اقپان ايىنىڭ سوڭىنا دەيىن قازاقستان بويىنشا تاعى ءتورت وتكىزۋ بەكەتىنە ەلەكتروندى كەزەك ەنگىزىلمەك. بۇل تۋرالى قازاقستاننىڭ مەملەكەتتىك كىرىستەر كوميتەتىنىڭ ءباسپاسوز قىزمەتى حابارلادى, دەپ جازادى Egemen.kz.
ەلەكتروندى كەزەك جۇيەسىن «CarGoRuqsat» ونلاين برونداۋ سەرۆيسىن قر قم «اقپاراتتىق-ەسەپتەۋ ورتالىعى» اق ماماندارى جاساپ شىعارعان.
ءتورت وتكىزۋ بەكەتىنىڭ ەكەۋى − قىتاي شەكاراسىنداعى «باقتى» (اباي وبلىسى) جانە «مايقاپشاعاي» (شقو) بەكەتتەرى. «باقتى» بەكەتىندەگى «CarGoRuqsat» سەرۆيسى 15 اقپاننان باستاپ, ال «مايقاپشاعاي» بەكەتىندە 20 اقپاننان باستاپ ىسكە قوسىلادى. بۇعان دەيىن قازاقستان-قىتاي شەكاراسىنداعى «دوستىق», «نۇر-جولى» وتكىزۋ بەكەتتەرىندە ەلەكتروندى بەكەت ەنگىزىلگەن. ال قالعان ەكى بەكەت ەلىمىزدىڭ وڭتۇستىك-باتىسىندا ورنالاسقان. «تەمىر-بابا» بەكەتىندە كەزەك 22 اقپاندا, ال «تاجەن» بەكەتىندە 27 اقپاندا ەنگىزىلمەك. ەكى وتكىزۋ بەكەتى دە ماڭعىستاۋدا ورنالاسقان. ءبىرىنشىسى تۇرىكمەنستانمەن, ال ەكىنشىسى وزبەكستانمەن شەكارادا.
بۇگىندە جۇيەدە شامامەن كەزەكتى برونداۋ بويىنشا 84 مىڭ وپەراتسيا ورىنداعان شامامەن 7,5 مىڭ پايدالانۋشى تىركەلگەن.
مامانداردىڭ ايتۋىنشا, سەرۆيس ۇدايى جەتىلدىرىلىپ وتىرادى. جۋىق ارادا ول «Face ID», ياعني ادامنىڭ كەلبەتىن سكانەرلەۋ ارقىلى تەكسەرۋمەن تولىعىپ, شەتەلدىك ازاماتتار ءۇشىن تۇلعانى بانك كارتاسى ارقىلى راستاۋ قىزمەتى ىسكە قوسىلادى.
«مەملەكەتتىك دەرەكتەر بازاسى ارقىلى تەكسەرىستەن قازاقستاندىق تاسىمالداۋشىلار وتەتىندىكتەن, بىزدە شەتەلدىك تاسىمالداۋشىلار بويىنشا باسقا بازالارمەن ينتەگراتسيا جاسالماعان. تيىسىنشە, ايلا-شارعى جاساۋ دەرەكتەرى ورىن العان. ماسەلەن, بىرنەشە شەتەلدىك كومپانيالاردىڭ وكىلدەرى مەملەكەتتىك نومىرلەردى وزگەرتۋ, ياعني ءبىرىنشى جاعدايدا «سىزىقشا» قويىپ, ەكىنشى رەت «بوس ورىن» قالدىرۋ سەكىلدى ءبىر نومەردى تۇرلەندىرۋ ارقىلى كەزەك العان. وسىلايشا ولار جاپپاي ورىن الىپ, وسى ارقىلى ءوز كليەنتتەرىنىڭ كولىگىن جىلجىتۋ مۇمكىندىگىنە يە بولعان.
تالداۋلار كورسەتكەندەي, سەرۆيس ىسكە قوسىلعالى ەكى اي ىشىندە «دوستىق» بەكەتى ارقىلى شەكارادان 1759 كولىك قۇرالى وتكەن, ونىڭ ىشىندە 1108-ءى نەمەسە 63 پايىزى وسى پايدالانۋشىلاردىڭ كولىكتەرى.
پايدالانۋشى كەلىسىمشارتىن بۇزعانى ءۇشىن بۇل پايدالانۋشىلاردىڭ اككاۋنتتى بۇعاتتالعان. ەگەر بروندا كورسەتىلگەن ءنومىرلى فۋرالار شەكاراعا كەلسە, ولار وتە الادى, بىراق اتالعان پايدالانۋشى كەزەكتى وزگەرتۋ نەمەسە قانداي دا ءبىر بروندى جىلجىتۋ قۇقىعىنان ايىرىلادى.
ەسكە سالساق, 2022 جىلعى 23 قاراشادان باستاپ قازاقستان-قىتاي شەكاراسىنىڭ بىرنەشە بەكەتىندە «CarGoRuqsat» ەلەكتروندى كەزەك سەرۆيسى ىسكە قوسىلعان. سەرۆيستى مەملەكەتتىڭ ءجۇز پايىزدىق قاتىسۋىمەن, قر قارجى مينيسترلىگىنىڭ «اقپاراتتىق-ەسەپتەۋ ورتالىعى» اق جاساپ شىعارعان. «CarGoRuqsat» ەلەكتروندى سەرۆيستى ەنگىزۋ باستاماسى قر قم مەملەكەتتىك كىرىستەر كوميتەتى مەن قر ۇلتتىق قاۋىپسىزدىك كوميتەتىنىڭ شەكارا قىزمەتىنە تيەسىلى. سەرۆيس Qoldau.kz تسيفرلىق پلاتفورماسىندا ىسكە قوسىلعان جانە پايدالانۋشىلار ءۇشىن تەگىن.