دۇيسەنبى كۇنى كەشكە الەم چەمپيوناتىنىڭ ءۇشىنشى تۋرىن گوللانديا مەن چيلي قۇرامالارى باستادى.
نەگىزى كوماندالاردىڭ توپتىق كەزەڭدەگى سوڭعى ويىندارىن ەرەجەگە سايكەس, «ا» توبىنىڭ قۇرامالارى باستاۋ كەرەك ەدى. الايدا, فيفا ەشكىمگە تۇسىندىرمەستەن برازيليا – كامەرۋن ماتچىن كەيىنگە شەگەردى. حالىقارالىق فۋتبول فەدەراتسياسىنىڭ بۇل شەشىمىن گوللانديانىڭ باس جاتتىقتىرۋشىسى لۋي ۆان گال سىنعا الدى. ول فيفا-نىڭ شەشىمى الاڭ يەلەرىنىڭ «ءوتىنىشتەرىن» ەسكەرىپ, گوللانديا مەن چيلي كەزدەسۋىنىڭ ناتيجەسىن ءبىلۋ ءۇشىن ادەيى جاسالعانىن, ويتكەنى, برازيليا گوللانديامەن 1/8 فينالدا كەزدەسكىسى كەلمەيتىنىن ايتتى. بۇل جەردە ۆان گالدىڭ ءسوزىنىڭ جانى بار.
جالپى, الەم چەمپيوناتى كەزىندە جارىسقا قانداي دا ءبىر وزگەرىستەر ەنگىزۋ دۇرىس ەمەس. مۇنداي جاعداي 1982 جىلى يسپانيادا وتكەن الەمدىك دودادا دا بولعانىن بىلەمىز. ەندى, مىنە, ارادا 32 جىل وتسە دە سول جاعداي تاعى قايتالانىپ وتىر. سودان فيفا-نىڭ ەشقانداي ساباق الماعانىن دا كورىپ وتىرمىز. وكىنىشتى, ارينە. باسقا ايتارىمىز جوق. ال, برازيليا بولسا ماقساتىنا جەتتى. گوللانديا مەن چيلي اراسىنداعى ويىن 2:0 ەسەبىمەن اياقتالىسىمەن قامشىنى باستى-اۋ. كامەرۋندى 4:1 ەسەبىمەن ۇتتى. ءسويتىپ, «ا» توبىندا ءبىرىنشى ورىنمەن 1/8 فينالعا شىقتى. ەندى ولار پلەي-وففتا چيلي قۇراماسىمەن كەزدەسەدى. ال گوللانديا مەكسيكا كومانداسىمەن كۇش سىناسادى. مەكسيكا حورۆاتيانى 3:1 ەسەبىمەن جەڭسە دە دوپ ايىرماشىلىعى بويىنشا برازيلياعا جەتە الماي, توپتا ەكىنشى ورىن الدى.
تاعى ايتاتىن ءبىر نارسە, برازيليا قانشاما رەت گوللانديادان قاشقاقتاسا دا ەكەۋى 1/8 فينالدا قارسىلاستارىن جەڭسە شيرەك فينالدا كەزدەسۋى مۇمكىن. «قىزىقتىڭ كوكەسىن قۋىرداق پىسىرگەندە كورەمىز» دەمەكشى, سول كەزدە برازيليانىڭ كوكمايسا الاڭىندا كەسكىلەسكەن ءبىر شايقاستىڭ بولاتىنى ءسوزسىز.
وسى كۇنى «ۆ» توبىندا ويىنداردىڭ كولەڭكەسىندە قالعان تاعى ءبىر ماتچ ءوتتى. يسپانيا اۆستراليا كومانداسىن 3:0 ەسەبىمەن ۇتتى.
قازىر كوستا-ريكا, فرانتسيا, بەلگيا, ارگەنتينا, كولۋمبيا كوماندالارى ەكىنشى تۋردان كەيىن 6 ۇپاي جيناپ, كەلەسى اينالىمعا جولداما الدى. اسىرەسە, كوستا-ريكانىڭ يتاليانى 1:0 ەسەبىمەن جەڭىپ, «D» توبىندا ءبىرىنشى ورىنمەن 1/8 فينالعا شىققانى ۇلكەن جاڭالىق بولدى. كوستا-ريكانىڭ وسى جەڭىسىن تاريحي جەڭىسكە, سەنساتسياعا بالاپ جاتقانىن ايتۋ كەرەك. ال نەگىزى, ءبىزدىڭ ويىمىزشا بۇل جەڭىستى سەنساتسيا دەۋگە دە بولمايدى. كوستا-ريكا الەمدىك دوداعا ارا-تۇرا قاتىسىپ, پلەي-وفف كەزەڭىنە شىعاتىن كوماندا. ەگەر ماسەلە يتاليانى جەڭگەنىنە تىرەلىپ تۇرسا, وندا كوستا-ريكانىڭ جەڭىسىنە ەۋروپالىقتاردىڭ وزدەرى كىنالى.
جالپى, بيىلعى چەمپيوناتتا كوماندالاردىڭ جەڭىلىسىنە جارىسقا دايىندىعى عانا ەمەس, اۋا رايىنىڭ دا اسەرى بار. كوستا-ريكا وسىلايشا ەكى ويىندا وزدەرىنە ۇيرەنشىكتى كليماتتا جەڭىسكە دەگەن جىگەرىنىڭ ارقاسىندا قارسىلاستارىن ۇتتى. ەندى «D» توبىندا ۋرۋگۆاي مەن يتاليا اراسىندا وتەتىن كەزدەسۋدە قاي ەلدىڭ جارىستى جالعاستىراتىنى بەلگىلى بولادى. بۇل كوماندالار كەشە كەشكىسىن كەزدەستى.
«ە» توبىندا فرانتسيانىڭ ءبىرىنشى ورىن العانىن ايتتىق. وسى توپتا شۆەيتساريانىڭ 1/8 فينالعا شىعۋعا ءمۇمكىندىگى كوپ. ولار گوندۋراستى جەڭسە, كەلەسى اينالىمعا شىعادى. ال ەكۆادوردىڭ فرانتسيانى جەڭۋى قيىن.
«F» توبىندا نيگەريا مەن يران تاعى ءبىر جولداماعا تالاسادى. ەگەر پارسى ەلى بوسنيانى ۇتىپ, افريكالىقتار ارگەنتينادان جەڭىلسە, وندا يران 1/8 فينالعا شىعادى. ال نيگەرياعا جولداما الۋ ءۇشىن تەڭ ويناسا دا جەتكىلىكتى.
«G» توبىندا گەرمانيا مەن اقش قۇرامالارىنىڭ مۇمكىندىگى كوپ. ەكەۋىنىڭ دە ءتورت-تورتتەن ۇپايلارى بار. ەگەر ءبىر ۇپايى بار گانا كەلەسى اينالىمعا شىققىسى كەلسە, پورتۋگاليانى ۇتىپ, اقش-تىڭ «نەمىس ماشيناسىنان» جەڭىلگەنى كەرەك. ال پورتۋگاليا تۋرالى ايتپاي-اق قويايىق. ولاردىڭ مۇمكىندىگى 90 پايىز جوق دەۋگە بولادى.
«ن» توبىندا الجير, رەسەي جانە كورەيا جولداماعا تالاسىپ جاتىر. بۇل توپتا بەلگيانىڭ 1/8 فينالعا وتكەن اپتادا شىعىپ العانىن بىلەمىز. وسى كوماندالاردىڭ اراسىندا ءالجيردىڭ مۇمكىندىگى كوپ سياقتى. ولاردىڭ جەڭىسكە دەگەن قۇلشىنىسى, جىگەرى تىم كۇشتى بولىپ تۇر.
داستان كەنجالين,
«ەگەمەن قازاقستان».