قىزىلوردا قالاسىندا بايگەدەن ەل چەمپيوناتىنىڭ وڭتۇستىك ايماقتىق ءىى ىرىكتەۋ ءتۋرنيرى ۇيىمداستىرىلدى. جارىستىڭ سالتاناتتى اشىلۋىنا وبلىس اكىمى نۇرلىبەك نالىباەۆ, ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ, رەسپۋبليكالىق «بايگە» فەدەراتسياسىنىڭ پرەزيدەنتى قانات كوپباەۆ قاتىستى.
بايگە قىزىعىن كورۋگە جينالعان جۇرت الدىندا ايماق باسشىسى كەيىنگى جىلدارى وڭىردە ۇلتتىق سپورت تۇرلەرى بۇقارالىق سيپات الىپ كەلە جاتقانىنا توقتالدى. وسى كۇنى سىردا 16 مىڭنان استام ادام ۇلتتىق سپورتپەن شۇعىلدانادى. ولار بىلتىر ەل چەمپيوناتى مەن كۋبوكتەرىندە, الەم جانە ازيا چەمپيوناتتارىندا ۇزدىكتەر قاتارىنان كورىنىپ, مەدال سانى جاعىنان كەيىنگى بەس جىلدىقتاعى رەكوردتى جاڭارتتى.
وبلىستا 8 ۇلتتىق سپورت ءتۇرى بويىنشا 797 جاتتىقتىرۋشى 26 396 سپورتشى تاربيەلەۋدە. ونىڭ ىشىندە «قىزىلوردا وبلىستىق ۇلتتىق ات سپورتى فەدەراتسياسى» قوعامدىق بىرلەستىگى, «كوكپار» فەدەراتسياسى» رەسپۋبليكالىق قوعامدىق بىرلەستىگىنىڭ قىزىلوردا وبلىستىق فيليالى, «قىزىلوردا وبلىسىنىڭ بايگە فەدەراتسياسى» قوعامدىق بىرلەستىكتەرى بار. سونىمەن قاتار قىزىلوردا قالاسىنان 2018 جىلى «ۇلتتىق جانە ات سپورتى تۇرلەرى بويىنشا سپورت كلۋبى» كمم قۇرىلىپ, قازىر 7 سپورت ءتۇرى بويىنشا (قازاق كۇرەسى, جامبى اتۋ, تەڭگە ءىلۋ, اۋدارىسپاق, توعىزقۇمالاق, اسىق اتۋ, ۇلتتىق جەكپە-جەك) 12 جاتتىقتىرۋشى-وقىتۋشى 407 سپورتشىنى باۋلىپ كەلەدى.
– بۇگىنگى رەسپۋبليكالىق بايگە سىر ءوڭىرىنىڭ مەرەيىن اسىرىپ, ۇلتتىق سپورتتىڭ وركەندەۋىنە جاڭا سەرپىن بەرەدى دەپ سەنەمىن. ءتوزىم مەن جىگەر, قايرات پەن مىنەز سىنعا تۇسكەن بايگەدە تۇلپارلاردىڭ تۇياعى تالماسىن, – دەدى وبلىس اكىمى.
ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ ۇلتتىق سپورتتى دامىتۋ – مەملەكەت ساياساتىنىڭ ماڭىزدى باعىتىنا اينالعانىن ايتتى. «بابادان قالعان باعزى ونەردى كاسىبي جانە بۇقارالىق باعىتتا دامىتۋ قولعا الىنىپ, ەل اۋماعىندا ۇلتتىق سپورت تۇرلەرىن جاڭعىرتۋ ءۇشىن كوپتەگەن جارىس ۇيىمداستىرىلىپ كەلەدى. وسى جىلدان باستاپ كوكپار ويىندارى فۋتبول ءتارىزدى ليگا فورماتىندا وتكىزىلە باستايدى. كەلەسى جىلى V دۇنيەجۇزىلىك كوشپەندىلەر ويىنى قازاقستاندا وتەدى», دەدى ي.سالجانوۆ.
وسىدان كەيىن بايگە باستالىپ, يپپودرومعا جينالعان جۇرتتىڭ قيقۋىنا ات تۇياعىنىڭ ءدۇبىرى قوسىلىپ سالا بەردى. بۇل جولعى بايگەنىڭ جۇلدە قورى 35 600 000 تەڭگە. الامان بايگەدە سورەدەن سۋىرىلىپ العا شىققان استانالىق «العىر» كومبەگە جەتكەنشە الدىنا قارا سالدىرعان جوق. وسىلايشا, «Astana Motors» كومپانياسىنىڭ اۆتوكولىگى ەلورداعا جول تارتتى. قالعان جۇلدەلى ورىندارعا دا قارجىلاي سىيلىقتار تابىستالدى.
وسى كۇنى وبلىستا تاعى ءبىر تاعىلىمدى شارا ءوتتى. بايگەدەن ەل چەمپيوناتىنا ىرىكتەۋمەن قاتار «ۇلتتىق كيىم – ۇلت اجارى» اتتى وبلىستىق ۇلتتىق كيىمدەر بايقاۋى ۇيىمداستىرىلدى.
بايقاۋعا قاتىسقان 53 قىز-كەلىنشەك كيىپ شىققان ۇلتتىق كيىمدەر داستۇرگە سايكەستىگى, دايىنداۋ شەبەرلىگى مەن شىعارماشىلىق كوزقاراس تۇرعىسىنان باعالاندى. ءبىرىنشى ورىن العان جەڭىمپازعا – 500 000, ەكىنشى ورىنعا – 300 000, ءۇشىنشى ورىن يەسىنە 200 000 تەڭگە تابىس ەتىلدى.
قازىلار القاسىن باسقارعان قازانعاپ اتىنداعى قىزىلوردا جوعارى مۋزىكالىق كوللەدجى ديرەكتورى ۇلجان بايبوسىنوۆا جەڭىمپازداردى قۇتتىقتاپ, ۇلتتىق مۇرانى ۇلىقتايتىن وسىنداي شارالاردىڭ ءجيى وتكىزىلۋىنە تىلەكتەستىگىن ءبىلدىردى.
قىزىلوردا