تايلاند استاناسى بانگكوك قالاسىندا 22 جاسقا دەيىنگى بوكستان ازيا كونتينەنتىنىڭ چەمپيوناتىندا ورتالىق سپورت كلۋبىنىڭ بىلعارى قولعاپ شەبەرلەرى ءساتتى ونەر كورسەتتى, دەپ حابارلايدى Egemen.kz.
57 كەلىگە دەيىنگى سالماقتاعى قارۋلى كۇشتەردىڭ قىزمەتكەرى ماحمۇد سابىرحانعا اقتىق سىندا تايلاندتىق ساراۆۋت سۋكتحەت شىقتى. تورەشىلەردىڭ شەشىمىمەن جەڭىس قازاقستان سپورتشىسىنا بەرىلىپ, بوكسشىمىز ازيا چەمپيونى اتاندى.
مەرزىمدى قىزمەتتەگى سارباز تالعات سىرىمبەتوۆ پەن تاي بوكسشىسى رودسۋك فۋتحانەت 60 كەلىگە دەيىنگى سالماقتا جارتىلاي فينالدا كەزدەستى. جەكپە-جەكتىڭ العاشقى سەكۋندتارىندا بىلعارى قولعاپ شەبەرى قارسىلاسىن نوكداۋنعا جىبەرگەنمەن, سايىس سوڭىندا ءۇش راۋندتىڭ قورىتىندىسى بويىنشا اقتىق سايىسقا جولداما تاي سپورتشىسىنا بەرىلدى. وسىلايشا, قورعانىس مينيسترلىگى ورتالىق سپورت كلۋبىنىڭ اسكەري قىزمەتشىسى تالعات سىرىمبەتوۆ چەمپيوناتتىڭ قولا جۇلدەگەرى اتاندى.