ادامنىڭ كاسىپ تاڭداۋىنا ەڭ الدىمەن اۋلەتى اسەر ەتەتىنى انىق قوي. قىزىلوردا وبلىستىق پوليتسيا دەپارتامەنتى تەرگەۋ باسقارماسىنىڭ اسا ماڭىزدى ىستەر جونىندەگى اعا تەرگەۋشىسى, پوليتسيا پودپولكوۆنيگى ەلميرا كۇنتۋاروۆانىڭ اكەسى مەن اعاسى پوليتسيادا قىزمەت ەتتى.
ناعاشىلارى جاعىنان دا وسى سالادا جۇرگەندەر كوپ ەدى. سوندىقتان دا 1998 جىلى مەكتەپ بىتىرگەن جالاعاشتىق قىز الماتىداعى قۇقىق جانە نارىق اكادەمياسىنىڭ ستۋدەنتى اتاندى. وقۋ ورنىن ءبىتىرىپ كەلگەنمەن جالاعاشتان جۇمىس تابىلماي كورشىلەس قارماقشى اۋداندىق ىشكى ىستەر بولىمىنە انىقتاۋشى بولىپ ورنالاسقان جاس ماماننىڭ تەرگەۋشى بولامىن دەگەن ويى جوق ەدى. ءبارى اياق استىنان بولدى. ونىڭ تياناقتىلىعىن بايقاعان باسشىلىق كوپ ۇزاماي وعان وسى جاۋاپتى قىزمەتتى جۇكتەدى. العاشقى ىستەرىنىڭ ءبىرى ادام ولىمىنە قاتىستى ەدى. اۋداندا «جوعالىپ كەتتىگە» سانالعان ءبىر ازاماتتىڭ دەنەسى سۋدان تابىلىپ, ونىڭ وق جاراقاتىنان قايتىس بولعانى انىقتالدى. مارقۇمنىڭ اينالاسىن زەرتتەپ كورسە, بار كۇدىك جەسىرىنە اۋىپ تۇر. بىراق ءىستىڭ انىق-قانىعىنا جەتپەسە ايەلدىڭ دە, ونىڭ التى بالاسىنىڭ دا وبالىنا قالماق.
– ول تۇستا وبلىستا ەكسپەرتيزا جاسايتىن دا مۇمكىندىك جوق. مارقۇمنىڭ باسىن قوراپقا سالىپ, پويىزبەن استاناعا جول تارتتىم. ەكى كۇندىك جولدان كەيىن اداسىپ ءجۇرىپ, ساراپتاما جاسايتىن ورتالىقتى ازەر تاپقانىم بار. بىراق كۇدىگىمىز تولىق راستالدى. قايتىس بولعان جىگىتكە ايەلى قوساۋىز مىلتىقتان وق اتقانىن مويىندادى. ءىس تەرگەلىپ جاتقان تۇستا 6 بالانى بالالار ۇيىنە ورنالاستىردىق. تالاي مارتە ولارعا كەزدەسۋگە بارىپ, انالارىن ىزدەپ شىرقىراعان سابيلەرگە قوسىلا سولقىلداپ جىلاپ قايتقان كەزىم ەستەن كەتپەيدى, – دەيدى تەرگەۋشى.
زامان جاڭارعان سايىن كۇنكورىستىڭ امالى دا كوبەيە تۇسەتىنى بەلگىلى. بىراق سول امال زاڭنىڭ اياسىنان اسپاۋى كەرەك. قازىر قوعامدى الاتايداي ءبۇلدىرىپ وتىرعان الاياقتار وسىدان ون شاقتى جىل بۇرىن پايدا بولا باستادى عوي. قارماقشىدان قىزىلوردا قالالىق ىشكى ىستەر بولىمىنە تەرگەۋشى بولىپ اۋىسقان ەلميراعا سول تۇستا وبلىس ورتالىعىندا سالىنىپ جاتقان جاڭا اۋدانداردىڭ بىرىنەن باسپانا الىپ بەرمەك بولىپ, وزىنە سەنگەن جۇرتتى جەر سيپاتىپ كەتكەندەردىڭ ىسىمەن اينالىسۋعا تۋرا كەلدى. اڭقاۋ جۇرتتىڭ سەنىمىنە كىرگەن اككىلەر 50-60 ادامنان 1 ملن تەڭگەدەن جيناپ الىپ, كىلتى ەندى بەرىلگەلى تۇرعان كوپقاباتتى ۇيدەن پاتەرلەردى وڭدى-سولدى «تاراتىپتى». «اكىمدىكتە تانىسىم بار», «انا ءبىر قىزمەتتە وتىرعان جان مەنىڭ ءسوزىمدى جەرگە تاستامايتىن ادامىم» دەگەن الاياقتارعا الدانعان جۇرت كوشۋگە قام جاساپ, كەيبىرى قونىستويىن تويلاپ جاتقاندا بۇل باسپانالاردىڭ باسقاعا تيەسىلى ەكەندىگىن ءبىر-اق بىلەدى عوي.
قاي ءىستىڭ دە ءوز قيىندىعى بولادى. دەسە دە بۇرىن-سوڭدى كەزدەسە قويماعان قوياننىڭ جىمىنداي مىنا ىستەن ءجىپتىڭ ءبىر ۇشىن شىعارىپ الۋ ءتىپتى دە وڭاي ەمەس ەدى. ەلميرا ۇزاق ويلاندى, ءبىراز ىزدەندى. سونىڭ ارقاسىندا 50-60 ەپيزودتان تۇراتىن ءىس بىرتە-بىرتە كىتاپ پاراعىنداي اشىلىپ, قىلمىس ايقىندالا باستادى. اقىرى الاياقتاردىڭ قىلمىسى تولىق اشكەرەلەنىپ, سوت ارقىلى جازاسىن الدى.
– قالاعا قىزمەت اۋىستىرىپ كەلگەن كەز ەدى. بىردە قاسىمداعىلار ءبىرىنشى قاباتتا ءبىر بەيتانىس ادامنىڭ شاقىرىپ تۇرعانىن ايتىپ كەلدى. كەزەكشى بولىمگە جاقىنداي بەرە وسىدان 5 جىل بۇرىن مەن تەرگەگەن ءىس بويىنشا سوتتالعان ازاماتتى تانىدىم. سەكەم السام دا, سىر بىلدىرمەي سويلەستىم. مەرزىمىنەن بۇرىن شارتتى تۇردە بوساتۋعا ىلىگىپ, كەلىپ تۇرعان بەتى ەكەن. امانداسىپ, جاعدايىن ايتقاننان كەيىن كەرى اينالىپ, كەتە باردى. اۋەلگىدە قورىققانىممەن كەيىن مۇندايعا ەتىم ۇيرەندى, – دەيدى ول.
تەرگەۋشى ومىرىندە مۇنداي دا بولادى. سوندىقتان دا بۇل سالانى ادام كوڭىلىندەگى قۇبىلىستاردى ءدوپ باساتىن سەزىمتال, باسقا جاننىڭ كوزىنە تۇسە بەرمەيتىن ەلەۋسىز جايتتى بايقايتىن قىراعى, قولى دا, جولى دا تازا جاندار عانا تاڭدايدى.
قىزىلوردا وبلىسى