قارجى جانە بيۋدجەت كوميتەتىنىڭ دەپۋتاتتارى سالىق-بيۋدجەت سالاسىنداعى اشىقتىقتى باعالاۋ جونىندەگى ماسەلەلەردى حالىقارالىق ۆاليۋتا قورىنىڭ وكىلدەرىمەن بىرگە تالقىلادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
كوميتەت توراعاسى سۇلتانبەك ماكەجانوۆ زاڭ شىعارۋشى بيلىكتىڭ بيۋدجەتتىك پروتسەسكە قاتىستى وكىلەتتىكتەرى مەن مىندەتتەرى قالاي ورىندالاتىنى تۋرالى كەزدەسۋگە قاتىسۋشىلارعا ايتىپ بەردى.
«پارلامەنت سەناتىنىڭ باسىم بولىگى ەلىمىزدەگى قازىرگى كەزدەگى 20 اكىمشىلىك-اۋماقتىق بىرلىك وكىلدەرىنەن جاساقتالدى. سوندىقتان دا سەناتورلار وز قىزمەتىندە وزدەرى سايلانعان ايماقتىڭ اتىنان دا ءسوز الادى. دەپۋتاتتار ءوز ءوڭىرىنىڭ پروبلەمالارىن, جەرگىلىكتى تۇرعىنداردىڭ سۇرانىستارىن جەتىك بىلەدى جانە وڭىرلەر وكىلدەرىمەن بىرلەسە وتىرىپ وزوكىلەتتىكتەرى اياسىندا ماسەلەلەردى تيىستى سالالىق مينيسترلىكتەردە شەشۋگە اتسالىسادى. ول ارينە, قارجىلاندىرۋ ماسەلەلەرىنە تىكەلەي قاتىستى», دەدى سەناتور ماكەجانوۆ.
سەناتور بەكبولات ورىنبەكوۆ تالقىلاۋ بارىسىندا سەناتتا رەسپۋبليكالىق بيۋدجەتتى قاراۋ بارىسىندا ونى قالىپتاستىرۋعا دەپۋتاتتاردىڭ تىكەلەي ىقپال ەتۋ مۇمكىندىگى بار ەكەندىگىنە حۆق وكىلدەرىنىڭ نازارىن اۋداردى.
حۆق توبىنىڭ باسشىسى ءوز كەزەگىندە كاپيتالدى ەلدەن شىعارۋ جانە ولاردى زاڭدى يەسىنە قايتارۋ فاكتىلەرىن انىقتاۋ تەتىكتەرى, سونداي-اق باسقا ەلدەرمەن سالىستىرعاندا قازاقستاندىق سالىق جانە بيۋدجەت كودەكستەرىنىڭ ارتىقشىلىقتارى مەن كەمشىلىكتەرى تۋرالى دەپۋتاتتارعا ايتىپ بەردى.
سۇلتانبەك ماكەجانوۆ كەزدەسۋدى قورىتىندىلاي كەلىپ, دەپۋتاتتار وسى سالاداعى اشىق ىنتىماقتاستىققا ارقاشان دايىن ەكەنىن اتاپ ءوتتى.