ماڭعىستاۋ وبلىسىندا گيبريدتى ەلەكتر ستانساسى سالىنادى

«قازمۇنايگاز» ۇك اق (قمگ) باسقارما توراعاسى ماعزۇم مىرزاعاليەۆ قاڭتاردىڭ 25-ءى استانا قالاسىندا Eni S.p.A. (ENI) مۇناي-گاز كومپانياسىنىڭ تابيعي رەسۋرستار ءبولىمىنىڭ بارلاۋ جانە ءوندىرۋ جونىندەگى ديرەكتورى لۋكا ۆينياتي باستاعان يتاليالىق دەلەگاتسيامەن كەزدەستى.

قمگ مەن ENI ەكىجاقتى ىنتىماقتاستىق ماسەلەلەرىن تالقىلاپ, ماڭعىستاۋ وبلىسىندا جاڭارتىلاتىن ەنەرگيا كوزدەرى (كۇن+جەل) جانە گازبەن (ەلەكترمەن قامتۋدى تۇراقتاندىرۋ جانە گاز رەسۋرسىن ۇنەمدەۋ ءۇشىن مانەۆرلىك قۋات رەتىندە) جۇمىس ىستەيتىن, قۋاتى 120 مۆت گيبريدتى ەلەكتر ستانساسىن سالۋ جوباسىن بىرلەسىپ ىسكە اسىرۋعا كەلىستى.

«بۇل جوبا – قوس كومپانيانىڭ بىرلەسكەن تابىستى جۇمىسىنىڭ ناتيجەسى جانە مەملەكەت باسشىسىنىڭ «جاسىل» جوبالاردى دامىتۋ جونىندەگى ستراتەگيالىق تاپسىرماسىن ىسكە اسىرۋ جولىنداعى قادام. باستاما ءوڭىردىڭ ەنەرگەتيكالىق قاۋىپسىزدىگىن نىعايتىپ قانا قويماي, ينۆەستيتسيانىڭ كەلۋىنە جانە جاڭا جۇمىس ورىندارىنىڭ اشىلۋىنا مۇمكىندىك بەرەدى», دەدى ءوز سوزىندە ماعزۇم مىرزاعاليەۆ.

سونىمەن قاتار كەلىسسوز كەزىندە ەلەكتر ەنەرگياسىن ماقساتتى نىساندار ءۇشىن ءوندىرۋ مەن جەتكىزۋ وندىرىستە ءجيى بولاتىن ەلەكتر ەنەرگياسىنىڭ ىركىلىسى سالدارىنان اپاتتىق توقتاپ قالۋ قاۋپىن جويۋعا مۇمكىندىك بەرەتىنى ايتىلدى.

جوبانى ىسكە اسىرۋ مەرزىمى – 2023-2025 جىلدار.

گيبريدتى ەلەكتر ستانسانى سالۋ جونىندەگى كەلىسىم – بۇل قمگ مەن ENI كومپانيالارىنىڭ 2021 جىلدىڭ شىلدەسىندە قول قويىلعان ەلەكتر ەنەرگياسىن ءوندىرۋ جانە وتكىزۋ ءۇشىن ەنەرگەتيكالىق اۋىسۋ جوبالارىن ازىرلەۋدەگى ىنتىماقتاستىق تۋرالى مەموراندۋم اياسىنداعى جۇمىسىنىڭ جالعاسى.