قاراعاندىلىق وقۋشىلار جۇرەگىندە اقاۋى بار جانداردى ەمدەۋگە ارنالعان تىڭ جوبا جاساپ شىعاردى. جوبا اۆتورلارى – نازارباەۆ زياتكەرلىك مەكتەبىنىڭ 9-سىنىپ وقۋشىلارى الديار ناقىپ پەن الپامىس يسابەكوۆ.
وقۋشىلاردىڭ «يمپلانتتالاتىن كارديوستيمۋلياتسيا جانە دەفيبريللياتسيا جۇيەسى» اتتى جوباسى استانادا وتكەن بايقاۋدا I ورىندى جەڭىپ الدى. جوبانى ءساتتى قورعاعان الديارعا قازاقستان-بريتان تەحنيكالىق ۋنيۆەرسيتەتىنىڭ گرانتى بۇيىردى. ونىڭ ايتۋىنشا, قۇرىلعى اۋرۋدىڭ ءتۇرىن بىردەن انىقتايدى. سودان سوڭ جۇرەككە سوعان وراي ەلەكتر ءيمپۋلسىن جىبەرەدى. ول يمپۋلستەر جۇرەككە كۇش بەرمەك.
– ءبىزدىڭ قۇرىلعى تەرى استىنا بەكىتىلىپ, ال ەلەكترودتار جۇرەككە قان تامىرلارى ارقىلى ورناتىلادى. قۇرىلعى اۋرۋدىڭ ءتۇرىن دەرەۋ انىقتاپ, ەلەكتر يمپۋلستەرىن جىبەرەدى. بۇل يمپۋلستەر جۇرەك بۇلشىق ەتتەرىنە ونىڭ جۇمىسىن تەجەپ نە جەدەلدەتۋ ارقىلى اسەر ەتەدى, – دەيدى ول.
مۇنداي كارديوستيمۋلياتسيا جانە دەفيبريللياتسيا جۇيەسى جۇرەكتىڭ تاحيكارديا, براديكارديا, جۇرەك قارىنشاسىنىڭ فيبريللياتسياسىن ەمدەۋگە كومەكتەسەدى ەكەن.
بيومەديتسينا, ينجەنەريا جانە تەحنولوگيا بايقاۋىنا التى سەكتسيا بويىنشا 100-گە جۋىق جوبا قاتىسقان. سونىڭ اراسىندا قاراعاندىلىق وقۋشىلاردىڭ تاعى ءبىر جوباسى – «اقىلدى» پروتەزدەر جانە ولاردىڭ ەلەمەنتتەرى. ەكزو جانە ەندوپروتەزدەۋ» ۇزدىك دەپ تانىلدى. سونىمەن قاتار قاراعاندىداعى NIS وقۋشىسى ۇلان مۇستافين «ادام اعزاسىنىڭ فۋنكتسيونالدىق جاي-كۇيىن مونيتورينگىلەۋگە ارنالعان اپپاراتتىق-باعدارلامالىق قۇرالدار» سەكتسياسىندا ءۇشىنشى ورىن يەلەندى.
جالپى, بۇل بايقاۋعا قاراعاندىلىق ءبىلىمپازدار بەس جوبا ۇسىنعان ەكەن. ونىڭ اراسىندا «اياق-قولدارى ءارتۇرلى ادامدارعا ارنالعان روبوتتالعان تابان», ء«سىڭدىرۋ ادىسىمەن بىرىكتىرىلگەن دارىلىك گيدروگەل», «بۇكىرلىكپەن كۇرەسۋگە ارنالعان Postrue قۇرىلعىسى جانە ءموبيلدى قوسىمشا» جوبالارى دا بار.
قاراعاندى