سەنات سپيكەرى ماۋلەن اشىمباەۆ پالاتانىڭ بيۋرو وتىرىسىن وتكىزدى. وندا سەناتتىڭ 2023 جىلعى 16 اقپاندا وتەتىن كەزەكتى وتىرىسىنىڭ كۇن ءتارتىبى بەكىتىلدى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
بيۋرو وتىرىسىندا سەنات توراعاسى تۇركىستان قالاسىندا وتكەن ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمىن قورىتىندىلادى. ماۋلەن اشىمباەۆتىڭ ايتۋىنشا, فورۋمعا قاتىسقان ەلدەردىڭ دەلەگاتسيا باسشىلارى ءىس-شارا ۇيىمداستىرۋشىلىق جانە مازمۇندىق جاعىنان جوعارى دەڭگەيدە بولعانىن اتاپ وتكەن. سونداي-اق قاتىسۋشىلار جاڭا الاڭ وڭىردەگى ەلدەردىڭ پارلامەنتارالىق ىنتىماقتاستىعىن نىعايتۋعا ءوز ىقپالىن تيگىزەتىنىنە سەنىم ءبىلدىردى.
الداعى سەنات وتىرىسىندا دەپۋتاتتار بىرقاتار زاڭدى قارايدى. كۇن تارتىبىنە شىعارىلعان «ۇشىنشى ەلدەرمەن ءوزارا ساۋداداعى تەحنيكالىق كەدەرگىلەردى جويۋ ءتارتىبى جانە شارتتارى تۋرالى كەلىسىمدى راتيفيكاتسيالاۋ تۋرالى» زاڭ وتاندىق ونىمدەردى ەۋرازيالىق ەكونوميكالىق وداق ەلدەرىنىڭ نارىعىنا شىعارۋدى كوزدەيدى. سونداي-اق كەلىسىم ءونىمنىڭ ەاەو-دا جانە ءۇشىنشى ەلدىڭ اۋماعىندا بەلگىلەنگەن تالاپتارعا سايكەستىگىن باعالاۋ ناتيجەلەرىن ءوزارا تانۋعا باعىتتالعان.
سونىمەن قاتار سەناتورلار پالاتا وتىرىسىندا «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ ۇكىمەتى اراسىنداعى شەكارالىق وكىلدەردىڭ قىزمەت ۋچاسكەلەرى تۋرالى حاتتامانى (كارتا 1:200 000) راتيفيكاتسيالاۋ تۋرالى» زاڭدى قارايدى. حاتتامانى راتيفيكاتسيالاۋ ەكى ەل اراسىندا تاتۋ كورشىلىك قاتىناستاردى قولداۋعا, ءوزارا ءتيىمدى ەكونوميكالىق جانە وزگە دە ىنتىماقتاستىقتى دامىتۋعا, ادام قۇقىقتارى مەن بوستاندىقتارىن قامتاماسىز ەتۋگە, ءاربىر قاتىسۋشى مەملەكەتتىڭ مۇددەلەرىن قورعاۋعا ارنالعان كەلىسىلگەن شەكارا ساياساتىن جۇرگىزۋگە مۇمكىندىك بەرەدى.