ەۋرازيا ۇلتتىق ۋنيۆەرسيتەتى ءوزىنىڭ 15 تسيفرلىق سەرۆيسىن قولدانىسقا ەنگىزدى. جاڭا تەحنولوگيالىق شەشىمدەر «ەۇۋ – Digital University» بىرىڭعاي ەكوجۇيەسىن قالىپتاستىرادى جانە عىلىمي-ءبىلىم بەرۋ بارىسىن تسيفرلاندىرۋعا, بيزنەس-پروتسەستەردى اۆتوماتتاندىرۋعا, قىزمەتكەرلەر مەن وقىتۋشىلاردىڭ تسيفرلىق قۇزىرەتتەرىن دامىتۋعا باعىتتالعان, دەپ حابارلايدى Egemen.kz ۋنيۆەرسيتەتتىڭ ءباسپاسوز قىزمەتىنە سىلتەمە جاساپ.
ەۇۋ ءوزىنىڭ تسيفرلىق سەرۆيستەرىن ەندىرۋگە باسىمدىق بەرەدى. سوڭعى ەكى جىلدا ۋنيۆەرسيتەتتىڭ ءىت ماماندارى 15 ءونىم ازىرلەدى. بارلىق تەحنولوگيالىق شەشىمدەردى جوو ستۋدەنتتەرى مەن قىزمەتكەرلەرى ءساتتى قولدانىپ كەلەدى.
تسيفرلىق قىزمەتتەر كۇندەلىكتى جۇمىس ءۇردىسىن وڭتايلاندىرىپ, ەڭبەك ونىمدىلىگى مەن وقۋ پروتسەسىن ۇيىمداستىرۋدىڭ تيىمدىلىگىن ارتتىردى. ماسەلەن, قاعازسىز قۇجات اينالىمى جۇيەسى جىلىنا 20 ملن تەڭگەنى ۇنەمدەۋگە جول اشتى. ەلەكتروندىق سەرۆيس 1 ميلليوننان استام باسپا بەتىن ساقتاۋعا, كارتريدجدەر شىعىنىن, پرينتەرلەردىڭ توزۋىن جانە سيللابۋستار مەن وقۋ-ادىستەمەلىك كەشەندەرگە جىل سايىن قاعاز جۇزىندە قول قويۋعا كەتەتىن قىزمەتكەرلەردىڭ ەڭبەك شىعىندارىن ازايتتى.
«ەۇۋ-دا 2021-2025 جىلدارعا ارنالعان تسيفرلىق ەكوجۇيە تۇجىرىمداماسى ىسكە اسىرىلۋ ۇستىندە. وسى باعدارلاما اياسىندا ءبىز تۇلەكتەردى جۇمىسقا ورنالاستىرۋ پلاتفورماسىن, ءبىلىم الۋشىلارعا وقۋ پروتسەسى تۋرالى قاجەتتى اقپارات جاريالاناتىن Smart. ENU ءموبيلدى قوسىمشاسىن, قاعازسىز قۇجات اينالىمى جۇيەسىن, تالاپكەرلەرگە ارنالعان ەلەكتروندىق كەزەك تەرمينالىن, جاپپاي ءبىلىم بەرۋ كۋرستارى بار ونلاين-وقىتۋ پلاتفورماسىن قۇراستىردىق. ءبىزدىڭ بارلىق ءىت-ونىمدەرىمىز جۇمىس پروتسەستەرىن جەڭىلدەتتى, ستۋدەنتتەر مەن وقىتۋشىلار ءۇشىن قولايلى جاعدايلار جاساۋعا مۇمكىندىك بەردى. قازىر جوو-دا قىزمەتكەرلەردىڭ تسيفرلىق قۇزىرەتتىلىكتەرىن دامىتۋ, ستۋدەنتتەردىڭ تسيفرلىق بەيىندەرىن ازىرلەۋ جۇمىستارى قولعا الىندى. بۇل - تسيفرلىق ۋنيۆەرسيتەتتى دامىتۋعا جاسالعان جۇيەلى قادام», دەپ اتاپ ءوتتى ەۇۋ تسيفرلىق دامۋ جانە قاشىقتىقتان وقىتۋ دەپارتامەنتىنىڭ ديرەكتورى گۇلميرا بەكمانوۆا.
ەۇۋ-دىڭ تاعى ءبىر بىرەگەي تسيفرلىق جۇيەسى - «عىلىمي-زەرتتەۋ ينستيتۋتتارىنىڭ جوسپارلارى مەن ەسەپتەرى». ول جۇمىس جوسپارلارىن, عىلىمي-زەرتتەۋ ينستيتۋتتارىنىڭ توقساندىق ەسەپتەرىن بەكىتۋگە, عىلىمي-زەرتتەۋ ينستيتۋتتارىنىڭ قىزمەتىنە بايلانىستى مالىمەتتەردى جان-جاقتى تالداۋعا جانە تاپسىرمالاردىڭ ورىندالۋىن ونلاين تارتىپتە باقىلاۋعا مۇمكىندىك بەرەدى.
ديسسەرتاتسيالىق كەڭەستەردىڭ ونلاين داۋىس بەرۋ جۇيەسى كريپتوگرافيالىق الگوريتمدەر نەگىزىندە جاسىرىن داۋىس بەرۋدى وتكىزۋگە ارنالعان جانە ۋنيۆەرسيتەت دوكتورانتتارىنىڭ ديسسەرتاتسيالارىن قورعاۋدا قولدانىلادى. ول داۋىس بەرۋدىڭ انونيمدىلىگىن, ءراسىمنىڭ اشىقتىعىن جانە ەسەپ بەرۋدى اۆتوماتتاندىرۋدى قامتاماسىز ەتەدى.
سونىمەن بىرگە ۋنيۆەرسيتەت ءوزىنىڭ پلاتفورماسى نەگىزىندە ونلاين-ءبىلىم بەرۋدى بەلسەندى تۇردە دامىتۋدا جانە سەرتيفيكاتتاۋ جۇيەسىن ازىرلەۋدى قولعا الدى. بۇگىنگى تاڭدا ءبىلىم بەرۋ رەسۋرسىنا 132 ءپان بويىنشا 2000 ءدارىس جۇكتەلگەن. ەكى جىل ىشىندە 40 مىڭعا جۋىق ادام بەينەماتەريالداردى تىڭدادى.