استانادا قازاقستاننىڭ قىسقى چەمپيوناتى ءوز مارەسىنە جەتتى. وندا 14 جاستاعى تەننيسشى اريانا گوگۋلينا ەرەسەكتەر اراسىندا چەمپيون اتاندى, دەپ حابارلايدى Egemen.kz قازاقستان تەننيس فەدەراتسياسىنا سىلتەمە جاساپ.
ايەلدەر اراسىندا استانالىقتار – 15-تەگى البينا كاكەنوۆا مەن ودان ءبىر جاس كىشى اريانا گوگۋلينا باس جۇلدەنى ساراپقا سالدى.
شيرەك فينالدان باستاپ اريانانىڭ كەزدەسۋلەرى تارتىستى ءوتىپ, ءۇش سەتكە سوزىلدى. فينال دا سولاي بولدى. ءبىرىنشى پارتيادا البينا 6:4 ەسەبىمەن باسىم ءتۇستى. ودان كەيىن ەكى سەتتە گوگۋلينا تارازى باسىن اۋدارا ءبىلدى – 6:2, 6:2.
وسىلايشا, قازاقستان تەننيسى تاريحىندا العاش رەت 14 جاستاعى سپورتشى ەرەسەكتەر اراسىندا جەڭىمپاز اتاندى.
قولا جۇلدە ايا مىرزاقۇلوۆانى 0:6, 6:3, 6:4 ەسەبىمەن ۇتقان ادەمى امانكەلدىگە بۇيىردى.
ەرلەر اراسىندا تيمۋر ماۋلەنوۆ ءوز سپورتتىق جولىندا ءبىرىنشى رەت ەل چەمپيونى اتاعىنا قول جەتكىزدى. ول فينالدا ارىسلانبەك ايتقۇلوۆتى جەڭدى – 7:5, 6:3. قولا جۇلدەگە نيكيتا سيدوروۆتى 6:4, 6:7 (8:10), 6:4 ەسەبىمەن جەڭگەن تيمۋر حابيبۋلين يە بولدى.
جۇپتىق سىندا مىنا تەننيسشىلەر جۇلدەگە ىلىكتى.
ەرلەر:
1. ارتۋر حايرۋتدينوۆ - ماكسيم باتيۋتەنكو
2. ءىلياس مارات ۇلى - ۆياچەسلاۆ كاۋفەلد
3. تيمۋر حابيبۋلين - ارىسلانبەك ايتقۇلوۆ.
ايەلدەر:
1. ۋليانا رومانوۆا - پولينا سلەپتسوۆا
2. ماريا سينيتسىنا - كارينا جۇماجانوۆا
3. البينا كاكەنوۆا - ايا مىرزاقۇلوۆا.