سوڭعى جىلدارى اۋدان ورتالىقتارىندا ستۋدەنتتەردى جاتىن ورىنمەن قامتاماسىز ەتۋ جۇمىستارى مىقتاپ قولعا الىنا باستادى. بۇعان دەيىن قۇلانداعى اۋىلشارۋاشىلىق باعىتىنداعى كوللەدج قاسىنداعى بۇرىنعى جاتاقحاناعا كۇردەلى جوندەۋ جۇمىستارى جۇرگىزىلدى. وتكەن جىلى شۋ اۋدانىندا دا ستۋدەنتتەر ءۇيى جاستارعا ەسىگىن ايقارا اشتى.
15 جىلدان بەرى اۋىل شارۋاشىلىعى ماماندارىن دايارلاۋمەن اينالىسىپ كەلە جاتقان №3 بايزاق كوللەدجىنىڭ ستۋدەنتتەرى ەندى جاتاقحانا ماسەلەسىنە باس اۋىرتپايدى. 369 ستۋدەنتى بار وقۋ ورداسىنداعى 150 جاس جاتاقحانامەن قامتىلىپ وتىر.
ەكىقاباتتى عيماراتتىڭ اشىلۋ سالتاناتىنا قاتىسقان وبلىس اكىمىنىڭ ورىنباسارى ەركىن ۇيسىمباەۆ, ءبىلىم باسقارماسى باسشىسىنىڭ ورىنباسارى مۇحيت نىسانباەۆ بۇل باعىتتاعى جۇمىستار توقتامايتىنىن ايتسا, اۋدان اكىمى باقىت قازانباسوۆ ستۋدەنتتەر ءۇيىنىڭ ساپالى سالىنۋىنا اتسالىسقان كاسىپكەر ءسانيا التاەۆاعا ريزاشىلىعىن جەتكىزدى.
دەرەكتەرگە سەنسەك, اتالعان نىساندى سالۋ ءۇشىن قارجى ورتالىعىنىڭ جوباسى اياسىندا 280 ملن تەڭگە قاراجات جۇمسالىپتى. مۇندا ستۋدەنتتەردىڭ جايلى ءومىر سۇرۋىنە بارلىق جاعداي قاراستىرىلعان. ەڭ باستىسى, پاتەر كەزگەن ستۋدەنتتەر ەندى جىلى جاتاقحانامەن قامتىلىپ وتىرعانى كوڭىل قۋانتادى.
اۋدان اتقامىنەرلەرىنىڭ ايتۋىنشا, جاتاقحانادا جاتىن بولمەسىنەن بولەك, ستۋدەنتتەردىڭ ساباققا دايىندالۋىنا ارنالعان بولمە, اسحانا جانە ۇيىرمەلەر وتكىزۋگە ارنالعان كابينەتتەر بار. ءبىر سوزبەن ايتقاندا ستۋدەنتتەر جاتاقحانادا ءجۇرىپ-اق وزدەرىنە ىڭعايلى ۇيىرمەگە قاتىسىپ, كاسىبي مامانداردان ءتالىم الا الادى.
جامبىل وبلىسى,
بايزاق اۋدانى