تاراز قالاسىندا حالىق ءارتىسى ءاسانالى ءاشىموۆ اتىنداعى ونەر ورتالىعى سالىنادى. اتالعان ورتالىق ءوڭىر رۋحانياتىن ناسيحاتتاۋداعى بىردەن-ءبىر ماڭىزدى نىسانعا اينالماق. جاڭا نىساننىڭ ءجون-جوباسىن زەردەلەۋ ماقساتىندا ابىز اقساقال كونە شاھارعا ارنايى ات باسىن بۇردى.
كەزدەسۋ بارىسىندا تاراز قالاسىنىڭ اكىمى باقىتجان ورىنبەكوۆ ءاسانالى ءاشىموۆتى جاڭادان بوي كوتەرەتىن ونەر ورتالىعىنىڭ ەسكيزدىك جوباسىمەن جان-جاقتى تانىستىردى. ءوز كەزەگىندە ا.ءاشىموۆ ورتالىققا قاتىستى كوكەيدەگى ۇسىنىستارىن ورتاعا سالدى.
ب.ورىنبەكوۆتىڭ ايتۋىنشا, نىساننىڭ قۇرىلىس جۇمىستارى ناۋرىز ايىندا باستالادى. ونەر ورتالىعىنىڭ جالپى اۋماعى 834 شارشى مەتردى قۇراماق. ەكىقاباتتى عيماراتتا تەاتر, كينو, حورەوگرافيا سەكىلدى وزگە دە ۇيىرمەلەر جۇمىس ىستەيدى. وسىلايشا, جەرگىلىكتى جاستاردى ونەرگە باۋلۋ كوزدەلىپ وتىر.
بۇدان بولەك, ءاسانالى ءاشىموۆ اتىنداعى مۋزەي دە اتالعان عيماراتقا كوشىرىلەدى. قالا اكىمىنىڭ سوزىنە سەنسەك, عيمارات ىقىلاس دۇكەن ۇلى اتىنداعى قالالىق مادەنيەت ءۇيىنىڭ ماڭىنان بوي كوتەرەدى. ونەر ورتالىعىنىڭ قاسبەتى نەوكلاسسيكالىق ستيلدە, پليتالى تراۆەتەرينمەن ادىپتەلمەك. نىسان جىل سوڭىنا دەيىن پايدالانۋعا بەرىلەدى.
«ونەردى قولداعان ەل ورگە باسادى. بۇل نىسان سونداي قولداۋدىڭ ارقاسىندا سالىنادى. جامبىل جەرى – تۋعان ولكەم. تۋعان جەرىمدە وسىنداي ورتالىقتىڭ بوي كوتەرەتىنىنە بەك قۋانىشتىمىن. ورتالىق ماعان ەمەس, بولاشاققا قىزمەت ەتەدى. نىساننىڭ جالپى جوباسى كوڭىلىمنەن شىقتى», دەيدى حالىق ءارتىسى ءوز ويىمەن ءبولىسىپ.
تاراز