مەملەكەت باسشىسى جوعارى اۋديتورلىق پالاتا توراعاسى ناتاليا گودۋنوۆانى قابىلدادى. كەزدەسۋ بارىسىندا پرەزيدەنتكە جوعارى اۋديتورلىق پالاتانىڭ بىلتىر اتقارعان جۇمىستارى جونىندە ەسەپ بەرىلدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
2022 جىلى بارلىعى 5 تريلليون تەڭگە كولەمىندەگى بيۋدجەت قارجىسى بويىنشا 124 نىساندا 20 اۋديتورلىق تەكسەرىس جۇرگىزىلگەن.
سونىمەن قاتار ناتاليا گودۋنوۆا قاسىم-جومارت توقاەۆقا جوعارى اۋديت ورگانىنىڭ وسى جىلعا جوسپارلاعان اۋديتورلىق جانە ساراپتامالىق-تالداۋ شارالارى تۋرالى مالىمەت بەردى. اتاپ ايتقاندا, جىلۋ ەنەرگەتيكا كەشەنىندە, سونداي-اق يندۋستريا جانە ينفراقۇرىلىمدىق دامۋ, ەكولوگيا جانە تابيعي رەسۋرستار, ەڭبەك جانە حالىقتى الەۋمەتتىك قورعاۋ مينيسترلىكتەرىندە جانە باسقا دا مەكەمەلەردە اۋديت جۇرگىزۋ كوزدەلىپ وتىر.
كەزدەسۋ سوڭىندا پرەزيدەنت جوعارى اۋديتورلىق پالاتانى ودان ءارى ترانسفورماتسيالاۋ جانە مەملەكەتتىك اۋديت جۇيەسىن دامىتۋ جونىندە بىرقاتار ناقتى تاپسىرما بەردى.