ۇكىمەت باسشىسىنىڭ ورىنباسارى التاي كولگىنوۆتىڭ قىزىلوردا وبلىسىنا جۇمىس ساپارى شيەلى اۋدانىنداعى ءبىلىم, مەديتسينا ۇيىمدارى جۇمىسىمەن تانىسۋدان باستالدى. وبلىس اكىمى نۇرلىبەك نالىباەۆ التاي سەيدىر ۇلىنا سالاداعى ماسەلەلەردى تانىستىرىپ ءوتتى.
اۋدانداعى جانسەيىت ەلدى مەكەنىندەگى №133 نەگىزگى مەكتەپ اپاتتىق جاعدايدا تۇر. قىرىق بەس جىل بۇرىن سالىنعان عيماراتتا 6 سىنىپ بولمەسى, مۇعالىمدەر بولمەسى, مەديتسينالىق كابينەت قانا بار. سپورت زالى, اسحانا, اكت زالى جوق, ماتەريالدىق-تەحنيكالىق بازاسى تالاپقا ساي كەلمەيدى. قازىر مۇندا ەكى اۋىسىمدا 90 وقۋشى ءبىلىم الىپ وتىر. الدا وقۋشىلار قاتارى ارتا تۇسەتىن اۋىلعا جاڭا مەكتەپ قاجەت.
التاي كولگىنوۆ بايسىن اۋىلىنداعى 250 ورىندىق مەكتەپ قۇرىلىسىن دا كوردى. قۇنى 942,5 ملن تەڭگە بولاتىن نىسان ءبىر جىلدا بوي كوتەرەدى. اۋدان ورتالىعىنداعى ىرگەلى ءبىلىم وشاقتارىنىڭ ءبىرى – №45 مەكتەپ-گيمنازياسى عيماراتى دا اپاتتىق جاعدايدا تۇر.
– مەملەكەت باسشىسىنىڭ تاپسىرماسى بويىنشا اۋىل تۇرعىندارىنىڭ ءومىر ءسۇرۋ ساپاسىن ارتتىرۋ, اپاتتى جانە ءۇش اۋىسىمدى مەكتەپتەردى بولدىرماۋ, پەداگوگتەردى قولداۋ, قالالىق جانە اۋىلدىق مەكتەپتەردەگى ءبىلىم دەڭگەيىن تەڭەستىرۋ ءۇشىن جاعدايلار جاسالۋدا. ءۇش اۋىسىمدى جانە اپاتتى مەكتەپتەر ماسەلەسى بيىل باستالاتىن «جايلى مەكتەپ» ۇلتتىق جوباسى اياسىندا شەشىم تابادى, – دەدى التاي كولگىنوۆ. – بيىل ء«بىلىم بەرۋدى قولداۋ قورى» ەسەبىنەن قىزىلوردا وبلىسىندا 5 مەكتەپ سالىنادى, ونىڭ ىشىندە دارىندى بالالارعا ارنالعان فيزيكا-ماتەماتيكا مەكتەپ-ينتەرناتى بار.
ساپار بارىسىندا ۇكىمەت باسشىسىنىڭ ورىنباسارى شيەلى ورتالىق كوپبەيىندى اۋداندىق اۋرۋحاناسىن ارالادى. ەل ساۋلىعىن ساقتاۋدا عاسىردان استام ۋاقىت قىزمەت كورسەتىپ كەلە جاتقان مەكەمەدە 271 قىزمەتكەر جۇمىس ىستەيدى. «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 2023-2024 جىلدارى قىزىلوردادا 27 دەنساۋلىق ساقتاۋ نىسانى بوي كوتەرەدى. قىزىلوردا قالاسىندا قان ورتالىعى, ءبىر اۋىسىمدا 100 كەلۋشىگە ارنالعان ەمحاناسى جانە ونكولوگيالىق بولىمشەسى بار 300 ورىندىق كوپبەيىندى اۋرۋحانا قۇرىلىسى باستالدى.
ايماقتاعى وزەكتى ماسەلەلەردىڭ ءبىرى – جاستاردى جۇمىسپەن قامتۋ. ۇكىمەت باسشىسى ورىنباسارىمەن جاستار كەزدەسۋىندە وسى ماسەلەنى شەشۋدەگى مەملەكەت ۇسىنعان مۇمكىندىكتەر تۋرالى ايتىلدى. اتاپ ايتقاندا, جۇمىسقا ورنالاسۋعا جاردەمدەسۋ بارىسىندا جالاقىنى سۋبسيديالايتىن ء«بىرىنشى جۇمىس ورنى» جانە وقۋ ۇدەرىسىندە ەڭبەك تاجىريبەسىن جيناۋعا كومەكتەسەتىن «جاستار پراكتيكاسى» جوبالارى ىسكە قوسىلدى. «اگرارلىق نەسيە كورپوراتسياسى» اق 5-7 جىلدان اسپايتىن مەرزىمگە, جىلدىق 2,5%-دان باستاپ, يكەمدى شارتتارمەن 5 ملن تەڭگەگە دەيىن نەسيەلەر بەرۋ ارقىلى جاستاردىڭ كاسىپكەرلىك باستامالارىن قولدايدى. قىزىلوردا وبلىسىندا 2023 جىلى وسىنداي جوبالاردى ىسكە اسىرۋعا 1,2 ملرد تەڭگە ءبولۋ جوسپارلانعان. قازىر 7 ءوتىنىم ماقۇلداندى. بيزنەستى دامىتۋدىڭ تاعى ءبىر ءتاسىلى – حالىقتىڭ الەۋمەتتىك تۇرعىدان قورعالماعان توپتارى ءۇشىن وتەۋسىز گرانت تابىستاۋ.
ۆيتسە-پرەمەر جاستارمەن بەلسەندى جۇمىس ىستەۋمەن قاتار ولاردى قولداۋ باعىتتاعى تەتىكتەر تۋرالى تۇسىندىرمە جۇمىستارىن جۇرگىزۋ قاجەتتىگىنە توقتالدى.
– ەلىمىزدە مەملەكەت باسشىسىنىڭ تاپسىرماسى بويىنشا جاستار ماسەلەلەرىن شەشۋدىڭ پارمەندى تەتىكتەرى ەنگىزىلدى. بىراق كوپ جاستار مۇنداي مۇمكىندىكتەر تۋرالى بىلمەيدى. اقپاراتتاندىرۋدىڭ, كەرى بايلانىس ورناتۋدىڭ بارلىق تاسىلدەرىن قولدانۋ قاجەت, دەپ اتاپ ءوتتى ا.كولگىنوۆ.
قىزىلوردا قالاسىنا قاراستى بايمۇرات باتىر اۋىلى تۇرعىندارىمەن كەزدەسۋدە التاي كولگىنوۆ تۇرعىنداردى جۇمىسپەن قامتۋعا باعىتتالعان «اۋىل اماناتى» باعدارلاماسى تۋرالى ايتتى. باعدارلامانى قىزىلوردا وبلىسىندا جۇزەگە اسىرۋعا بيىل 3 ملرد تەڭگە قاراستىرىلعان.
– «اۋىل اماناتى» اۋىلداعىلارعا ءوز بيزنەسىن باستاۋعا نەمەسە بۇرىننان بار كاسىبىن دامىتۋعا مۇمكىندىك بەرەدى. ول ءۇشىن جەڭىلدىكپەن نەسيە مولشەرلەمەسى ەنگىزىلدى, بيۋدجەتتەن قوماقتى قاراجات بولىنۋدە. اۋىل تۇرعىندارىنان تالاپ ەتىلەتىن باستى نارسە – باستاما كوتەرۋ مەن جۇمىس ىستەۋگە دەگەن ۇمتىلىس. اۋىلدا جايلى ءومىر ءسۇرۋ ءۇشىن جاعداي جاسالىپ, مەكتەپتەر, اۋرۋحانالار, جولدار, ينجەنەرلىك ينفراقۇرىلىم سالىنۋدا. «اۋىل اماناتى» باعدارلاماسى – اۋىل تۇرعىندارىنىڭ ءومىر ءسۇرۋ دەڭگەيىن جاقسارتۋدىڭ تاعى ءبىر قادامى, – دەدى ۇكىمەت باسشىسىنىڭ ورىنباسارى.
قىزىلوردا