«Amanat» پارتياسىنىڭ رەسپۋبليكالىق سايلاۋالدى شتابى ۇگىت-ناسيحات ناۋقانىن وڭىرلەردە جالعاستىردى. پارلامەنت ءماجىلىسىنىڭ دەپۋتاتتىعىنا كانديدات اسحات ايماعامبەتوۆ تۇركىستان وبلىسىنداعى سايلاۋشىلارمەن جۇزدەستى.
شتاب مۇشەلەرى الدىمەن «Farab Library» كىتاپحاناسىندا اقساقالدار, زيالى قاۋىممەن كەزدەسۋ وتكىزدى. مۇندا اماناتتىقتار ۇلت رۋحانياتىن, مادەنيەتى مەن ونەرىن دامىتۋ ماسەلەلەرىن تالقىلاپ, پارتيانىڭ «حالىقپەن بىرگە!» سايلاۋالدى باعدارلاماسىندا قامتىلعان وزگە دە باستامالاردى تانىستىردى. بۇدان سوڭ اسحات ايماعامبەتوۆ ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ستۋدەنتتەرىمەن, ءبىلىم ورداسىنىڭ پروفەسسورلىق وقىتۋشىلار قۇرامىمەن جۇزدەستى.
– بۇگىن سىزدەرمەن ەلىمىزدىڭ قوعامدىق-ساياسي ومىرىندەگى ماڭىزدى وقيعا قارساڭىندا ديدارلاسىپ وتىرمىز. وزدەرىڭىز بىلەتىندەي, كۇنى كەشە «Amanat» پارتياسىنىڭ سايلاۋالدى باعدارلاماسى جاريالاندى. ءبىزدىڭ باعىتىمىز – ايقىن, ۇستانىمىمىز – بەرىك. ءبىز جەمقورلىق پەن قىمباتشىلىقتىڭ الدىن الىپ, دەنساۋلىق ساقتاۋ سالاسىنداعى ءتۇرلى كەدەرگىلەرمەن كۇرەسىپ, اشىق, ادىلەتتى قوعام قۇرۋدى كوزدەيمىز. سوندىقتان وسى ماقساتتارىمىزدى سايلاۋالدى باعدارلامادا 10 نەگىزگى باعىت بويىنشا توپتاستىردىق. ونىڭ ىشىندە ءبىلىم جانە عىلىم سالاسى دا قامتىلدى, – دەدى ا.ايماعامبەتوۆ.
ونىڭ ايتۋىنشا, اتالعان سالادا بۇعان دەيىن دە اۋقىمدى جۇمىس اتقارىلدى. الايدا دامىتۋدى, جەتىلدىرۋدى جانە ەرەكشە نازار اۋدارۋدى قاجەت ەتەتىن ماسەلەلەر ءالى دە بار.
– پارتيانىڭ سايلاۋالدى باعدارلاماسىندا حالىقتى تولعاندارعان تۇيتكىلدى ماسەلەلەردىڭ باسىم بولىگى قامتىلدى. سونىڭ ىشىندە, جوعارى وقۋ ورىندارىنىڭ ماتەريالدىق-تەحنيكالىق بازاسىن جاڭعىرتۋ, گرانت سانىن كوبەيتۋ, شاكىرتاقىنى كوبەيتۋ, وقىتۋشىلاردىڭ جالاقىسىن ءوسىرۋ, ستوماتولوگيا, پەدياتريا ماماندىقتارىنا ءمان بەرۋ باستامالارى دا كورىنىس تاپتى. ءبىز جالعان ۇران تاستاپ, ورىندالمايتىن ۋادە بەرمەيمىز, – دەدى كانديدات.
كەزدەسۋ بارىسىندا اسحات ايماعامبەتوۆ ستۋدەنتتەردىڭ سۇراعىنا جاۋاپ بەرىپ, ءتۇرلى تاقىرىپقا قاتىستى ويىن ورتاعا سالدى.