ۇلتتىق مادەنيەتتىڭ مارتەبەسى

اسقانىنىڭ ادەمى ۇلگىسىن  اقش-تا وتكەن قازاقستان مادەنيەتى كۇندەرى كورسەتتى

بۇل عۇمىردا قايتالانا بەرمەس مۇنداي سيرەك ساپار ۇستىندە قالايشا ەسكە تۇسپەسسىڭ. تاۋبە دەرسىڭ, باسپاعان جەردى, اتتالماعان ەلدەردى بارىپ كورۋگە كاسىپتىك ءناسىپ جازىپتى. ەگەمەندىكتىڭ ارعى جاعىنداعى جىلداردا «لەنينشىل جاستىڭ» ارقاسىندا كەشەگى يۋگوسلاۆيانىڭ بۇگىنگى سەربياسىن, سلوۆەنياسىن, حورۆاتياسىن, بوسنياسىن ارالاپ شىعۋ ۇمىتىلماسا, ودان سوڭعى ءبىراز ۋاقىتتا «ەگەمەن قازاقستاننىڭ» مۇمكىندىك تۋعىزۋىمەن ۇندىستانعا جول تۇسكەنى بار-تىن. باسىلىمنىڭ تاعى ءبىر تاپسىرماسىنا وراي ەندى تالايدان اتاق-داڭقى دۇرىلدەگەن امەريكا قۇراما شتاتتارىنىڭ وزىنە ساپارلاۋ كوڭىل وسىرگەنى راس. وسى جولعى جۇمىس بابى نيۋ-يورك پەن ۆاشينگتونداعى قازاقستان مادەنيەتىنىڭ كۇندەرىن بايانداۋ بولاتىن. «ونەر كوپكە دە جەتكىزەدى, كوككە دە جەتكىزەدى» دەيدى حالقىمىز. شىنىن ايتقاندا, تاڭىرقاۋى قيىن امەريكالىقتاردىڭ ۇلتىمىزدىڭ سان عاسىرلىق جانە جاڭارعان مۇراسىن تامسانا تاماشالاپ, سۇيسىنىسكە بولەنۋىن ءا دەگەننەن ايتپاي وتە المايمىز. ونەر اتتى اسەم الەمنىڭ عاجايىپ سيقىرىنا باۋراعان, قاي-قايسىسى دارا دارىن باۋىرلاستاردىڭ شالقىعان شابىتى سوعان ۇيىرگەندەي ەدى. مانحەتتەندە قالىقتاعان اۋەن الدىمەن نيۋ-يورككە تابان تىرەدىك. تاريحى دا, تاعدىرى دا قىزىق ايگىلى قالا تۋرالى اڭگىمە ءبىر قوزعالسا تاۋسىلماۋى مۇمكىندىكتەن ءارى از ۋاقىتتا سىرىنا قانىقتىرا قوياتىن ەمەستەي بولعاندىقتان قىسقاشا تانىستىرعاندا مىناداي جايتتارعا توقتالىپ ءوتۋدى ءجون كوردىك. كولۋمبتىڭ جاڭا قۇرلىقتى اشۋىنان كەيىن ىشىنە ەندەي ەنىپ, يەلىك ەتۋ ءۇشىن اسىققان ەۋروپالىقتاردىڭ الدى بولىپ يتاليالىق تەڭىز ساياحاتشىسى دجوۆانني دە ۆەررازانو 1524 جىلى شالقار اتلانت مۇحيتىمەن استاساتىن بۇعازدى تابادى. ءبىراز جىلداردان سوڭ ونىڭ ىزىمەن تىنىق مۇحيتىنا شىعاتىن سۋ جولىن ىزدەۋشى گوللانديانىڭ وست-ءۇندى كومپانياسى قىزمەتىندەگى اعىلشىن تەڭىزشىسى گەنري گۋدزون ءوز اتىن قويعان وزەن مەن بۇعاز بويىنداعى ارالدىڭ تاماشا قونىس ورنى بولۋعا لايىق ەكەنىن جەتكىزەدى. ەۋروپا ەلدەرىمەن سولتۇستىك امەريكاداعى جەرلەردى يگەرۋدە باسەكەلەستىكتە جولى بولۋشى شاعىن مەملەكەتتىڭ جاڭا نيدەرلاند دەپ اتالعان وتارىنىڭ گۋبەرناتورى پەتەر مينەيت بۇعان دەيىن ونى مەكەندەۋشى ۇندىستەر تايپاسى ماناحاتتادان بولماشى اقشاعا ساتىپ الادى. بۇگىندە شاھاردىڭ مانحەتتەن اتاۋىمەن بەلگىلى ايگىلى بولىگى وسىدان شىققان دەسەدى. اراداعى ءبىراز جىلداردا انگليا وكتەمدىگى كۇشەيىپ, گوللاندتار ىرگەتاسىن قالاعان قالا نيۋ-يورككە وزگەرتىلەدى. سولتۇستىك جانە وڭتۇستىك امەريكا اراسىنداعى ازامات سوعىسىنان سوڭ ءبىرتۇتاس مەملەكەتكە بىرىككەن ەلدىڭ ءبىرىنشى استاناسى بولادى. كەيىندە جولىن قاپتالداس ۆاشينگتونعا بەرگەنمەن, بۇۇ باس كەڭسەسى ورنالاسقان, ءىرى قارجىلىق قۇرىلىمدار ورىن تەپكەن, بيىكتىگى ءبىر-بىرىنەن اسىپ, كوككە شانشىلعان عيماراتتار ءيىن تىرەسكەن, ۇزىندىعى 80 شاقىرىمعا جۋىق ءبىر عانا برودۆەي مەن دۇنيەجۇزىلىك بانكتەردىڭ ۇياسى ۋولل-ستريت كوشەسى, اسپالى برۋكلين كوپىرىنىڭ ءوزى كەرەمەتتىگىن تانىتاتىن كۇندىز-تۇنگى قىز-قىز قايناعان قالا تىنىسىن قاي تۇسىنان دا ەرەكشە سەزىنەسىز. ال وسىلاردىڭ ىشىندە قازاقستان مادەنيەت كۇندەرى اشىلعان «كارنەگي حولل» كونتسەرت ورتالىعىنىڭ ورنى دا وزىنشە بولەك. ءتىپتى, ونى بىلمەيتىن جان جوقتاي كورىندى. مەيمانحانامىزدان ۇزاپ كەتىپ,  اداسۋعا اينالعانداي ساتتەرىمىزدە اتىن اتاي قالعانىمىزدا دۇرىس ءجون سىلتەنۋىنە سۇيەنىپ تە الدىق. بۇدان ءبىر جاعىنان نيۋ-يوركتىكتەردىڭ ونەر ومىرىنەن ەلەۋسىز ەمەستىگىن اڭعارتسا, عاسىرلىق تاريحى بار اسەم عيماراتتىڭ اركىمگە تانىستىعى دا بايقالدى. كلاسسيكالىق مۋزىكانى ورىنداۋ­شىلارعا الەمدەگى ەڭ مارتەبەلى, تالاي اتاقتى ساڭلاقتاردىڭ دارىنىن تانىتۋشى بۇل مادەنيەت قارا شاڭىراعى ساۋلەتشى ۋيليام ءتاتحيللدىڭ جوباسى مەن كاسىپكەر ەندريۋ كارنەگيدىڭ قارجىلىق قولداۋىمەن سالىنعان ەكەن. شىمىلدىعى العاش رەت 1891 جىلدىڭ 5 مامىرىندا پەتر چايكوۆسكيدىڭ ديريجەرلىك ەتۋىمەن نيۋ-يورك سيمفونيالىق وركەسترىنىڭ كونتسەرتىمەن تۇرىلگەن. سودان بەرى ەڭ ايتۋلى سازگەرلەر مەن ونەرپازداردىڭ تالانتىن جايۋعا تالپىنتاتىن كيەلى ورىن, ىشكى-سىرتقى اسەمدىگىنەن بولەك تاماشا اكۋستيكاسى ورىنداۋشىلارىن دا, تىڭداۋشىلارىن دا تاڭ-تاماشا قالدىرادى. مىنە, وسىنداي رۋحاني وشاقتا قازاقستاندىق ونەرپازدارعا ساحنا ۇسىنىلۋى ۇلكەن قۇرمەت ەكەنى داۋسىز. سايكەسىنشە, ەل ونەرپازدارى قارىم-قابىلەتتەرىن بارىنشا كورسەتتى. اقش-تاعى اتالعان ءىس-شارانىڭ اشىلۋىنا وسى ەلدەگى قر توتەنشە جانە وكىلەتتى ەلشىسى ق.وماروۆ قاتىستى. شارانى قر مادەنيەت ءمينيسترىنىڭ ورىنباسارى ا.بورىباەۆ اشتى. ول وسىناۋ شاراعا قولداۋ تانىتىپ, ەكى مەملەكەتتىڭ مادەني بايلانىس­تارىن دامىتۋعا ىقىلاس كورسەتۋشى امەريكا تارابىنا العىسىن ءبىلدىردى. برۋكلين وكرۋگى مەن نيۋ-يورك قالا­سى مەرياسىنىڭ وكىلدەرى مۇنداي ىنتى­ماقتاستىق ناتيجەسى جاڭا قارىم-قاتى­ناس­تاردى قالىپتاستىرۋىن تىلەدى. كونتسەرتتىك باعدارلامانى تاماشا­لاۋعا بۇۇ باس حاتشىسى پان  گي مۋنمەن بىرگە وسىناۋ حالىقارالىق ۇيىمنىڭ جاۋاپتى قىزمەتكەرلەرىنىڭ كەلۋى مادەنيەت كۇندەرىنىڭ ءمانى مەن سالتاناتىن اسىرا ءتۇستى. مۇنىڭ الدىندا وتكەن ءباسپاسوز ءماسليحاتىندا ارىپتەستەرىمىزدىڭ ءبىرىنىڭ سۇراعىنا تمد ەلدەرى اراسىنان ۇلكەن قۇرامدا ءبىر ەلدىڭ ونەرى جان-جاقتى تا­نىس­­تىرىلۋى سيرەك وقيعا رەتىندە ايتىل­عان ەدى. ءاسىلى, ونەر قۇدىرەتى كۇشتى. ول ۋاقىتپەن, زامان تالابىمەن, ادامزات ماقساتىمەن بىرگە ۇندەس تاپسا ءتىپتى زور. وسىنى تالاپ ەتۋشى ەلباسىنىڭ باستاماسىمەن ەل-ەلدە وتكىزىلۋدەگى قازاقستان مادەنيەتى كۇندەرىنىڭ ۇلگىلى ماڭىزىن جوعارىداعى جايت بايقاتپاي قالمادى. جالپى العاندا, امەريكادا قازاق ونەرى بەلگىسىز ەمەس. وسى جولعى ساپاردىڭ نەگىزگى كوركى بولعان قۇرمانعازى اتىنداعى مەملەكەتتىك اكادەميالىق حالىق اسپاپتار وركەسترى بۇل جاقتا 2004 جىلى بولىپتى. وعان قوسىلعان ب.بايقاداموۆ اتىنداعى مەملەكەتتىك حور كاپەللاسى, ونىڭ سۇيەمەلدەۋىندەگى جەزتاڭداي انشىلەر نۇرجامال ۇسەنباەۆا, مايرا مۇحامەدقىزى, تالعات مۇساباەۆ ورنەك-بەدەرىن وسىرە تۇسىرگەن سەكىلدى. زالداعى تىڭداۋشىلاردىڭ بەيتانىس اۋەن-سازداردى قالاي قابىلداۋىنا زەر سالعانىمىزدا, كوزدەرىنە ەتەنە تانىس  اسپاپتاردىڭ ورنىنا بۇرىن-سوندى ەستىپ كورمەگەن دومبىرا, قوبىز, سىبىزعى, ساز سىرنايدىڭ ۇيلەسكەن ءۇنى نە شىعارمانى بارلىق  بوياۋىمەن توگىلتۋى تاڭقالدىرعانى ءبىلىندى. مايرا اسەم سوپرانو داۋىسىمەن دە, سۇلۋ سانىمەن دە كالماننىڭ «حانشايىم چارداشا» وپەرەتتاسىنان سيلۆانىڭ ارياسىن ورىنداعانداعى قوشەمەت نيۋ-يوركتە دە, ۆاشينگتون زالىن دا دۋىلداتىپ تۇرىپ الدى. امەريكالىق «ۆەيۆل-ۆابل» دجاز مۋزىكاسىن ۇلتتىق اسپاپتاردىڭ تۇرلەندىرە جەلپىنتۋى ارقىلى حور كاپەللاسىنىڭ ويناقى ىرعاقپەن اۋەندەتۋى ءتىپتى ريزالىق تۋعىزدى. ەكى ىشەكتى دومبىرانىڭ سان قىرلى قۇبىلىسى تالايدىڭ اۋزىن اشتىرىپ, كوڭىل تەربەتۋى مىنا ءبىزدى ۇلتتىق ماقتانىش سەزىمىنە بولەگەنىن قالايشا ايتپاسپىز. «كارنەگي حوللداعى» كونتسەرت اياقتالىسىمەن دە تارقاسا قويماعان جەرگىلىكتى ونەرسۇيەر قاۋىم وكىلدەرىنىڭ ءبىرى يانۋش كۋرەكپەن تىلدەسكەنىمىزدە: «عاجاپ اسەردەمىن. ونەرى وسىنداي بولسا, قازاقستان مادەنيەتى بيىك ەكەن. وسى سالاعا ءبىرشاما قاتىسىم بار جان بولعاندىقتان, مادەني ءلاززات العانىما قۋانىشتىمىن. ۇلتتىق ءۇردىستىڭ الەمدىك ۇلى ونەردىڭ تەرەڭىنەن نارلەنىپ, تەڭدەسسىز شەبەرلىكپەن ۇشتاسۋىن كوزبە-كوز ءبىرىنشى كورۋىم. وتانداستارىڭىز جەتىستىگى بيىككە سامعاي بەرۋىنە سەنەمىن», دەگەن لەبىزىن اۋدارماشىسىز تۇسىندىك. ارعى تەگى پولياك-امەريكالىق اقساقال ورىسشا سويلەۋدى ۇمىتپاپتى. قازاقتىڭ ءداستۇرلى مادەنيەتىن جاڭاشا جاڭعىرتۋشى وركەستردىڭ باس ديريجەرى ارمان جۇدەباەۆتىڭ ايتۋىنشا, ارنايى كونتسەرتتىك باعدارلاماعا دايىندىق ەرتە باستان جۇرگىزىلگەن. رەپەرتۋارىندا 4 مىڭعا تارتا ءان مەن كۇي بار باي مۇرانىڭ, ۇلكەن قوردىڭ تاڭداۋلىلارىن تانىستىرۋعا ىرىكتەپ الۋ وڭاي بولماعان. مۇنىڭ سىرتىندا نۇرجامال ۇسەنباەۆا, مايرا مۇحامەدقىزى, تالعات مۇساباەۆ, ايدوس جاباعين, تايىر تاجىعۇلوۆ, ءجاميلا جارقىنباەۆا, ايزادا قاپاعانوۆا, جانات باقتاي سىندى كۇمىسكومەي ورىنداۋشىلاردىڭ باسىن بىرىكتىرىپ, وركەستر سۇيەمەلدەۋىنە بەيىمدەۋ جەڭىل تيمەسە دە, جەمىسى تاتىلعانىن كوردىك. لاتيف ءحاميديدىڭ «قازاق ءۆالسى» مەن «بۇلب ۇلىن» قوسىلا شىرقاعان ءجاميلا, ايزادا, جاناتتىڭ دالا قۇسىنىڭ سىڭعىرىن ساف تازا كۇيىندە قۇيقىلجىتۋى تىڭداۋشىلاردى قاندايلىق ءتانتى ەتتى دەسەڭىزشى. بيىل 80 جىلدىق مەرەيتويىن اتاپ وتكەلى وتىرعان احمەت جۇبانوۆ قۇرعان ۇيا بۇعان دەيىن مۋزىكانىڭ مەككەسى – ۆەناداعى, بەيجىڭدەگى, كيەۆتەگى ونەر بايقاۋلارىندا, «استانا كەشتەرى» اتتى جەكە كونتسەرتتە جاڭاشا ءبىر قىرىنان تانىلسا, نيۋ-يورك پەن ۆاشينگتون تۇرعىندارىن ودان سايىن تامساندىردى. الدا الىس-جاقىن جۇرتشىلىقپەن تالاي كەزدەسۋلەر كۇتىپ تۇردى. پوتوماكا جاعالاۋى جاڭعىرىقتى ءومىرى ونەرمەن تۇتاسقان ادامدار قاشاندا تولقۋلى ەكەنىن بىلسەك تە, جۇزبە-ءجۇز سەزىنۋ اسەرى ءتىپتى بولەك ەكەن. العاشقى كونتسەرت ءساتتى وتۋىنە كوڭىلدەرى كوتەرىڭكى انشىلەر, دومبىراشىلار, سكريپكاشىلار ەندىگى كەزەكتە ۆاشينگتونعا اتتانعان بەتتە جولاي جۇرەكتەرى قايتا ءلۇپىل قاعىپ وتىردى. بۇلاي بولماي قايتسىن. ەل استاناسىنىڭ تالعامى جوعارى ونەرسۇيەرلەرى الدىندا, ونىڭ ۇستىنە باس شاھاردىڭ دج.ف.كەننەدي اتىنداعى ورىنداۋشىلىق ونەر ورتالىعىندا ونەر كورسەتۋ قالايشا تولقىتپاسىن. مەيمانحاناعا جايعاسا سالىسىمەن ىلە دايىندىققا كىرىسىپ كەتۋ دە سوندىقتان ەدى. نيۋ-يورككە قاراعاندا ۋ-شۋى از, تىنىشتاۋ, اعاش تا, كوك تە مول, كوشەلەرى تاپ-تازا, قايدا قاراساڭ ءبىر-بىرىنە ۇقسامايتىن ساۋلەتتى عيماراتتار سۇلۋلىعى كوز قارىق­تىرعان تاڭ-تاماشاسىن, ارينە, اق ءۇي, كاپيتولي اسىرىپ تۇراتىندىعى بەلگىلى. ەلدىڭ ءبىرىنشى پرەزيدەنتى ۆاشينگتونعا ارنالعان, بارىنەن بيىك شانشىلا بىتكەن اق وبەليسك اسقاق كوزگە تۇسەدى. اقش تاۋەلسىزدىگى دەكلاراتسياسىنىڭ اۆتورى دجوردج دجەففەرسوننىڭ پوتوماكا وزەنى جاعالاۋىنداعى مەموريالى الىس­تان اعاراڭدايدى. ءبىر قىزىعى, قولىنداعى قالا كارتاسىمەن قالاعان جەرىڭدى تەز تاۋىپ الا قوياسىڭ. امەريكالىق ۇندىستەر مۇراجايىن كورۋگە شىققان ءبىز دە كارتا مەن ءتۇسىندىرۋشى, ءجون سىلتەۋشىلەردىڭ كومەگىمەن بىرەر ساعاتتاي جاياۋلاپ ءدال تۇبىنەن تۇستىك. سويتسەك, كاپيتوليدەن تاياق تاستام تۇستا بولىپ شىقتى. كىم-كىمگە دە ەسىگى اشىق, ءتورت قاباتتاعى جادىگەرلەرى قىزعىلىقتى, اسىقپاي ارالايمىن دەسەڭ بارلىق جاعداي جاسالعان, مۇراجايدى ءبىر كورۋ ازدىق ەتەدى ەكەن. ءجا, مۇنى جەكە تاقىرىپتا ءسوز ەتپەك بولعاندىقتان, نەگىزگى اڭگىمەمىزگە ورا­لايىق. دج.ف.كەننەدي اتىنداعى ونەر ورتالىعى جوبالى ۋاقىتتا جينالۋ­شىلارعا لىق تولا باستادى. 2400 ورىندىق زالداعى ۇلكەندەر دە, جاستار دا ارالاس كورەرمەندەر الدىنا مادەنيەت ۆيتسە-ءمينيسترى ا.بورىباەۆ پەن اقش مەملەكەتتىك حاتشىسىنىڭ وڭتۇستىك جانە ورتالىق ازيا ماسەلەلەرى بويىنشا كومەكشىسى نيشا بيسۆال كوتەرىلىپ, قاتىسۋشىلاردى قازاقستاننىڭ ۆاشينگ­تونداعى مادەنيەت كۇندەرىنىڭ اشىلۋىمەن قۇتتىقتادى. جۇرگىزۋشىلەر ءادىل احمەتوۆ پەن كەرەن و’كەننەللدىڭ حابارلاۋىمەن ساحنادان قۇرمانعازىنىڭ «سارىارقا» كۇيى توگىلە جونەلدى. «پارىز», «ارمانداستار», «كەك» فيلمدەرىندە باستى رولدەردى بەينەلەگەن, «قارا شاڭىراق» 100 سەريالى تۋىندىدا سپورتشىنى ويناۋشى ءادىل استاناداعى «جاستار» تەاترىنىڭ اكتەرى رەتىندە دە تانىمال. ورايى كەلگەندە الىس جەردە ەلىمىزدىڭ مەرەيىن وسىرگەن ءداستۇرلى انشىلەر بەيبىت مۇساەۆ, ايگۇل قوسانوۆانىڭ اۋەلەتكەن اۋەندەرى تىڭداۋشىلاردى سۇيسىندىرگەنىن جۇزدەرىنەن اڭعارۋ قيىن ەمەس-ءتى. ۇلتتىق ءداستۇردىڭ بۇلايشا ساباق­تاسۋىنا ريزالىق سەزىم كورەرمەندەردىڭ ءبىرى ەليوت ەليوتتىڭ لەبىزىنەن ءبىلىن­دى. ونىڭ ايتۋىنشا, جاھاندانۋ ءداۋى­رىندە جۇتىلىپ كەتپەۋى ءۇشىن ۇلتتىق قۇندىلىقتاردى قۇنتتاپ, رۋحاني بايلىقتى ساقتاۋدىڭ قازاقستاندىق ۇلگىسى ۇيرەنەرلىك ەكەن. ءۆيۆالديدىڭ «جىل مەزگىلدەرىن» وركەسترمەن بىرگە سكريپكادا سىزىلتقان ءورىم قىزدار الۋا ماقانوۆا مەن نۇريا كارىمباەۆانىڭ ونەرى ءداستۇر جاراسىمدىلىعىن تانىتقاندىعىن دا ايتىپ ءوتتى. ايتا كەتۋ كەرەك, ەلىمىزدىڭ مادەنيەت كۇندەرى, اسىرەسە, وسى قالالارداعى قازاق قاۋىمىنا اسا قۋانىش سىيلاعان ەستەن كەتپەس وقيعا بولدى. نيۋ-يوركتەگى كونتسەرتكە قانداستارىمىزدى قاتىستىرۋعا جۇمىلدىرۋشى امەريكا قازاقتارى قاۋىمداستىعىنىڭ جەتەكشىسى, ناسا عالىمى دارحان نۇرماعامبەتتىڭ زالداعى كوزگە جىلى بەينەلەردى كوپتەپ كورگەن سايىن كوڭىلى وسكەنىن تۇسىندىك. سولاردىڭ ءبىرى, تەگى قوستانايلىق بەكسۇل­تان قالماعامبەت بايبىشەسىمەن بىرگە نەمەرەلەرىن ەرتە كەلىپتى. ءار ءان, ءار كۇي سايىن جانارلارىنا جاس ىركىلىپ, تۋعان توپىراقتىڭ سازىن ساعىنىپ قالعاندىقتارىن جاسىرمايدى. شىركىن, قازاق قاي جەردە دە قازاق قوي. «ۇيگە جۇرىڭىزدەر, ءدام تاتىڭىزدار», دەيدى. ۆاشينگتونداعى كونتسەرت سوڭىندا دا بارىمىزگە جالتاقتاپ قاراي بەرگەن قازاق ايەلىمەن كەزدەستىك. ول ماسكەۋدە وقىپ جۇرگەنىندە تاعدىر جازۋىمەن امەري­كالىق ازامات دەۆيد ستاينمەن تابىسىپتى. قازاقستان مادەنيەتى كۇندەرى وتەتىنىن ەستىپ, ۆيسكانسون شتاتىنىڭ برۋكفيل قالاسىنداعى وتباسى مۇشەلەرىن تەگىس جيناپ, جەرلەستەرىنە باس قوستىرىپتى. جانىنداعى وزىندەي قاراتورى قىزى «سالەمەتسىزدەر مە» دەپ ىزەتپەن امانداسقاندا ءىشىمىز جىلىپ سالا بەرگەنى راس. «كەللي دەگەن قىزىم. قوياردا-قويماي قازاقشا سويلەۋدى ۇيرەنىپ ءجۇر. مىنا كوري ەسىمدى ۇلىم دا ناعاشى جۇرتىنىڭ ءتىلىن بىلۋگە قۇشتار», دەگەن زايىبىنىڭ تانىستىرۋىن اۋدارماشىسىز تۇسىنگەن دەۆيدتىڭ دە بىرقاعارىنا تاڭدانىپ قالدىق. «بۇلاردىڭ ۇيدە قازاقشا سويلەۋى جيىلەي تۇسكەن سوڭ ماعان قالايشا ۇيرەنبەسكە», دەپ اعىلشىنشا اعىنان جارىلعان ازاماتتىڭ كىسىلىگى مەن كىشىپەيىلدىگى بولەك كورىندى. «تالدىقورعان ماڭىنداعى سارقاند اۋدانىنداعى سارسەنباەۆتار اتتى ءتور­كىندەرىمە سالەم ايتىڭىزدار. تۇر­مى­سىمىز, كوڭىل-كۇيىمىز جاقسى. تامىزدا ءبارىمىز اۋىلعا بارىپ قايتامىز», دەگەن ءلاززات سارسەنباەۆا-ستاين سالەمى تۋىسقاندارىنىڭ  قۇلاق­تارىنا التىن سىرعا. ۆاشينگتونداعى كونتسەرت اياقتالعان سوڭ ۇلكەن قۇرامداعى دەلەگاتسيا قازاقستان رەسپۋبليكاسىنىڭ ەلشىلىك ۇيىندەگى قابىلداۋدا بولدى. ءوز شاڭىراقتارىنا كەلگەندەي مارە-سارە ونەرپازدارعا  اقش-تاعى ەلشىمىز قايرات وماروۆ مادەنيەت كۇندەرىنىڭ بىرىڭعاي مادەني كەڭىستىكتى نىعايتۋعا مۇمكىندىك بەرەتىنىن, ەكىجاقتى قارىم-قاتىناستىڭ دامۋىنا زور اسەرىن تيگىزەتىنىن, قازاق ونەرىنە دەگەن ۇلكەن قىزىعۋشىلىق تۋعىزاتىنىن ايتىپ, ەكى ەلدىڭ مادەني بايلانىستارىن نىعايتۋعا قوسقان ۇلەستەرى ءۇشىن العىس ءبىلدىردى. مەملەكەتتەر اراسىنداعى ىنتىماق­تاستىق التىن كوپىرىندەي مۇنداي ىزگىلىكتى ءىس-شارالار الداعى ۋاقىتتا جالعاسا بەرمەك. قازاقستانىمىزدىڭ رۋحاني بايلىعى فرانتسۋزدار الدىنا جايىلماق كۇن دە جاقىن. ايقىن نەسىپباي, «ەگەمەن قازاقستان». استانا – نيۋ-يورك – ۆاشينگتون – قاراعاندى. سۋرەتتەردى تۇسىرگەندەر ارتۋر ءالىپ, اناتولي ۋستينەنكو.