پارلامەنت ءماجىلىسى مەن ءماسليحاتتار دەپۋتاتتارىنىڭ كەزەكتەن تىس سايلاۋىندا «اماNات» پارتياسىنىڭ توراعاسى ەرلان قوشانوۆ ءوز داۋىسىن بەردى, دەپ حابارلايدى Egemen.kz.
ول استانا قالاسىنداعى قوناەۆ كوشەسى, 6-ۇيدە ورنالاسقان №110 سايلاۋ ۋچاسكەسىندە داۋىس بەردى.
ەرلان قوشانوۆتىڭ ايتۋىنشا, سايلاۋ جوعارى دەڭگەيدە ۇيىمداستىرىلعان. حالىق بەلسەندى تۇردە داۋىس بەرىپ جاتىر. بۇل رەتتە ول سايلاۋدىڭ ءادىل وتەتىنىنە سەنىمدى. داۋىس بەرۋ بارىسىن باقىلاۋشىلار, سونىڭ ىشىندە حالىقارالىق بايقاۋشىلار باقىلايدى.
ء«ماجىلىس توراعاسىنىڭ كىم بولاتىنىن سايلانعان دەپۋتاتتار شەشەدى. جاڭا پارلامەنتتە كىمنىڭ بولاتىنىن حالىق شەشەدى», دەدى ەرلان قوشانوۆ.
ول سونداي-اق قازاقستاننىڭ ءار وڭىرىندەگى تۇرعىنداردىڭ نە تۋرالى ءجيى شاعىمداناتىنىن ايتتى.
«ولار جاقسىراق ءومىر سۇرگىسى كەلەدى. بىزگە قويىلعان سۇراقتاردىڭ كوپشىلىگى جەرگىلىكتى اتقارۋشى ورگانداردىڭ قۇزىرەتىنە جاتادى. مەنىڭ بۇعان كوزىم جەتتى, بۇل جولدار, سۋمەن قامتاماسىز ەتۋ, كوپتەگەن قاراپايىم تۇرمىستىق ماسەلەلەر», دەپ قوستى ول.
بۇعان دەيىن حابارلانعانداي, رەسپۋبليكا بويىنشا بارلىق 10 146 سايلاۋ ۋچاسكەسى جانە قازاقستان رەسپۋبليكاسىنىڭ شەت مەملەكەتتەردەگى وكىلدىكتەرىندەگى 18 سايلاۋ ۋچاسكەسى داۋىس بەرۋدى باستادى. شەتەلدەگى 59 سايلاۋ ۋچاسكەسى ۋاقىت بەلدەۋىندەگى ايىرماشىلىقتى ەسكەرە وتىرىپ, داۋىس بەرۋدى ەندى باستايدى.