الماتى وبلىسىنا قاراستى, تەكەلى قالاسىندا «كوماندا جيناپ, دوبىڭدى ال» شاراسى ءوتتى. ونىڭ ماقساتى – جاسوسپىرىمدەردى دەنە تاربيەسىنە تارتۋ, ءسويتىپ, كوپشىلىك اراسىندا فۋتبولدى دامىتۋ. بۇل تەك جاسوسپىرىمدەرگە عانا ەمەس, جالپى كوپشىلىككە سپورت تۇرلەرىن ناسيحاتتاۋ, سالاۋاتتىلىققا باۋلۋ جانە جاس ۇرپاقتى رۋحاني-پاتريوتتىق باعىتتا تاربيەلەۋ, جاستار مەن جاسوسپىرىمدەر اراسىندا قۇقىق بۇزۋشىلىقتىڭ الدىن الۋ امالى بولدى. اتالعان ماڭىزدى شاراعا «نۇر وتان» پارتياسى الماتى وبلىستىق فيليالى توراعاسىنىڭ ءبىرىنشى ورىنباسارى ەرعازى قوشانبەكوۆ, تەكەلى قالاسىنىڭ اكىمى تالعات قايناربەكوۆ قاتىسىپ, دەمەۋشىلەرگە جانە جاس سپورتشىلارعا اق تىلەگىن جەتكىزدى. اكتسيا بارىسىندا بالالارعا 120 دوپ سىيعا بەرىلدى. جاسىل الاڭدا 150-گە جۋىق جاسوسپىرىمنەن قۇرالعان 12 كوماندا مەن «جەتىسۋ» كومانداسىنىڭ جانە تەكەلى قالاسىنىڭ ارداگەر اياق دوپشىلارى ءوزارا جولداستىق ويىنىن كورسەتتى.
نۇربول الدىباەۆ,
«ەگەمەن قازاقستان».
الماتى وبلىسى.