بۇگىنگى زامان تالابى – ۇلتتىق سانا-سەزىمى قالىپتاسقان سانالى ۇرپاق تاربيەلەۋ. ارينە, بۇل ماقساتتا قازىر بالالارعا ارنالعان ءتۇرلى ورتالىقتار جۇمىس ىستەيدى. مۇنداي ورىنداردا جاس وسكىندەر قوعاممەن ارالاسىپ قانا قويماي, وزدەرىن جاڭا قىرىنان دا تانىپ ۇيرەنەدى. جاڭا تىنىسى اشىلادى. ياعني قوسىمشا ورتالىقتار مەن ۇيىرمەلەردىڭ بالاعا بەرەر پايداسى كوپ. استانا تورىندەگى ۇلتتىق مۋزەي دە بالالارعا ۇلتتىق تاربيە بەرۋ مەن دامىتۋ ءىس-شارالارىنان كەندە ەمەس.
مەملەكەت باسشىسى قاسىم-جومارت توقاەۆتىڭ «تۇپتەپ كەلگەندە, دامۋدىڭ بىردەن-ءبىر جولى – ءبىلىم سالاسى. سوندىقتان بۇدان ەشكىم ۇتىلمايتىنى ءسوزسىز» دەگەنىندەي ۇلتتىق مۋزەيدە بارلىق جاستاعى بالالاردىڭ قالىپتاسۋىنا, دامۋىنا باعىتتالعان ءارتۇرلى ساباق اپتا سايىن وتكىزىلىپ تۇرادى. بۇل تۋرالى ەكسكۋرسيالىق جۇمىستار, مۋزەي پەداگوگيكاسى جانە ەكسپوزيتسيالىق زالداردى ساقتاۋ قىزمەتىنىڭ باسشىسى جانار بەيىسوۆا باياندادى.
– ۇلتتىق مۋزەيدىڭ باستى باعىتتارىنىڭ ءبىرى – ەلىمىزدىڭ مادەنيەتىن, تاريحي ەسكەرتكىشتەرىن تانىمال ەتۋگە باعىتتالعان مادەني-اعارتۋشىلىق سالاسى. مۋزەي قورىندا, ەكسپوزيتسيالاردا ۇلت تاريحىنان سىر شەرتەتىن بىرەگەي ەكسپوناتتار شوعىرلانعان. مادەني-اعارتۋ باعدارلاماسىنىڭ اياسىندا «شاڭىراق», «تاريحي تۇلعا», «اسەمدىككە قۇشتارلىق», «دانا», «مۋزەيدەگى مەكتەپ كۇنى» سەكىلدى بىرنەشە جوبا بار. سونىمەن قاتار مۋزەيگە كەلۋشىلەردىڭ بارلىق كاتەگورياسىمەن جۇمىس ىستەيمىز. ماسەلەن, مادەني-اعارتۋ باعدارلاماسى اياسىندا مۇمكىندىگى شەكتەۋلى بالالارعا ارنالعان «قولونەر عالامشارى» ۇيىرمەسى اشىلدى. جىل سايىن ينكليۋزيۆتى فەستيۆال ۇيىمداستىرىلىپ تۇرادى. سونداي-اق وتكەن جىلى مۋزەيگە كەلۋشى ەرەكشە جاندار ءۇشىن «تاكتيلدى ەكسپوزيتسيا» اشىلعان بولاتىن جانە قۇلاعى دۇرىس ەستىمەيتىن كەلۋشىلەرگە سۋردواۋدارمامەن ەكسكۋرسيالار دا بار. جالپى, مادەني-اعارتۋ باعدارلاماسى اياسىندا كوپتەگەن ءىس-شارا ۇيىمداستىرىلادى. ال قازىر ناۋرىزعا ارنالعان ەرتەڭگىلىكتەر وتكىزىلۋدە, بالالاردىڭ قىسقى, جازعى دەمالىس ۋاقىتتارىمەن تۇسپا-تۇس كەلەتىن جوبالار مەن باعدارلامالار دا كوپ. بۇل ۋاقىتتاردا وقۋشىلار مۋزەيگە تەگىن كەلە الادى, – دەيدى.
سونداي-اق اتالعان مۋزەي وكىلىنىڭ ايتۋىنشا, بالالار وزدەرى وقىپ, ۇيرەنىپ, مۋزەي بويىنشا ەكسكۋرسيا جۇرگىزەتىن «ميراس» ۇيىرمەسى جۇمىس ىستەپ تۇر. ودان بولەك مەكتەپكە دەيىنگى بالالاردىڭ مۋزەيدى ارالاۋىنا ارنالعان «بالدىرعان گيد» باعدارلاماسى بار. مۋزەيدەگى كانيكۋلدار بالالار ورتالىعىندا جۇزەگە اسىرىلادى. اۋقىمدى جوبالاردىڭ ءبىرى رەتىندە «مۋزەيدەگى مەكتەپ كۇنىن» جوباسىن اتاپ وتۋگە بولادى. ياعني مۇعالىمدەر, عىلىمي قىزمەتكەرلەر وقۋشىلارعا كۇنتىزبەلىك جوسپارمەن ساباق وتكىزەدى. ماسەلەن, ءار بەيسەنبىنى «تاريح ساباعى كۇنى» دەۋگە بولادى. وسى جوبا اياسىندا تۇسىرىلگەن بەينەساباقتار دا بار, ونىڭ بارلىعىن سايت ارقىلى كورىپ, مەكتەپ وقىتۋشىلارى ساباقتارىندا قولدانا الادى.
مۋزەيدەگى سونداي ۇيىرمەلەردىڭ ءبىرى – «كوركەم بەينەلەۋ ونەرى». جەتەكشىسى – ەۋرازيا ديزاينەرلەر وداعىنىڭ, قازاقستان سۋرەتشىلەر وداعىنىڭ مۇشەسى مۇحتار بايبوسىن. العاشىندا 5 وقۋشىمەن ءوز جۇمىسىن باستاعان ۇيىرمەگە قازىر كەلۋشىلەر كوپ. اپتاسىنا ەكى رەت وتكىزىلەتىن ساباقتا وقۋشىلار بەينەلەۋ ونەرىنىڭ گرافيكا, كەسكىندەمە, مۇسىندەۋ جانە كومپوزيتسيا سياقتى سالالارىمەن تانىسىپ, جۇمىس ىستەيدى.
بۇگىنگى كۇنگە دەيىن ۇيىرمە قاتىسۋشىلارىنىڭ كوپتەگەن بايقاۋعا قاتىسىپ, ءبىراز جەتىستىكتەرگە جەتكەنىن دە ايتا كەتۋ كەرەك. جاقىندا عانا يۋنەسكو مەكتەبىنىڭ ۇيىمداستىرۋىمەن وتكەن «قىزىل كىتاپ بالالاردىڭ كوزىمەن» اتتى رەسپۋبليكالىق بايقاۋىندا ۇيىرمەگە قاتىسۋشى تاير بايمەنوۆ ءۇشىنشى دارەجەلى ديپلوممەن ماراپاتتالدى. ال «جىل باسى – ناۋرىز» رەسپۋبليكالىق كوركەمسۋرەت بايقاۋىندا ايشا قاسەنوۆا «ۇزدىك سۋرەت» نوميناتسياسىن جەڭىپ العان.