قارجى مونيتورينگ اگەنتتىگىنىڭ استانا قالاسى بويىنشا دەپارتامەنتى قالا پروكۋراتۋراسىمەن بىرلەسىپ «Qnet» قارجى پيراميداسىن قۇرۋ جانە باسقارۋ فاكتىسى بويىنشا كۇدىكتىنى ۇستادى, دەپ حابارلايدى Egemen.kz.
ۆەدومستۆو مالىمەتىنشە, بۇل كومپانيا استانا مەن اقمولا وبلىسىنىڭ اۋماعىندا 2020 جىلدان باستاپ قازىرگى ۋاقىتقا دەيىن جۇمىس ىستەدى.
كۇدىكتى جەكە تۇلعالاردان تارتىلعان قاراجاتتى كاسىپكەرلىك قىزمەتكە پايدالانباي, «Qnet» قارجى پيراميداسىنىڭ قىزمەتىن ۇيىمداستىردى. سحەما بويىنشا ەسكى سالىمشىلاردى جاڭا كەلگەندەردىڭ جارنالارى ەسەبىنەن قايتا ءبولۋ جانە بايىتۋ ارقىلى جۇزەگە اسىرىلدى.
«Qnet» حالىقارالىق كومپانياسىنىڭ قىزمەتى جەلىلىك ماركەتينگ جانە ەلەكتروندىق كوممەرتسيا قىزمەتى تۇرىندە جاسىرىلدى. بىرقاتار شەت ەلدەردە «Qnet» كومپانياسى قارجى پيراميداسى دەپ تانىلىپ, ونى قر قارجى نارىعىن رەتتەۋ جانە دامىتۋ اگەنتتىگى قارجى پيراميداسىنىڭ بەلگىلەرى بار كومپانيالار تىزىمىنە ەنگىزدى.
وكىلەتتى ورگاننىڭ قورىتىندىسىنا سايكەس كومپانيا سالىمشىلارىنان تۇسكەن ءتۇسىم سوماسى 463 ملن تەڭگەنى قۇرادى.
استانا قالاسىنىڭ مامانداندىرىلعان تەرگەۋ سوتى كۇدىكتىگە 2 ايعا «قاماۋدا ۇستاۋ» شاراسىنا سانكتسيا بەردى.
قر قپك-ءنىڭ 201-بابىنا سايكەس وزگە اقپارات جاريا ەتۋگە جاتپايدى.