امال مەرەكەسىندە قىزىلوردادا جاڭا اۋەجايدىڭ ىرگەتاسى قالاندى. جالپى اۋماعى 7,5 مىڭ شارشى مەتردەن اساتىن عيمارات قۇنى – 31 ملن دوللاردى قۇرايدى.
– اۋە قاتىناسى ۇلكەن سۇرانىسقا يە, سەرپىندى دامىپ كەلە جاتقان سالانىڭ ءبىرى. جولاۋشىلار جانە جۇك اعىمىن ۇلعايتۋ, قىزمەت ساپاسىن جاقسارتۋ ءۇشىن اۋەجايدىڭ جاڭا تەرمينالىن سالۋ جونىندە شەشىم قابىلدانىپ, قۇرىلىس جۇمىستارى جۇرگىزىلۋدە. عيمارات بولات وتەمۇراتوۆ قورىنىڭ قارجىسى ەسەبىنەن سالىنادى. ال اكىمدىك اۋەجايدىڭ سىرتقى ينجەنەرلىك-كوممۋنيكاتسيالىق ينفراقۇرىلىمىن جەتىلدىرىپ, تەرمينال اۋماعىن اباتتاندىراتىن بولادى. جاڭا تەرمينالدا جولاۋشىلارعا حالىقارالىق ستاندارت تالاپتارىنا ساي بارلىق جاعداي قاراستىرىلعان. اتالعان جوبا ءوڭىرىمىزدىڭ الەۋمەتتىك-ەكونوميكالىق دامۋىنا وڭ اسەرىن تيگىزىپ, اۋە كولىگى قىزمەتىن حالىقارالىق دەڭگەيگە جەتكىزۋگە, اۆياتسيالىق قاۋىپسىزدىكتى كۇشەيتۋگە, جاڭا اۋە باعىتتارىن اشۋعا مۇمكىندىك ارتادى, – دەدى وبلىس اكىمى نۇرلىبەك نالىباەۆ.
جاڭا باستالعان قۇرىلىس باسىندا قوعام قايراتكەرلەرى بيعالي قايۋپوۆ پەن يبراگيم ابيبۋللاەۆ جاقسى باستاماعا جولاشار تىلەك ايتتى. نىسان پايدالانۋعا بەرىلگەن كەزدە كولىك سالاسىنىڭ كورسەتكىشتەرى بىرنەشە ەسە ارتادى. قازىر جىلىنا 1400 رەيس ورىندالسا, 2025 جىلعا قاراي بۇل سان ەكى ەسە ۇلعايادى. جولاۋشى سانى 260 مىڭنان 500 مىڭعا جەتەدى. ال جۇك تاسىمالى 150 توننادان 300 تونناعا دەيىن ارتادى دەپ بولجانۋدا.
قۇرىلىس كەزىندە 600-دەن استام ادام جۇمىسپەن قامتىلسا, اياقتالعاننان كەيىن 64 جاڭا تۇراقتى جۇمىس ورنى اشىلادى.
قىزىلوردا