مادەنيەت جانە سپورت مينيسترلىگى بيىل 101 كىتاپ باسىپ شىعارۋدى جوسپارلاپ وتىر. ونىڭ ىشىندە 35 اتالىم قولجازباسى ساتىپ الىنعان, ولار بۇرىن ەش جەردە جاريالانباعان. بۇل تۋرالى مينيسترلىكتىڭ الەۋمەتتىك جەلىدەگى پاراقشاسىندا شىعاتىن «تىكەلەي ەفير» ايدارىندا ارحيۆ ىستەرى جانە قۇجاتتامانى باسقارۋ كوميتەتى باسپا ءىسى باسقارماسىنىڭ باسشىسى الماز مىرزاحمەت مالىمدەدى.
«جەكە جانە زاڭدى تۇلعالاردان تۇسكەن وتىنىمدەردى ساراپتاما كوميسسياسى قارايدى. كوميسسيا ۇسىنىلعان كىتاپتىڭ كوركەمدىك قۇندىلىعىنا ءمان بەرىپ, سونداي-اق ساتىپ الۋدىڭ وزەكتىلىگى, ورىندىلىعى تۇرعىسىنان زەردەلەپ, قورىتىندى شىعارادى. ساراپشىنىڭ وڭ قورىتىندىسىن العان ادەبيەتتەر ۆەدومستۆوارالىق كوميسسيا شەشىمىمەن باسىپ شىعارىلاتىن ادەبيەتتەر تىزىمىنە ەنگىزىلەدى. وتىنىمدەر جىل سايىن كوركەم ادەبيەت, بالالار مەن جاسوسپىرىمدەرگە ارنالعان ادەبيەت, مادەنيەت جانە ونەر تۋرالى ادەبيەت, ەنتسيكلوپەديالىق-انىقتامالىق ادەبيەت, عىلىمي-كوپشىلىك ادەبيەت, قوعامدىق-ساياسي ادەبيەت, اۋدارما ادەبيەتى, مەرەيتويلار مەن اتاۋلى كۇندەرگە ارنالعان ادەبيەت تۇرلەرى بويىنشا قابىلدانادى», دەدى الماز مىرزاحمەت.
وتكەن جىلى 188 اتالىم بويىنشا ادەبيەتتەر 506 مىڭ دانامەن باسىلىپ شىعىپ, بارلىق وڭىردەگى مەملەكەتتىك كىتاپحانالارعا تاراتىلعانىن ايتا كەتكەن ءجون. ونىڭ ىشىندە «جاڭا قازاق ادەبيەتى» سەرياسى بويىنشا جارىق كورگەن كىتاپتار وقىرماننىڭ جوعارى باعاسىنا يە بولعانى ايتىلدى.