۆيا مەن فينليانديادا وتەتىن الەم چەمپيوناتى الدىنداعى وقۋ-جاتتىعۋ جيىنىن وتكىزىپ جاتىر. جاھاندىق دوداعا دايىندىق بارىسىندا حوككەيشىلەرىمىز وڭتۇستىك كورەيا حوككەيشىلەرىمەن ەكى مارتە مۇزايدىندا جولىعىپ, ەكى رەتىندە دە قارسىلاستارىن ءىرى ەسەپپەن تىزە بۇكتىردى.
ەكى ەل اراسىنداعى العاشقى كەزدەسۋدە جەرلەستەرىمىز 5:0 ەسەبىمەن جەڭىسكە جەتكەن بولسا, ەكىنشى ماتچتا ءبىزدىڭ جىگىتتەر قارسىلاس كوماندانىڭ قاقپاسىنا باقانداي سەگىز شايبا سوعىپ, مۇزايدىنعا جينالعان جانكۇيەرلەردى قۋانىشقا بولەدى – 8:2.
ۇلتتىق قۇرامانىڭ باس باپكەرى عالىم مامبەتاليەۆ ءبىرىنشى ويىنعا قاراعاندا ەكىنشى ماتچتا ويىنعا وزگەرىس ەنگىزىپ, بىرقاتار جاڭا ويىنشىلاردى تەكسەرىپ كوردى. اتاپ ايتقاندا, ەل بىرىنشىلىگىندە «نوماد», «ارلان» سەكىلدى كوماندالاردا ونەر كورسەتەتىن ماكسيم مۋحامەتوۆ, اباي ماڭعىسباەۆ, ارتەم كورولەۆ, ءاليحان ومىربەكوۆ ۇلتتىق قۇراما ساپىنداعى العاشقى ويىنىن وتكىزسە, ءبىرىنشى كەزدەسۋدە مۇزايدىنعا شىقپاعان باتىرلان مۇراتوۆ تا بۇل جولى ويىنعا ارالاستى. ال وتكەن ويىندا قوسالقى قۇرامدا قالىپ قويعان «بارىستىڭ» قاقپاشىسى نيكيتا بوياركين بۇل جولى العاشقى مينۋتتاردان باستاپ قاقپانى كۇزەتتى. بىراق عالىم مامبەتاليەۆ ءبىرىنشى ماتچتاعى ۆ.ورەحوۆ, ءا.بەكەتاەۆ, ە.رىمارەۆ – ا.شەستاكوۆ, ر.ستارچەنكو بەستىگىنە وزگەرىس ەنگىزگەن جوق. قالعان ءۇش بەستىككە جوعارىدا اتى اتالعان حوككەيشىلەردى قوسىپ, تاجىريبەلى حوككەيشىلەرمەن بىرگە ويناتتى.
قازاقستان مەن كورەيا اراسىنداعى ەكىنشى ماتچتا كوپ شايبا سوعىلدى دەمەسەڭىز, بۇل باسەكە دە ءدال ءبىرىنشى ويىننىڭ ستسەناريىمەن باستالدى. ياعني ءبىرىنشى كەزەڭدە حوككەيشىلەر ءبىر-ءبىرىنىڭ قاقپاسىنا شايبا سوعا العان جوق. ال ەكىنشى كەزەڭنەن باستاپ «بارىس ارەناعا» جينالعان جانكۇيەرلەر گولدار شوۋىنىڭ كۋاسى بولدى. ەكىنشى كەزەڭدە حوككەيشىلەر 4 مارتە, ءۇشىنشى كەزەڭدە 6 رەت مەرگەندىگىمەن كوزگە ءتۇستى.
اتاپ ايتقاندا, ەكىنشى 20 مينۋتتىقتا قازاقستان قۇراماسى ساپىنان ءاليحان ومىربەكوۆ (24-مينۋت), ماكسيم مۋحامەتوۆ (26), ءادىل بەكەتاەۆ (36) نىسانانى ءدال كوزدەسە, وڭتۇستىك كورەيا قۇراماسىنان كان مين-ۆان (31) ءوز اتىن تابلوعا جازدىرتتى. ال شەشۋشى, ءۇشىنشى كەزەڭدە جەرلەستەرىمىزدەن دانيل بۋتەنكو (42), ميحايل راحمانوۆ (48), رومان ستارچەنكو (57), نيكيتا ميحايليس (57) جانە ءاليحان ومىربەكوۆ (59), تاڭعى شىق ەلىنىڭ وكىلدەرىنەن كيم كي-سۋنگە (56) گول سوعۋ باقىتى بۇيىردى.
ەندى قازاقستان ۇلتتىق قۇراماسى مامىر ايىندا رەسەي جانە بەلارۋس قۇرامالارىمەن ۇشتىك تۋرنير اياسىندا كەزدەسۋ وتكىزەدى. رەسەي حوككەيشىلەرىمەن 5 مامىردا جولىقسا, بەلارۋس قۇراماسىمەن 7 مامىردا وينايدى. ماتچتار ەلورداداعى «بارىس ارەنا» مۇز ايدىنىندا وتەدى. وسى تۋرنيردەن كەيىن جەرلەستەرىمىز لاتۆيا مەن فينليانديادا وتەتىن الەم چەمپيوناتىنا اتتانادى. ول جاقتا ءبىزدىڭ جىگىتتەر «ۆ» توبىندا كانادا, چەحيا, شۆەيتساريا, لاتۆيا, سلوۆاكيا, نورۆەگيا جانە سلوۆەنيا قۇرامالارىمەن الەم چەمپيونى اتاعىن ساراپقا سالادى.