وسىدان ءبىراز بۇرىن قازالى اۋدانىنداعى ءۇرماش تۇكتىباەۆ اۋىلىنىڭ تۇرعىنى پەرۋزا بەكەننىڭ باسپاناسى اياق استىنان وتقا ورانىپ, ءبىر ءۇيلى جان دالادا قالعان بولاتىن. اۋىلداستارى قىستىڭ كوزى قىراۋدا ءۇيسىز قالعانداردىڭ جانىنان تابىلىپ, كومەگىن ايامادى. ولاردىڭ قينالعان جانعا كومەك كورسەتۋ جايىنداعى كوپشىلىككە ۇندەۋىن كورشىلەس بەكارىستان بي جانە مايداكول اۋىلدارىنىڭ تۇرعىندارى دا قولداپ, ۇلەستەرىن قوستى. از ۋاقىت ىشىندە باسپاناعا قاجەتتى قارجى جينالىپ, جاقىندا پەرۋزا بەكەنگە ءۇيدىڭ كىلتى تابىستالدى.
شاراعا قاتىسقان اۋدان اكىمى مۇحتار ورازباەۆ قينالعان جاندى قاعاجۋ قالدىرماي, قامقورلىق تانىتقان اۋىلداعىلارعا العىس ايتىپ, يگى باستامانىڭ ىسكە اسۋىنا ۇيىتقى بولعان جانيەت وتەگەن, بالىقباي تورەحان ۇلى, بالعازى ايماعانبەت ۇلى, الماس ۇسەيىن ۇلى, ءىزات عابدۋللا مەن نۇرسۇلتان وڭتالاپ ۇلىنا العىسحات تابىس ەتتى.
اۋىلداستارىنىڭ ارقاسىندا جاڭا باسپانالى بولعان پەرۋزا بەكەن جەرلەستەرىنە ريزاشىلىعىن جەتكىزدى.
قىزىلوردا