سەناتور ءالي بەكتاەۆ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتى دەپۋتاتتارىمەن بىرگە مەملەكەتتىك جەر كاداسترىن جۇرگىزۋ ءتارتىبىن جەتىلدىرۋ ماسەلەلەرى جونىندەگى ۋاكىلەتتى ورگانداردىڭ باسشىلىعىمەن كەزدەستى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
كەزدەسۋ مەملەكەت باسشىسىنىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا ارنالعان جولداۋىندا ۇكىمەتكە جەر كاداسترى سالاسىنداعى ماسەلەلەردى شەشۋ جونىندەگى العا قويىلعان ناقتى مىندەتتەردى ىسكە اسىرۋ اياسىندا ءوتتى.
ساراپشىلار ەل ەكونوميكاسىنىڭ بارلىق سالالارىندا ماڭىزدى ءرول اتقاراتىن مەملەكەتتىك كاداسترلاردى ۇيىمداستىرۋ جانە ولاردى جۇرگىزۋ, جەر تەلىمدەرىنىڭ فۋنكتسيونالدىق ينتەراكتيۆتى كارتالارىن جاساۋ, قالانىڭ اقپاراتتىق جۇيەسى جانە جىلجىمايتىن م ۇلىكتىڭ بىرىڭعاي مەملەكەتتىك كاداسترىن تانىستىرۋ جايىن, كاسىپكەرلەرگە جەر تەلىمدەرىن اشىق تۇردە جەدەل بەرۋ جونىندە ۇتىمدى تاسىلدەردى جانە ەلدى مەكەندەردەگى كوممۋنالدىق جەلىلەردىڭ كەستەسى تۋرالى ماسەلەلەردى تالقىلادى.
سەناتورلار شارا بارىسىندا تالقىلانعان ماسەلەلەر مۇقيات پىسىقتالاتىنىن جانە ولاردى ۇسىنىستار جوباسىنا ەنگىزگەننەن كەيىن ۇكىمەتكە جولدايتىنىن ايتتى.