ەلىمىزدەگى مەكتەپتەر بەينەباقىلاۋ كامەرالارىمەن تولىق قامتىلادى. بۇل تۋرالى پرەمەر-ءمينيستردىڭ ورىنباسارى التاي كولگىنوۆ ايتتى, دەپ حابارلايدى Egemen.kz حابار 24 ارناسىنا سىلتەمە جاساپ.
التاي كولگىنوۆتىڭ ايتۋىنشا, شالعاي اۋىلداردا قاۋىپسىزدىك تالاپتارىنا ساي كەلمەيتىن مەكتەپتەر بار. پەتروپاۆلداعى وقيعادان كەيىن بارلىق وڭىرلەردەگى ءبىلىم وشاقتارىنا قايتا تەكسەرۋ جۇرگىزىلەدى. بۇگىنگى كۇنى مەكتەپتەردىڭ 87 پايىزىندا دابىل تۇيمەسى ورناتىلىپ, باسىم بولىگى ليتسەنزيالىق كۇزەتپەن كەلىسىمشارت جاساعان. قازىر پەتروپاۆلدا ارنايى كوميسسيا قىزمەتتىك تەكسەرىس جۇرگىزىپ جاتىر. جاۋاپتى تۇلعالار قاتاڭ جاۋاپكەرشىلىككە تارتىلۋى مۇمكىن. بۇل تەرگەۋ امالدارىنىڭ قورىتىندىسىنان كەيىن بەلگىلى بولادى. «بۇرىنعى تاجىريبەنى ەسكەرەتىن بولساق, زەينەتكە شىققان ادامدار قاراۋىل بوپ وتىراتىن. ول ءالى دە شالعايداعى مەكتەپتەردە بار. سوندىقتان تاپسىرما وتكەن جىلى دا بەرىلگەن. بيىلعى جىلدىڭ باسىندا دا بەرىلدى. بۇرىنعىعا قاراعاندا ەداۋىر جاقساردى. بىراق الدە دە كەمشىلىكتەر بار. ونى اكىمدىكتەر, ءبىلىم بەرۋ باسقارمالارى, مەكتەپ ديرەكتورلارى قامتاماسىز ەتۋ قاجەت», دەدى پرەمەر-ءمينيستردىڭ ورىنباسارى.