ەلوردادا «ەلدەن شىعارىلعاندار» جەدەل الدىن الۋ ءىس-شاراسى جۇرگىزىلىپ جاتىر. بەس كۇنىنىڭ قورىتىندىسى بويىنشا پوليتسەيلەر بۇرىن قازاقستاننان شىعارىلعان, بىراق سوت شەشىمىن ورىنداماعان 57 شەتەلدىك ازاماتتى انىقتادى, دەپ حابارلايدى Egemen.kz.
شەتەلدىك ازاماتتار ەلوردا اۋماعىندا زاڭسىز جۇرگەن.
ءىس-شارانى وتكىزۋ بارىسىندا وزبەكستان رەسپۋبليكاسىنىڭ 22 جاستاعى ازاماتى انىقتالدى. ول سوت شەشىمىمەن 2021 جىلى ەلدەن شىعارىلعان. شەتەلدىككە قاتىستى ماجبۇرلەپ شىعارىپ جىبەرۋ ءۇشىن 30 تاۋلىك مەرزىمگە قاماۋعا الۋعا سانكتسيا بەرىلدى.
استانا قالاسى بويىنشا مامانداندىرىلعان اۋدانارالىق سوتتا 26 شەتەلدىككە قاتىستى ەلدەن ماجبۇرلەپ شىعارىپ جىبەرۋ ءۇشىن 30 تاۋلىك مەرزىمگە سانكتسيالانعان قاماۋعا الۋ تۋرالى شەشىم قابىلداندى.
پوليتسەيلەر شىعارىپ جىبەرۋ تۋرالى شەشىمدى ورىنداماۋ قىلمىستىق جازالاناتىن ارەكەت رەتىندە ەسەپتەلەتىنىن جانە قىلمىستىق زاڭناماعا سايكەس جاۋاپتىلىققا اكەپ سوقتىراتىنىن اتاپ ءوتتى.
كوشى-قون قىزمەتىنىڭ قىزمەتكەرلەرى شەتەلدىكتەردىڭ ەلوردادا بولۋىن, ولاردىڭ شەتەلدىك ازاماتتاردىڭ قۇقىقتىق جاعدايى تۋرالى زاڭناما تالاپتارىن ساقتاۋىن, ۋاقىتىلى ەلدەن شىعۋىن تۇراقتى نەگىزدە باقىلايدى. قالا اۋماعىندا زاڭسىز كوشىپ-قونۋشىلار مەن ىشكى ىستەر ورگاندارىندا ۋاقىتىلى تىركەلمەگەن قۇقىق بۇزۋشىلاردى انىقتاۋ ماقساتىندا جۇيەلى تۇردە رەيدتەر جۇرگىزىلىپ جاتىر.