1989 جىلدىڭ جازىندا كوكشەتاۋ وبلىستىق پارتيا كوميتەتىنىڭ ءبىرىنشى حاتشىلىعىنا بۇرىن تسەلينوگراد وبلىستىق اتقارۋ كوميتەتىنىڭ توراعاسى بولىپ ىستەگەن قاسىم تاۋكەنوۆ سايلاندى. ول كوكشە ءوڭىرى ەكونوميكاسىنىڭ وزەكتى ماسەلەلەرىمەن قاتار, رۋحانيات سالاسىنا دا ايرىقشا كوڭىل ءبولىپ, اسىرەسە, جەرگىلىكتى قازاق زيالىلارىنىڭ كوكەيلەرىندە جۇرگەن تولعاقتى ماسەلەلەرگە بىلەك سىبانا كىرىسىپ, ۇلتتىق نامىسى, ازاماتتىق پاراساتى بيىك, ءبىرتۋار تۇلعا ەكەندىگىن تانىتتى. بارىنەن دە ونىڭ وبلىس ورتالىعىنا جان-جاقتان كىرەتىن جولداردىڭ قالا شەكاراسىنداعى تۇستارىندا ورناتىلعان جانە جەرگىلىكتى اۋەجاي عيماراتىنىڭ ماڭداي بەتىندە ۇلكەن ارىپتەرمەن جازۋلى تۇرعان «كوكچەتاۆ» دەگەن اتاۋدى جوعارى جاقتان رۇقسات الماستان, ءارى شاھاردىڭ ءورىستىلدى جۇرتشىلىعىنان ەش يمەنبەستەن, تەز ارادا «كوكشەتاۋ» دەپ وزگەرتكەن باتىلدىعى ەل ىشىنە اڭىزداي تاراپ كەتكەن ەدى. سونىسى ءۇشىن ءتىپتى, وزىنە جۇرت الدىندا سىن ايتقان كسرو جوعارعى كەڭەسى ۇلتتار كەڭەسىنىڭ ۇلتتىق ساياسات جانە ۇلتارالىق قاتىناستار جونىندەگى كوميسسياسى توراعاسىنىڭ ورىنباسارى ەركىن اۋەلبەكوۆكە سول ارادا قاتتى تويتارىس بەرگەندىگىن ەستىپ, قاسىم اپپاس ۇلىنىڭ ەشكىمنىڭ بەت-جۇزىنە قارامايتىن شىنشىلدىعى مەن سوزگە شەشەندىگىنە قايران قالعانبىز... كەلەسى جىلى كوكتەمدە كوكشەتاۋدا كەزەكتى وبلىستىق ەسەپ بەرۋ-سايلاۋ پارتيا كونفەرەنتسياسى وتكىزىلىپ, وعان قازاقستان كومپارتياسى ورتالىق كوميتەتىنىڭ ءبىرىنشى حاتشىسى, قازاق كسر پرەزيدەنتى نۇرسۇلتان نازارباەۆ ارنايى كەلىپ قاتىستى. ۇيىمدىق ماسەلە قارالعاندا نۇرسۇلتان ءابىش ۇلى كوكشەتاۋ وبكومىنىڭ ءبىرىنشى حاتشىلىعىنا قاسىم تاۋكەنوۆتى قايتادان ۇسىنىپ, كونفەرەنتسيا دەلەگاتتارىنان ونىڭ كانديداتۋراسىن قولداۋدى سۇرادى. الايدا, بۇل جاريالىلىق پەن دەموكراتيالاندىرۋعا باعىت ۇستالىپ, بالامالى سايلاۋ ءۇردىسى بەل الىپ تۇرعان گورباچەۆتىك «قايتا قۇرۋ» كەزەڭى بولاتىن. سونى پايدالانعان كوكشەتاۋلىق كوممۋنيستەر ءبىرىنشى حاتشىلىققا وزدەرىنىڭ ەكى بىردەي جەرلەسىن قوسا ۇسىنىپ, داۋىس بەرۋ جابىق ادىسپەن جۇرگىزىلەتىن بولىپ شەشىلدى. ونىڭ قورىتىندىسى بويىنشا اقمولالىق قاسىم تاۋكەنوۆ بيلىكتەن تايدىرىلىپ, تسەلينوگراد وبكومىنىڭ اۋىل شارۋاشىلىعى جونىندەگى حاتشىسى بولىپ ىستەپ جۇرگەن كوكشەتاۋلىق چاپاي ءابۋتالىپوۆ جەڭىسكە جەتتى. بۇعان, شىندىعىن ايتساق, جەرگىلىكتى پارتوكراتتار بولماسا, كوزى اشىق, كوكىرەگى وياۋ قازاق زيالىلارى, اسىرەسە, ءوزىم سول كەزدە ەڭبەك ەتىپ جۇرگەن وبلىستىق «كوكشەتاۋ» گازەتىنىڭ جۋرناليستەرى قول سوعىپ, قۋانا قويعان جوق. قاسىم اپپاس ۇلى سىندى ازاماتتىڭ الدىنان ور قازىپ قۇلاتىپ, استىنداعى اقبوز ارعىماعىن كوپ بولىپ جابىلىپ, كۇشتەپ تارتىپ العانداي, كوكشەنىڭ ەل-جۇرتىنا ۇلكەن ۇيات كەلتىرگەن ابىرويسىز ءىس بولعان ەدى بۇل, ءبىزدىڭ پىكىرىمىزشە. ال نۇرسۇلتان نازارباەۆ ءوز ۇسىنىسىن قولداماي, جەرشىلدىك پيعىل تانىتقان كوكشەلىك كوممۋنيستەر شەشىمىنە سول كەزدەگى پارتيالىق تارتىپكە باعىنىپ, اشىق قارسىلىق بىلدىرمەگەنىمەن, ىشتەي رەنجىپ تە كەتكەن شىعار. سول جىلى كۇزدە مەن رەسپۋبليكالىق «سوتسياليستىك قازاقستان» گازەتىنىڭ كوكشەتاۋ وبلىسىنداعى مەنشىكتى ءتىلشىسى بولىپ تاعايىندالدىم. كوكشەلىكتەر وسى كەزدە ء«ولى رازى بولماي, ءتىرى بايىمايدى» دەگەن قاستەرلى ۇعىمعا دەن قويىپ, قيلى زاماندا ءۇش ءجۇزدىڭ باسىن قوسقان ۇلى ابىلاي حاننىڭ 280 جىلدىعىن كەلەسى جىلى رەسپۋبليكا دەڭگەيىندە اتاپ ءوتۋ جونىندە باستاما كوتەردى. بىراق, قازاقستان كومپارتياسى باسشىلىعىنىڭ وسى جونىندەگى پىكىرىن بىلۋگە جۇرەكسىنگەن وبكوم باسشىلارى جەرگىلىكتى زيالىلاردىڭ ۇسىنىسىنا قارسىلىق تا بىلدىرمەي, قولداۋ دا كورسەتپەي, ءالىپتىڭ اياعىن كۇتەتىن سىڭاي تانىتتى. ءسويتىپ, بۇل ماسەلەنىڭ باسى اشىلماي, وبكوم تاراپىنان بىرنەشە اي بويى ۇنسىزدىك ورنادى. كوكشەلىكتەر ابىلاي حان بابامىزعا العاش رەت اس بەرىپ, ارۋاعىن ريزا ەتسەك دەپ اسىعا كۇتكەن 1991 جىل دا كەلدى. سول جىلدىڭ باسىندا «سوتسياليستىك قازاقستاننىڭ» وبلىستارداعى مەنشىكتى تىلشىلەرىنىڭ بارلىعى الماتىعا شاقىرىلىپ, گازەتتىڭ باس رەداكتورى شەرحان مۇرتازا ۇلكەن جينالىس وتكىزدى. سودان كەيىن رەداكتسيا باسشىلارى مەن ءبىزدى قازاقستان كومپارتياسى ورتالىق كوميتەتىنىڭ ءبىرىنشى حاتشىسى, رەسپۋبليكا پرەزيدەنتى نۇرسۇلتان نازارباەۆ قابىلداپ, ەل ءومىرىنىڭ نەبىر وزەكتى ماسەلەلەرى جونىندە كەڭىنەن اڭگىمە ءوربىتتى. – سىزدەردى مەن ەل ىشىندەگى كوزىم مەن قۇلاعىم دەپ سانايمىن. وبلىستارداعى جاعدايدى شىنايى جازىپ, كەمشىلىككە جول بەرگەن باسشىلاردى اياماي سىناڭىزدار. ەشكىمنەن قايمىقپاڭىزدار! – دەدى نۇرسۇلتان ءابىش ۇلى. پرەزيدەنت: – ماعان قوياتىن سۇراقتارىڭىز بولسا, ايتىڭىزدار, – دەگەن سوڭ رەسپۋبليكانىڭ ءار تۇكپىرىنەن جينالعان تىلشىلەر ەلباسىعا ساۋالدى جان-جاقتان جاۋدىردى. رەسپۋبليكانىڭ ءبىرىنشى باسشىسىنىڭ قابىلداۋىندا ءبىرىنشى رەت بولعاندىقتان, باستاپقىدا ءسال قوبالجىڭقىراپ تۇرعان ماعان دا باتىلدىق ءبىتىپ, كوكشەلىكتەر كوكەيىندە جۇرگەن ابىلاي حاننىڭ 280 جىلدىعىن تويلاۋ ماسەلەسىن كوتەردىم. – كوكشەتاۋلىقتار ابىلاي حان اسىن وتكىزەمىز دەسە, وعان مەنىڭ ەشقانداي قارسىلىعىم جوق, – دەپ كەسىمدى ءسوزىن ايتتى ەلباسى مەنىڭ ساۋالىما ىلە جاۋاپ قايتارىپ. نۇرسۇلتان ءابىش ۇلىنىڭ بۇل پىكىرىنە جالعىز مەن عانا ەمەس, بارشا ارىپتەستەرىم ءدان ريزا بولىپ, مارقايىپ قالدى. ويتكەنى, ءامىرى كۇشتى كەڭەس وداعىنا جاريالىلىق زامانى كەلىپ, كومپارتيا السىرەي باستاعانىمەن, ءالى دە تۇعىرىنان تايماعان كەز-تۇعىن بۇل. ونىڭ ۇستىنە, بۇعان دەيىن ەلىمىزدە ەشبىر حاننىڭ مەرەيتويى اتالىپ كورمەگەن بولاتىن. سوندىقتان دا, ەلباسىنىڭ ابىلاي حان اسىن وتكىزۋ جونىندەگى ۇسىنىسقا بىردەن قولداۋ ءبىلدىرۋى, ءسوز جوق, باتىل شەشىم ەدى. بۇل جاعىمدى حابار كوكشەتاۋ وبلىسى باسشىلارىنىڭ دا قۇلاعىنا تەزدەتىپ جەتكىزىلىپ, دايىندىق جۇمىستارى قىزۋ قولعا الىندى. جازدا كەزىندە ابىلاي حان اق ورداسىن تىككەن بۋراباي باۋرايىندا ۇلكەن اس ۇيىمداستىرىلىپ, وعان سول كەزدەگى پرەمەر-ءمينيستردىڭ ورىنباسارى مىرزاتاي جولداسبەكوۆ باستاعان رەسمي ادامدار, قوعام قايراتكەرلەرى, بەلگىلى عالىمدار مەن اقىن-جازۋشىلار, ونەر يەلەرى, بارلىق وبلىستاردىڭ دەلەگاتسيالارى قاتىستى. «ابىلايدىڭ اسىندا شاپپاعاندا, اتاڭنىڭ باسىندا شاباسىڭ با؟!.» دەگەن ەسكى ءسوز دە ەسكە ءتۇسىرىلىپ, حان تويى تاماشا ءوتتى. ال مەن سول تويدىڭ ۇيىمداستىرىلۋىنا كوكشەلىكتەر اتىنان ەلباسىنىڭ رۇقساتىن سۇراعان ادام بولعانىمدى ءومىر بويى ىشتەي ماقتانىش تۇتىپ وتەتىن شىعارمىن... قيلى كەزەڭدە اللا جارىلقاپ, ءوز تاۋەلسىزدىگىن جاريالاعان تۋعان ەلىمىزدەگى بيلىك تىزگىنىن قولىنا العان تۇڭعىش پرەزيدەنتىمىز نۇرسۇلتان نازارباەۆتىڭ اتا-بابالارىمىزدىڭ قانى مەن تەرى توگىلگەن قاسيەتتى جەرىمىزدىڭ تاعدىرى تۋرالى تەرەڭ تولعانۋىنا تۋرا كەلگەنى كامىل. سوندىقتان دا ەلباسىنىڭ ەل مەن جەر تۇتاستىعىن ساقتاۋ قامىمەن كوپشىلىككە ۇناي بەرمەيتىن, توسىن دا كۇردەلى شەشىمدەر قابىلداۋىنا تۋرا كەلگەندىگى انىق. سولاردىڭ ءبىرى – 1997 جىلعى كوكتەمدە سولتۇستىك قازاقستان وبلىسى مەن كورشىلەس كوكشەتاۋ وبلىسىنىڭ بىرىكتىرىلۋى. ىرىلەندىرىلگەن وبلىس ورتالىعى بولىپ پەتروپاۆل قالاسىنىڭ بەلگىلەنۋى بىزگە, كوكشەتاۋلىقتارعا, وڭاي سوقپاعانىمەن, ۇلتىمىزدىڭ كوشباسشىسىنىڭ ۇيعارىمىنىڭ دۇرىستىعىنا ەش كۇمانىمىز بولعان جوق. مۇنى جاس مەملەكەتىمىزدىڭ باسشىسىنىڭ ەل ىرگەسىن بەكىتە تۇسۋگە باعىتتالعان كەزەكتى قادامى رەتىندە قابىلدادىق. كوكشەتاۋدا بيلىك باسىندا جۇرگەن قازاق ازاماتتارىنىڭ باسىم كوپشىلىگى قىزىلجارعا وبلىستىق باسقارۋ ورگاندارىنا ءبىرىنشى-ەكىنشى باسشى بولىپ اۋىستىرىلىپ, اكىمدىكتەگى, باسقارمالار مەن ءارتۇرلى ۆەدومستۆولارداعى ۇلتتىق كادرلار قاتارى بىردەن قالىڭداپ شىعا كەلدى. وبلىس تۇرعىندارىنىڭ قۇرامىنداعى قازاقتاردىڭ ۇلەس سالماعى دا اجەپتاۋىر كوبەيىپ, 30 پايىزدان اسىپ جىعىلدى. ءسويتىپ, ەنشىسىن قىزىلجاردان 1944 جىلى ءبولىپ الىپ, جەكە وتاۋ – جاڭا وبلىس بولىپ قۇرىلعان كوكشەتاۋ اراعا 53 جىل سالىپ, اتا شاڭىراققا قايتىپ ورالىپ, اتا شاڭىراقتاعى السىرەگەن ۇلتتىق رۋحتى كوتەرە ءتۇستى. سول جىلدىڭ باسىندا پەتروپاۆلدا ىشكى ىستەر مينيسترلىگى ىشكى اسكەرىنىڭ جوعارى اسكەري ۋچيليششەسى اشىلىپ, وبلىس ورتالىعىنىڭ ومبى قالاسى جاققا شىعار شەتىنە ورنالاستىرىلدى. قازىر اسكەري ينستيتۋتقا اينالدىرىلعان, جۇزدەگەن كۋرسانتتار ءتالىم-تاربيە الىپ, جۇزدەگەن وفيتسەرلەر مەن اسكەري قىزمەتشىلەر وتان الدىنداعى بورىشتارىن اتقارىپ جۇرگەن ىرگەلى ءبىلىم ورداسى كۇرەجولدىڭ بويىندا قىزىلجاردىڭ ايبىنىن اسىرىپ تۇر. ەلباسىن وبلىس ورتالىعى مارتەبەسىنەن ايىرىلعان كوكشەتاۋدىڭ تاعدىرى دا تولعاندىرعانى كامىل. ايتپەسە, اراعا ءبىر-اق جىل سالىپ, وكپە-رەنىشى ءالى دە تاراي قويماعان قالا جۇرتشىلىعىنىڭ الدىنا ءوزى بارىپ, اڭگىمە قۇرار ما ەدى استە دە؟!. كوكشەتاۋ قالالىق اكىمدىگىنىڭ ۇلكەن زالىندا وتكەن باسقوسۋعا قاتىسقان كوكشە ەلىنىڭ بەدەلدى ازاماتتارى مەن اقساقالدارى بىرىنەن سوڭ ءبىرى مىنبەرگە شىعىپ, پرەزيدەنتكە ايتار ارىزدارىن اشىق تا كىمنىڭ بولسىن جانىنا باتارلىقتاي ەتىپ ايتىپ, باعى تايىڭقىراپ تۇرعان قالانى مەملەكەت باسشىسىنىڭ ءوز قامقورلىعىنا الۋىن وتىنگەن ەدى سول جولى. زالدا وتىرعانداردىڭ اراسىندا كەزىندە نۇرسۇلتان نازارباەۆتىڭ قاسىم تاۋكەنوۆتى وبكومنىڭ ءبىرىنشى حاتشىلىعىنا سايلاۋ تۋرالى ۇسىنىسىن قابىلداماي تاستاۋدى بەلسەنە ۇيىمداستىرۋشىلار دا بار ەدى. ولاردىڭ تومەنشىكتى جۇزدەرىندە: «پرەزيدەنت ءبىزدىڭ سول قىلىعىمىزدى كەشىرەر مە ەكەن, كەشىرمەس پە ەكەن؟..» دەگەندەي الاڭداۋشىلىق بارى اڭعارىلىپ تۇردى... ال نۇرسۇلتان ءابىش ۇلى ءوزىنىڭ ونداي پەندەشىلىكتەن ادا ەكەندىگىن كورسەتىپ: – نە ىستەسەك تە, ءبارىن دە ەلدىڭ قامىن ويلاپ ىستەپ جاتقانىمىزدى تۇسىنۋگە تيىسسىزدەر, اعايىندار! وبلىس ورتالىعى ەتىپ ەلدىڭ شەتىندە تۇرعان پەتروپاۆل قالاسىن بەكەردەن-بەكەر بەلگىلەگەن جوقپىز. سونىمەن بىرگە, كوكشەتاۋدى دا جۇدەتپەۋدى ويلاپ, ەكولوگيا مينيسترلىگىن وسىندا اكەلىپ, ورنالاستىردىق. الداعى ۋاقىتتا اقمولا وبلىسىنىڭ ورتالىعىن دا وسىندا كوشىرۋىمىز مۇمكىن. بارىنە دە ۋاقىت كەرەك, شىداي تۇرىڭىزدار!.. – دەگەن ەدى اعىنان جارىلىپ. ەلباسى سول سوزىندە تۇردى – كەلەسى, 1999 جىلى اقمولا وبلىسىنىڭ ورتالىعى استانا قالاسىنان كوكشەتاۋعا كوشىرىلدى. بورىكتەرىن اسپانعا اتا قۋانعان كوكشەلىكتەرگە قىزمەت بابىمەن قىزىلجارعا قونىس اۋدارىپ كەتكەن ءبىز دە قوسىلا شاتتاندىق. 2008 جىلى تامىز ايىندا نۇرسۇلتان نازارباەۆ قىزىلجارعا قىزمەت بابىمەن كەلىپ, ءوز تاپسىرماسى بويىنشا «مادەني مۇرا» مەملەكەتتىك باعدارلاماسى اياسىندا قالپىنا كەلتىرىلگەن ابىلايدىڭ اق ءۇيىن ءوز قولىمەن اشىپ, اسا كورنەكتى تاريحي تۇلعا حاقىندا تەبىرەنە ءسوز سويلەپ: ء«بىز بۇگىندە ءوز تاۋەلسىزدىگىمىزدىڭ ارقاسىندا كوپتەگەن باتىرلارىمىز بەن تاريحتا اتى قالعان تۇلعالارعا ارناپ ەسكەرتكىشتەر سالىپ كەلەمىز. سولاردىڭ ىشىندەگى بىرەگەيى, ارينە, ابىلاي حان رەزيدەنتسياسى ەكەنى داۋسىز. قىزىلجار قالاسىنىڭ تاماشا جەرىندە ورنالاسقان مۇراجاي كەشەنى تۇرعىنداردىڭ كوزايىمىنا اينالارى ءسوزسىز. ابىلاي حان ءوز الدىنا قويعان ءۇش ماڭىزدى مىندەتىن ورىنداي الماي ومىردەن ءوتتى. ول قازاق جەرىن ءبىرتۇتاس مەملەكەتكە اينالدىرىپ, قازاقتى جەر يگەرۋگە ۇيرەتە الماعانىنا جانە قالا سالا الماعانىنا وكىنسە كەرەك. ونىڭ سول ارماندارىن بۇگىندە ءبىز جۇزەگە اسىرىپ وتىرمىز», – دەدى. سول كۇنى ەلباسى وبلىستىق اكىمدىكتىڭ ۇلكەن زالىندا وبلىس اكتيۆىنىڭ جينالىسىن وتكىزىپ, ءوڭىردىڭ ءبىرىنشى باسشىسىنىڭ اتقارىپ جاتقان جۇمىستارى تۋرالى ەسەبىن تىڭداپ, وعان سول كەزدەگى ۋاقىت تالابىنان تۋىنداپ وتىرعان جاڭا مىندەتتەر جۇكتەدى. ەلباسىنىڭ قىزىلجار وڭىرىنە ءاربىر ساپارى سولتۇستىكقازاقستاندىقتاردىڭ كارى-جاسى تۇگەل اسىعا كۇتكەن, ۇمىتىلماس وقيعا رەتىندە ەسىمىزدە ساقتالىپ قالدى. 2012 جىلى كۇزدە پەتروپاۆلعا كەلگەنىندە پرەزيدەنت ۆوكزال الاڭىندا ورناتىلعان ماعجاننىڭ جاڭا ەسكەرتكىشىن تاماشالاپ, سول جەردە جەرگىلىكتى جۇرتشىلىق وكىلدەرىمەن كەزدەستى. قاز-قاتار ءتىزىلىپ تۇرعان ارداگەرلەرگە قولىن بەرىپ, جىلى شىرايمەن امانداسىپ, ولارمەن ەمەن-جارقىن سويلەستى. ءبىر اقىن اقساقالىمىز سول ارادا پرەزيدەنتكە ارناعان ولەڭىن وقىپ بەردى. سوسىن قولىنداعى كىتابىن نۇرسۇلتان ءابىش ۇلىنا ۇسىنىپ, داۋسىن كوتەرە سويلەپ: – مىنا كىتابىمنىڭ ىشىندە ءسىزدىڭ قىزىلجارعا توقسانىنشى جىلدارى كەلگەن ساپارىڭىز جايلى ماتەريالدار دا بار. استاناداعى تۇڭعىش پرەزيدەنت مۇراجايىنا قويعىزىڭىز, – دەپ مەملەكەت باسشىسىنا نۇسقاۋ بەرگەندەي بولىپ, اڭقيىپ قاراپ تۇر... ونىڭ قۇلاققا ەرسىلەۋ ەستىلگەن سوزىنە ەلباسى ءبىر جىميىپ, ك ۇلىمسىرەپ قويدى دا, ەشتەڭە دەمەستەن, كىتاپتى الىپ, كومەكشىلەرىنىڭ ءبىرىنىڭ قولىنا ۇستاتتى. جينالعان جۇرت نۇرسۇلتان ءابىش ۇلىنىڭ جاسى ۇلكەن ادامدى سىيلاپ وسكەن قاراپايىمدىلىعى مەن كىشىپەيىلدىلىگىنە كۋا بولىپ: « ۇلىق بولساڭ, كىشىك بول» دەگەن وسى», دەسىپ, ريزا بولىپ قالىستى. ءبىز, قىزىلجارلىقتار, ەلباسىنىڭ سولتۇستىك قازاقستان وبلىسىنا كورسەتىپ كەلە جاتقان قولداۋىن ۇدايى سەزىنىپ كەلەمىز. اۋىلدىق جەرلەردەگى جولدارىنىڭ جاعدايى ءالى تۇگەل تۇزەلىپ كەتە قويماعان, ەلدى مەكەندەردىڭ تازا اۋىزسۋمەن قامتاماسىز ەتىلۋى دە اسا كوڭىل كونشىتپەيتىن, ءارى ورتاشا ەڭبەكاقى مولشەرى رەسپۋبليكا بويىنشا ەڭ تومەنگى دەڭگەيدە قالىپ وتىرعان قىزىلجار ءوڭىرىنىڭ الەۋمەتتىك-ەكونوميكالىق دامۋىنا سونى سەرپىن بەرۋ ماقساتىمەن پرەزيدەنتىمىزدىڭ كەيىنگى جىلدارى تاعايىندالعان ءۇش وبلىس اكىمىن دە «تۋعان وڭىرىنە جاندارى اشىسا, وسىلاردىڭ جاندارى اشىر» دەگەن نيەتپەن سولتۇستىكقازاقستاندىقتارعا بۇرىننان تانىمال, جەرگىلىكتى ازاماتتاردىڭ اراسىنان قويۋى دا سونى اڭعارتپاي ما؟! ءوزىمنىڭ جۋرناليستىك قىزمەتىمنىڭ ارقاسىندا ەلباسىن تەلەديداردان عانا ەمەس, شىنايى ومىردە دە سيرەك تە بولسا, كورە ءجۇرىپ, نۇرسۇلتان ءابىش ۇلىنىڭ ازاماتتىق جانە قايراتكەرلىك قاسيەتتەرى تۋرالى كوڭىلىمە تۇيگەن وي-پىكىرلەرىم وسىنداي. الماتىداي تاۋلى وڭىردە تۋىپ-ءوسىپ, الاتاۋدىڭ اسقار بيىكتىگىن دە, ۇشقان قۇستىڭ قاناتى تالعان بايتاق دالا توسىندەگى تەمىرتاۋ قالاسىنداعى وت-جالىندى ەڭبەك كورىگىندە شىڭدالىپ, سارىارقانىڭ ۇشى-قيىرسىز كەڭدىگىن دە ءوز ويى مەن بويىنا دارىتا بىلگەن ەلباسىمىز ناعىز قازاقتىڭ قانداي بولۋى قاجەتتىگىن بىزگە دە, بىزدەن كەيىنگى ۇرپاققا دا ۇقتىرىپ جۇرگەندەي. «كوپ شۋىلداق نە تابار, بيلەمەسە ءبىر كەمەل؟!» دەپ ۇلى اباي ايتىپ كەتكەندەي, بولىنۋشىلىك دەرتىنەن ءالى دە ارىلا قويماعان ۇلتىمىزدىڭ باسىن تەك وسىنداي كەمەل تۇلعا عانا بىرىكتىرىپ, ماڭگىلىك ەل بولۋ جولىمەن العا باستاپ كەلە جاتقاندىعى كۇمانسىز. كارىباي مۇسىرمان, قازاقستان حالقى اسسامبلەياسىنىڭ مۇشەسى, سولتۇستىك قازاقستان وبلىستىق ءماسليحاتىنىڭ دەپۋتاتى. پەتروپاۆل.