فرانتسيادا 20 جىلعا سوتتالعان قازاقستان ازاماتشاسى سوفيا بودنارچۋك كىناسىز دەپ تانىلدى, دەپ حابارلايدى Egemen.kz حابار 24 ارناسىنا سىلتەمە جاساپ.
وسىدان 11 جىل بۇرىن قاراعاندى تۇرعىنى سوفيا بودنارچۋك فرانتسيا رەسپۋبليكاسىنا اتتانىپ, سول ەلدىڭ ازاماتىنا تۇرمىسقا شىققان. بىراق 2016 جىلى ونىڭ جۇبايى سوفيا مەن ەكى جاسار قىزىنىڭ كوزىنشە ءوز اتا-اناسىن اتىپ ولتىرگەن.
وقىس جاعدايدان كەيىن قازاقستان ازاماتشاسى بەس جارىم جىلعا جۋىق ۋاقىتىن فرانتسۋز تۇرمەسىندە وتكىزدى. وعان بۇل ىستە سىبايلاس بولدى دەگەن ايىپ تاعىلدى. سوت پروتسەسىندە كۇيەۋىنىڭ تۋىستارى جالداعان 6 ادۆوكات سوفيا بودنارچۋككە قارسى ءسوز سويلەدى.
بۇل رەتتە سوفياعا وتانداستارى قولداۋ ءبىلدىرىپ وتىرعان. كەيىن بۇل ىسكە بىلگىلى زاڭگەر ەدۋارد مارسيال كىرىستى.
«مەن جالعىز قالدىم. نە فرانتسۋز ءتىلىن, نە بۇل ەلدىڭ زاڭدارىن بىلمەيمىن. دەگەنمەن مەنى ەلشىلىك وكىلدەرى قولدادى. بۇرىنعى ەلشى جان عاليەۆ پەن زاڭ كەڭەسشىسى رۇستەم ومىرزاقوۆقا العىسىمدى بىلدىرەمىن. قيىن كەزەڭدە ولار ماعان قولداۋ كورسەتتى, سوت پروتسەستەرىندە بولدى», دەدى سوفيا بودنارچۋك.
ادۆوكات ەدۋارد ءمارسيالدىڭ ايتۋىنشا, ادىلەتسىز ۇكىمنىڭ باستى سەبەبى – وزگەلەردىڭ نەمقۇرايدىلىعى.
«ايىپتاۋشى تاراپ ونى سىبايلاس رەتىندە قاراستىرىپ, ايعاقتارعا سەنىمسىزدىك تانىتتى. ولار سوفيا باي فرانتسۋزدىڭ مۇلكىن يەمدەنبەك بولعان دەپ ويلادى. وسىلايشا, سوت ۇكىمىمەن 20 جىلعا باس بوستاندىعىنان ايىرىلدى. بۇل مەن ءۇشىن كۇتپەگەن شەشىم بولدى. مەن قاي جەردە, قانداي اعاتتىق جىبەرگەنىمدى تۇسىنبەدىم», دەدى ادۆوكات.
الايدا, سوڭىندا ءىس سوفيا بودنارچۋكتىڭ پايداسىنا شەشىلدى. ەندى فرانتسيا تاراپى ادىلەتسىز ۇكىمنەن كەلتىرىلگەن زالالدى وتەۋى ءتيىس.
ايتا كەتسەك, ءوزىنىڭ كىناسىزدىگىن دالەلدەگەن سوفيا ەندى اتا-انا قۇقىعىن قايتارۋعا نيەتتى.