ورالداعى يادرولىق مەديتسينا ورتالىعى

– ونكولوگيا دەرتىنە شالدىققان ناۋ­قاستاردى ەمدەۋ شاراسى ءۇش ءتۇرلى ادىستەن تۇرادى. ولار – حيرۋرگيالىق وپەراتسيا, حيمياتەراپيا جانە ساۋلە تەراپيا­سى. ەم تولىققاندى بولۋى ءۇشىن وسى ۇشەۋى دە كەرەك. الايدا ءبىزدىڭ ديسپانسەردە ساۋلە تەراپياسىن اتقاراتىن Clinac 600 جەلىلىك ۇدەتكىش جابدىعىمىز 2018 جىلدىڭ اقپان ايىندا ىستەن شىقتى. سول قۇرىلعى توقتاعالى بەرى ساۋلەلىك تەراپيا­نى قاجەت ەتەتىن باتىسقازاقستاندىق 858 ناۋقاس ەلىمىزدىڭ رەسپۋبليكالىق جا­نە باسقا دا وبلىستىق ونكولوگيالىق ور­­تا­لىقتارىنا جولداندى, دەيدى بىزگە با­­تىس قازاقستان وبلىستىق ونكولوگيا ديس­پانسەرىنىڭ ديرەكتورى زەيىل ماعزوموۆ.

اۋىر ناۋقاستىڭ وزگە وڭىرگە بارىپ ەم الۋى – ايتۋعا عانا وڭاي شارۋا. قاتەرلى ىسىك اسقىنعان كەزدە كوپ سىر­قات جول كوتەرە المايدى. تاۋەكەل ەتىپ بارعان كۇننىڭ وزىندە جول, قوناقۇي, باسقا دا شىعىنى مول. «ارىق اتقا قامشى اۋىر», ناۋقاسقا ول دا ارتىق سالماق. ال شەتەلگە, الدىڭعى قاتارلى الەمدىك كلينيكالارعا قولى جەتكەندەر عانا بارادى. ديسپانسەردىڭ ستاتيست-دارىگەرى كۇلاي تۇراشەۆا 2018-2022 جىلدار ارالىعىندا باتىسقازاقستاندىق 13 ناۋقاس رەسەيدىڭ ماسكەۋ, سانكت-پەتەربور, ورىنبور, قازان, سامارا قالالارىنا, 1 پاتسيەنت وڭتۇستىك كورەياعا ساۋلە تەراپياسىن الۋعا بارعانىن ايتادى.

ال وبلىستىق ديسپانسەردىڭ راديولوگيا ءبولىمى مەڭگەرۋشىسى مىندەتىن اتقارۋشى الەكساندر كۋزنەتسوۆتىڭ ايتۋىنشا, 2022 جىلى باتىس قازاقستان وبلىسىندا 1 555 ادامنان ونكولوگيا دەرتى جاڭادان انىقتالعان بولسا, سونىڭ 60 پايىزىنا, 800-دەي ادامعا ساۋلە تەراپياسى تاعايىندالعان ەكەن. بىراق ولاردىڭ از عانا بولىگى وزگە وڭىرگە بارىپ, ءتيىستى ەمىن الا العان.

ارينە, ديسپانسەر باسشىلىعى قالىپتاسقان جاعدايدى ايتىپ دابىل قاعىپ, ءوڭىر باسشىلىعىن, ءتيىستى ورىنداردى حاباردار ەتكەن ەدى. بىراق ساۋلە تەراپياسىنا قاجەتتى مەديتسينا جابدىقتارى وتە قىمبات تۇراتىندىقتان, وبلىس بيۋدجەتى كوتەرە المايدى. اقىرى مۇنىڭ دا جولى تابىلدى. قازاق-ورىس بىرىككەن «مەدينۆەستگرۋپپ قازاقستان» كومپانياسى مەملەكەتتىك-جەكەمەنشىك سەرىكتەستىگى اياسىندا ورال قالاسىنا سۋ جاڭا زاماناۋي قوندىرعى جەتكىزدى. يادرولىق مەديتسينا ورتالىعىن ىسكە قوسۋ جوباسى اياسىندا باتىس قازاقستان وبلىسى اكىمدىگى, باتىس قازاقستان وبلىستىق ونكولوگيا ديسپانسەرى جانە «مەدينۆەستگرۋپپ قازاقستان» جشس ۇشجاقتى كەلىسىمگە قول قويدى. بۇل جوبا 10 جىل مەرزىمدە جۇزەگە اسىرىلادى. جوبا اياسىندا مەملەكەت تاراپىنان مەديتسينالىق ورتالىققا عيمارات تەگىن بەرىلدى. ءسويتىپ, جالپى اۋدانى 350 شارشى مەتر عيماراتقا كۇردەلى جوندەۋ جۇرگىزىلىپ, حالىقارالىق دەڭگەيدەگى مەديتسينا قۇرىلعىلارى ورناتىلدى. بۇل جوبانى جۇزەگە اسىرۋ ءۇشىن «مەدينۆەست­گرۋپپ قازاقستان» 2 ملرد 700 ملن تەڭگە­دەن اسا قارجى جۇمساپتى.

يادرولىق مەديتسينا ورتالىعىن ارالاپ, جاڭا جابدىقتاردى كوزىمىزبەن كوردىك. «Varian» كومپانياسىنىڭ اقش-تا جوبالانىپ, قىتايدا جيناقتالعان «Halcyon» زاماناۋي جەلىلىك ۇدەتكىشى زاۋىتتان 2022 جىلى عانا شىعىپتى. ياعني بۇگىنگى تاڭداعى ەڭ سوڭعى جەتىستىكتەرمەن قامتىلعان جابدىق. قازىر مۇنداي قۇرىلعى قازاقستاندا شىمكەنت پەن ورال قالاسىندا عانا بار ەكەن. ورالداعى ماماندارعا جاڭا جابدىقتىڭ قىر-سىرىن ۇيرەتۋگە كەلگەن ينجەنەر, مەديتسينا فيزيگى دوسبول ۋالشەروۆتىڭ ايتۋىنشا, بۇل قوندىرعى وتە ىڭعايلى ءارى تەز قىزمەت كورسەتەدى. مىسالى, ءبىر پاتسيەنتتىڭ ەم الۋىنا 10 مينۋت عانا ۋاقىت جۇمسالادى. ءارى ساۋلە ادام دەنەسىنە شاشىراماي, وبىر اۋرۋمەن زاقىمدالعان نۇكتەگە عانا تۇسەدى. اعزانىڭ باسقا مۇشەلەرىنە زيانى تيمەيدى. سوندىقتان ادام شارشامايدى, بۇل ەمدى 20-30 مارتەگە دەيىن الا الادى ەكەن. جالپى, وسى «Halcyon» اپپاراتى ءبىر جىل ىشىندە كەمىندە 800-دەن اسا ناۋقاسقا قىزمەت كورسەتە الادى.

– بۇل جوبانىڭ ماقساتى – وڭىردە ونكولوگيا دەرتىنە شالدىققان سىرقات سانىن ازايتۋ, ناۋقاستىڭ عۇمىرىن ۇزارتۋ جانە ءومىر ساپاسىن ارتتىرۋ. جاڭا قۇرىلعى حيرۋرگيا جولىمەن ەمدەۋ ءادىسىن ازايتىپ, اسپاپپەن زەرتتەۋ كومەگىمەن انىقتالعان ىسىك جاسۋشالارىن رادياتسيا ادىسىمەن ەمدەيدى. ساۋلە تەراپياسى دەرتى مەڭدەگەن ناۋقاستىڭ ءتان ازابىن دا ازايتادى. جاڭا يادرولىق مەديتسينا ورتالىعىنىڭ اشىلۋى ءبىزدىڭ ءوڭىر ءۇشىن ۇلكەن جاڭالىق, ەرەكشە قۋانىشتى ءسات بولدى. ورتالىقتىڭ قىزمەتىن باتىسقازاقستاندىق تۇرعىندار كەپىلدىك كولەم شەڭبەرىندە تەگىن پايدالانادى. ودان بولەك, كورشىلەس وڭىرلەردەن, قازاقستاننىڭ باسقا دا وبلىستارىنان ناۋقاستار كەلە الادى, دەيدى زەيىل جوكەن ۇلى.

«مەدينۆەستگرۋپپ قازاقستان» جشس مەن ونكولوگيالىق ديسپانسەر ارا­سىنداعى كەلىسىمشارتقا سايكەس, ور­تا­لىقتا ساۋلەلىك تەراپيا جانە كوم­پيۋ­تەرلىك توموگرافيا بويىنشا مە­ديتسينالىق قىزمەت كورسەتىلەدى. جەلى­لىك ۇدەتكىشتە ساۋلە تەراپياسىن الاتىن 800 ناۋقاستان بولەك, مۇندا جىلىنا 1 مىڭنان اسا ناۋقاس كومپيۋتەرلىك توموگرافيا تەكسەرۋىنەن وتە الادى.

– بۇل ورتالىقتىڭ اشىلۋى ونكو­لو­گيالىق اۋرۋلاردى دەر كەزىندە انىق­تاۋعا, ونكوپاتولوگيامەن اۋىرا­تىن ناۋقاستاردىڭ ءومىر ءسۇرۋ ساپاسىن جاقسارتۋعا, وسى تۇردەگى قىزمەتتەردىڭ قولجەتىمدىلىگىن ارتتىرۋعا, پاتسيەنت­تەردىڭ ەم-دوم شارالارىن كۇتۋ ۋاقىتىن قىسقارتۋعا مۇمكىندىك بەرەدى. سونىمەن قاتار قاتەرلى ىسىك اۋرۋلارىمەن كۇرەستىڭ تيىمدىلىگىن ارتتىرۋعا دا زور ۇلەس قوسادى, دەيدى الەكساندر كۋزنەتسوۆ.

ايتپاقشى, دارىگەر-رەنتگەنولوگ ا.كۋزنەتسوۆ رەسەي فەدەراتسياسىنىڭ پەرم قالاسىنداعى ايماقتىق ونكولوگيا ورتالىعىندا ءدال وسى «Halcyon» جەلىلىك ۇدەتكىشىنىڭ جۇمىسى بويىنشا كىرىسپە كۋرستان ءوتىپ كەلىپتى. ءوزى قازاقشاعا دا جۇيرىك ەكەن. قازىر ول ورالدا راديولوگيا بولىمشەسىنىڭ دارىگەرلەرى مەن ورتا مەديتسينا قىزمەتكەرلەرىنە وسى قۇرىلعىنى پايدالانۋ ساباعىن جۇرگىزەدى. سونداي-اق بولىمشەنىڭ قوس قىزمەتكەرى بيىل قاڭتار-ناۋرىز ارالىعىندا رەسپۋبليكالىق مەديتسينا اكادەمياسىنىڭ قاراعاندى فيليالىندا «رەنتگەنولوگياداعى مەيىرگەر ءىسى» كۋرسىن ەكى اي وقىپ, سەرتيفيكات الىپ كەلىپتى.

باتىس قازاقستان وبلىستىق ونكولوگيا ديسپانسەرىندە بارلىعى 36 دارىگەر جۇمىس ىستەيدى. ماماندار تولىق, تەك كلينيكو-دياگنوستيكالىق زەرتحاناعا 1 زەرت­حاناشى-دارىگەر جەتپەي تۇر. جالپى, ونكوديسپانسەر تاۋلىك بويى جۇمىس ىستەيتىن – 181, ستاتسيونارلىق 55 كەرەۋەت-ورىنعا ەسەپتەلگەن.

– 2023-2025 جىلدارعا ارنالعان كەشەندى جوسپارعا سايكەس, بولاشاقتا تاعى 63 مەديتسينالىق قۇرال-جابدىق ساتىپ الۋ جوسپارلانىپ وتىر. سونىمەن قاتار وبلىس اكىمدىگىنىڭ قولداۋىمەن «قاراشىعاناق پەترولەۋم وپەرەيتينگ ب.ۆ.» كومپانياسى 18 دانا ەمدىك-دياگ­نوستيكالىق قۇرال-جابدىقتى جاڭارتىپ بەرمەك, دەيدى زەيىل جوكەن ۇلى.

مىنە, وسىنداي شارالاردىڭ ناتي­جەسىندە وڭىردە قاتەرلى ىسىك سالدارىنان بولعان ءولىم كورسەتكىشى تومەندەپ, 2023 جىلى 100 مىڭ ادامعا شاققاندا بولجامداعى 94,7 ادامنان 85,4 ادامعا تۇسكەن.

قاتەرلى ىسىك, ونكولوگيا اۋرۋلارى ءححى عاسىردا ادامزاتتىڭ ۇلكەن ماسەلەسىنە اينالعانى راس. الەمدىك وزىق تەحنولوگيا, عىلىم-ءبىلىم بۇل دەرتپەن بارىنشا كۇرەسۋدە. سول اقىل-ويدىڭ الدىڭعى قاتارلى جەتىستىكتەرى ەلىمىزگە, سونىڭ ىشىندە شەتكەرى وبلىستارعا دا جەتىپ جاتقانىنا قۋانىشتىمىز.

باتىس قازاقستان وبلىسى