پرەزيدەنت الماتى اكىمىنىڭ بايانداماسىن تىڭدادى

مەملەكەت باسشىسىنا الماتى قالاسىنىڭ بيىلعى I توقسانداعى الەۋمەتتىك-ەكونوميكالىق دامۋ قورىتىندىسى جونىندە باياندالدى. وسى كەزەڭدە قىسقامەرزىمدى ەكونوميكالىق ينديكاتور ىسكەرلىك بەلسەندىلىك ەسەبىنەن 23,9 پايىزعا دەيىن ۇدەدى. ال ىسكەرلىك بەلسەندىلىك كورسەتكىشى 57,9 پايىزعا دەيىن ءوسىپ, وڭىرلەر اراسىندا ءبىرىنشى ورىنعا شىقتى.

پرەزيدەنتكە ەكونوميكانى ودان ءارى ءارتاراپتاندىرۋ جونىندەگى شارالار تۋرالى ەسەپ بەرىلدى. بيىل شاعىن جانە ورتا بيزنەستىڭ 3 مىڭ جوباسىنا 43 ميلليارد تەڭگە كولەمىندە قولداۋ كورسەتۋ جوسپارلانعان. فاكتورينگتىك كەلىسىمدەردى قارجىلاندىرۋ ءۇشىن قوسىمشا 4 ميلليارد تەڭگە ءبولىندى. وڭدەۋ ونەركاسىبىندەگى ءوسىمدى قامتاماسىز ەتۋ ءۇشىن 5 شاعىن ونەركاسىپ پاركى اشىلدى.

سونىمەن قاتار كەزدەسۋ بارىسىندا «الماتى قالاسىن دامىتۋدىڭ 2025 جىلعا دەيىنگى باعدارلاماسى مەن 2030 جىلعا دەيىنگى ورتامەرزىمدى پەرسپەكتيۆالارى» اياسىندا ىسكە اسىرىلىپ جاتقان الماتىنىڭ كولىك جۇيەسىن قالىپتاستىرۋ بارىسى تۋرالى مالىمەت بەرىلدى. بيىل قالادا قوعامدىق كولىكتىڭ ەكولوگياعا زياندى اسەرىن ازايتۋ تۋرالى پرەزيدەنت تاپسىرماسىن ورىنداۋعا باسا ءمان بەرىلەدى. گازبەن جۇرەتىن 600 جاڭا اۆتوبۋس جانە 100 تروللەيبۋس ساتىپ الۋ ءۇشىن 66 ميلليارد تەڭگەدەن استام قاراجات ءبولۋ جوسپارلانىپ وتىر. سونداي-اق جەكە تاسىمالداۋشىلار 650 جاڭا اۆتوبۋس پەن 31 ەلەكتروبۋس ساتىپ الادى.

بۇدان بولەك, قاسىم-جومارت توقاەۆقا جول ينفراقۇرىلىمىن جاڭعىرتۋ ساپاسىن جاقسارتۋ جوسپارى تانىستىرىلدى.

كەزدەسۋ بارىسىندا وكىلەتتىكتەردى ورتالىقسىزداندىرۋ جونىندەگى مەملەكەت باسشىسىنىڭ تاپسىرماسىن ورىنداۋ ماسەلەسىنە دە ەرەكشە نازار اۋدارىلدى. 1 ساۋىردەن باستاپ قالالىق اكىمدىكتىڭ 15 فۋنكتسياسى اۋداندىق اكىمدىكتەرگە بەرىلىپ, ولاردىڭ بيۋدجەتى 2,7 ەسە, ياعني 161,6 ميلليارد تەڭگەگە دەيىن ۇلعايتىلدى.

كەزدەسۋ سوڭىندا قاسىم-جومارت توقاەۆ ينۆەستيتسيا تارتۋ جانە الەۋمەتتىك ماڭىزى بار ازىق-ت ۇلىك تاۋارلارى باعاسىنىڭ تۇراقتىلىعىن قامتاماسىز ەتۋ شارالارىن قابىلداۋ جونىندە بىرقاتار ناقتى تاپسىرما بەردى.