استانادا جىل سايىن فۋتبولدان جاسوسپىرىمدەر اراسىندا وتەتىن «قازاقستان رەسپۋبليكاسى پرەزيدەنتىنىڭ كۋبوگى» ءتۋرنيرى باستالدى.
وعان «ا» جانە «ۆ» توبىنا بولىنگەن 6 ەلدىڭ قۇراما كوماندالارى قاتىسۋدا. قازاقستان جاسوسپىرىمدەر جاساعى «ا» توبىندا گرۋزيا جانە قىرعىزستاندىق قۇرداستارىمەن كەزدەسسە, كەلەسى توپتا يسپانيا, ازەربايجان مەن تاجىكستان قۇرامالارى كۇش سىناسادى.
كەشە ءتۋرنيردىڭ العاشقى كۇنى تاجىكستان مەن ازەربايجان كوماندالارى كەزدەستى. بۇل ماتچتا تاجىك جاستارىنىڭ جولى بولىپ, قارسىلاسىن 2:1 ەسەبىمەن ۇتتى. ءتۋرنيردىڭ تۇساۋكەسەر ويىنىندا ميروجيددين حولوۆتىڭ شاكىرتتەرى اپشەرون تۇبەگىنىڭ وكىلدەرىنە قاراعاندا قىزىقتى جانە تارتىستى ويىن ورنەگىن كورسەتتى. ولار ماتچ بويى ويىن تىزگىنىن ءوز باقىلاۋلارىندا ۇستاپ, قارسىلاستار قاقپاسىنا 90 مينۋت بويى قاۋىپ ءتوندىرىپ وتىردى. ەندى تاجىكتەر يسپانيامەن كەزدەسەدى.
«ا» توبىنداعى كەزدەسۋلەردىڭ دە قىزىقتى وتەتىنىن ايتا كەتۋ كەرەك. بۇل جەردە ءبىزدىڭ كومانداعا گرۋزيا جاساعى ەڭ باستى قارسىلاس بولايىن دەپ تۇر. دەگەنمەن, كىمنىڭ كۇشتى ەكەنىن «استانا-ارەنانىڭ» كوكمايسا الاڭىندا كورەتىن بولامىز.
داستان كەنجالين,
«ەگەمەن قازاقستان».